Nyimbo 106 - Bhukhu la Kuyamba

Ubwino wa Chawuta kuwanthu wake

¹ Dumbizani Chawuta! Tendani Chawuta, pakuti niwabwino! Pakuti ntsisi zake zim'mala lini.

² Mbani angalewe mabasa makulu ya Chawuta? Angalalikile kudumbiziwa kwake kwentse?

³ Niwakudala awo anteyeza kulinganiza, an'chita chilungamo nthawe zentse.

⁴ Ndikumbukileni, imwe Chawuta pamun'thandiza wanthu wanu! Ndizungileni pamuniwapulumusa;

⁵ kuti ndiwone kukoma kwawakusankhuliwa wanu kuti ndisekelele pankondwa wanthu wanu, ndidumbize pabodzi nanthaka yanu.

⁶ Ise pabodzi naazipazi wathu tidataza; tidadzonga, tidachita bzakuyipa.

⁷ Azipayi wathu paakhali mu Ijipiti, alibe kubvesesa bzidabwiso bzanu, alibe kukumbukila kuwanda kwantsisi zanu, koma adapanduka panyanja, panyanja ifuyila.

⁸ Adaachiza nathangwe ladzina lake, kuti awonese ukulu wake.

⁹ Adatsimula nyanja ifuyila, nyanja nkuwuma; adaatsogolela muboo kuchita ninga muchipululu.

¹⁰ Adaachiza kuchoka m'manja mwan'zondi, adaalombola kujanja lan'zondi.

¹¹ Madzi yadanyuza azondi wawo, palibe ne m'bodzi adasala.

¹² Pamwepo wanthu adakhulupilila mafala yake, adayimba achimudumbiza.

¹³ Koma adakulumiza kuyebwa mabasa yake, alibe kuyimila kufundisa kwake.

¹⁴ Koma adatopa kwene-kwene muchipululu, achiyesa Mulungu mumbuto yakuwuma,

¹⁵ adaapasa bzaadakumbila, koma adabwelesa chitenda pakati pawo.

¹⁶ Wanthu adachitila nchanje Mozisi, ali pansasa; Aroni wakuyela wa Chawuta,

¹⁷ dziko lidafunguka nkumeza Dhatani, lichigwanila chipani cha Abhiramu.

¹⁸ Moto udagaka muchipani chawo, malilimi yamoto yadatentha wakuyipa.

¹⁹ Adakonza mwana wang'ombe pa Horebhu, achikotamila chifanikizo.

²⁰ Adatsinthanisa mbili ya Mulungu, nachifanikizo chang'ombe chinidya upsa.

²¹ Adayebwa Mulungu nyakuwachiza, uyo adachita bzinthu bzikulu mu Ijipiti;

²² bzidabwiso mudziko la Hamu, nabzinthu bzin'gopsa pa Nyanja Ifuyila.

²³ Nakutenepo iye adati an'zaacheneka, ninga Mozisi wakusankhuliwa wake, alibe kuyima pakati pawo na Mulungu, kuti abweze nkwiyo wake aleke kuwacheneka.

²⁴ Pamwepo iwo adalamba dziko labwino, pakuti alibe kukhulupilila fala lake.

²⁵ Adang'ung'uzika m'matenti yawo, alibe kutetekela fala la Chawuta.

²⁶ Nakutenepo adasumusa janja lake achilumbila kwayiwo kuti an'zafela muchipululu,

²⁷ pomwe mibadwe yawo in'zafela pakati pawanthu wakunja, achiwamwazila m'madziko.

²⁸ Pamwepo iwo adabziphataniza kwa Bhaali waku Peyori, achidya ntsembe zikhapelekewa kwawakufa;

²⁹ adanyokosa ukali wa Chawuta nabzaakhachita, pamwepo nyathwa idabwela nkati mwawo.

³⁰ Finiyasi ndiye adasumuka, nkukapha anyakutazawo, nyathwa nkumala.

³¹ Ibzi bzidachitisa kuti iye alewedwe kuti niwakulungama kum'badwe nam'badwe kufika lini nalini.

³² Adamukalipisa pamadzi yapa Meribha, bzidayipila Mozisi thangwe layiwo,

³³ pakuti adawawisa n'zimu wake, achizafika pakulewa-lewa mafala yapezi-pezi.

³⁴ Alibe kucheneka mishowo yawanthu, ninga kulewa kukhadachitiwa na Chawuta,

³⁵ koma adaphatana namadzikoyo, achifunda kuchita bzaakhachita.

³⁶ Adatumikila amilungu wawo, awo adazawa ukhukha kwayiwo.

³⁷ Adapeleka ntsembe wana wawo wachimuna, nawachikazi kumizimu yakuyipa;

³⁸ adayeleza gazi lilibe milandu, gazi lawana wawo wachimuna nawachikazi, waadapelekela ntsembe kubzifanikizo bza Kenani, dziko lidapsipisiwa nagazi.

³⁹ Nakutenepo adapsipisiwa namabasa yawo, adachita uhule nakuchita kwawo.

⁴⁰ Pamwepo ukali wa Chawuta udagakila wanthu wake, iye adanyantsiwa nanthaka yake.

⁴¹ Adaayikha m'manja mwawanthu wakunja, nakutenepo awo akhaazonda ndiwo adazaatonga.

⁴² Azondi wawo adaapondelela, adayikhiwa pantsi pawutongi wawo.

⁴³ Nthawe zizinji Chawuta akhaapulumusa, koma iwo akhali mphandu-pandu munkhumbukila zawo, adadelezewa pantsi nathangwe labzakuyipa bzawo.

⁴⁴ Koma iye adawona nthamu zawo, paadabva kulila kwawo.

⁴⁵ Nathangwe lawo adakumbukila chibvano chake, adabweza ntima wake thangwe lantsisi zizinji.

⁴⁶ Adaachita kuti adatiliwe chifundo, pamaso pawentse akhadaapamba.

⁴⁷ Tichizeni, imwe Chawuta Mulungu wathu! Tikochezeni kuchoka kumadziko, kuti tipeleke kutenda kudzina lanu lakuyela, tidumbize mbili yanu.

⁴⁸ Ngaadalisiwe Chawuta, Mulungu wa Izraeli, kuchoka lini nalini kufika lini nalini! Lekani wanthu wentse ati, Ameni! Dumbizani Chawuta!