Nyimbo 103 - Bhukhu la Kuyamba

Chifundo cha Mulungu

Nyimbo ya Dhaveti.

¹ Dalisa Chawuta, iwe moyo wangu! Nabzentse bzili mwayine, dalisa dzina lake lakuyela!

² Dalisa Chawuta, iwe moyo wangu! Leka kuyebwa bzentse bzaankuchitila!

³ Uyo anilekelela bzakuyipa bzako bzentse, uyo ampolesa matenda yako yentse,

⁴ uyo anilombola umoyo wako kuchoka mudindi, uyo ankubvadzika ntsisi nachifundo,

⁵ uyo ankukhutisa nabzabwino, pakuti ubwana wako um'bwezewa ninga wachipungu.

⁶ Chawuta an'chita bzakulungama, nabzakulinganiza kwawentse wakupondelelewa.

⁷ Adadziwisa njila zake kwa Mozisi, mabasa yake kwaa Izraeli.

⁸ Chawuta niwachifundo nawakukoma ntima, ankulumiza lini kukalipa, pomwe niwantsisi zizinji kwene-kwene.

⁹ An'khala lini achipasa milandu, panango kukhala adakalipa.

¹⁰ An'chita lini kwayise kuteyeza bzakuyipa bzathu, panango kutibwezela kuyendelana nakutaza kwathu.

¹¹ Pakuti ninga kutalimpha kwakudzulu kuchoka pantsi, ndiko kukula kwantsisi zake kwaanimugopa.

¹² Ninga kutalamukana kwamabveladzuwa namadokelo, ndiko kutalamusa bzakuyipa bzathu kwaadachita.

¹³ Ninga kubvela chifundo kun'chita apayi wana wawo, Chawuta an'bvelambo ntsisi awo animugopa.

¹⁴ Pakuti an'dziwa kulengewa kwathu, ankumbukila kuti ndise dongo.

¹⁵ Koma munthu ntsiku zake zininga upsa, ankula ninga maluwa yan'thengo.

¹⁶ Pakuti mphepo ikapitapo, pan'khala palibe. Mbuto yalene in'zalidziwa lini pomwe.

¹⁷ Koma ntsisi za Chawuta n'zalini nalini, kwaawo animugopa, kulungama kwake kunfika kumibadwe yentse,

¹⁸ kwaawo an'chengeta chibvano chake, naawo ankumbukila mitemo yake, kuyichita.

¹⁹ Chawuta adakhazikisa mpando wake kudzulu, umambo wake untonga kwentse.

²⁰ Dalisani Chawuta, imwe ngilozi zake! Imwe wankhondo wamphamvu mun'chita bzaanilewa, imwe muntetekela kubveka kwafala lake.

²¹ Dalisani Chawuta, imwe wankhondo wake wentse! Atumiki wake mun'chita bzaanfuna!

²² Imwe mabasa yake yentse, dalisani Chawuta! Mumbuto zentse zaantonga. Dalisa Chawuta, iwe moyo wangu!