Nyimbo 111 - Bhukhu la Kuyamba

Kudumbiza Chawuta

¹ Aleluya! Nin'zatenda Chawuta nantima wangu wentse, muchipani chawakukonkholoka, musonkhano.

² Nimakulu mabasa ya Chawuta, yampsagiwa nawentse aniyafuna.

³ Mabasa yake yadadzala nawukulu nandemela, chilungamo chake chim'mala lini.

⁴ Adayikha nkhumbusila yamabasa yake yan'dabwisa; Chawuta niwakukoma ntima pomwe niwachifundo.

⁵ Ampeleka chakudya kwaawo animugopa; ankumbuka chibvano chake nthawe zentse.

⁶ Wadziwisa wanthu wake mphamvu zamabasa yake, pakuwapasa nthaka yamadziko yamishowo.

⁷ Mabasa yamanja yake niyakukhulupilika nakutonga; maweluzo yake yentse niyakukhulupilika,

⁸ yadakhazikisiwa kufika lini nalini, kuti yachitewe nachikhulupililo nakukonkholoka.

⁹ Adatuma kulombola kwawanthu wake; adalewa chibvano chake chakufika lini nalini. Kuyela nakugopsa ndilo dzina lake!

¹⁰ Kugopa Chawuta ndiko kuyamba kwanzelu; kubvesesesa kwabwino kuna wentse an'gopa. Dumbizo lake lim'mala lini!