Kuyamba 50 - Bhukhu la Kuyamba

¹ Pamwepo Jozefi adagwa padzulu paapayi wake, adalila achiwapsopsoda.

² Jozefi adawuza anyabezi wakuwumisa bzitanda, kuti awumise chitanda chaapayi wake. Nakutenepo anyakuwumisa adawumisa Izraeli.

³ Adatola ntsiku makumi manayi kuchiwumisa, pakuti ndizo ntsiku zikhafunika kuwumisa munthu. Wanthu wa Ijipiti adalila Jakobho kwantsiku makumi manomwe.

⁴ Ntsiku zakumulila pazidamala, Jozefi adalewa-lewa nawanyumba ya Farawo adati, “Tsapano peno mwandikomela ntima, ndaphata minyendo, kaleweni kwa Farawo muchiti,

⁵ apayi wangu adandilumbilisa adati, ‘Ndaa pafupi kufa, ndina manda yangu ku Kenani yandidabzichelela ndekha, mukandiyikhe m'mwemo.’ Nakutenepo lekani ndiyende, ndaphata minyendo, ndikayikhe apayi wangu, ndichizabwelela.”

⁶ Farawo adati, “Yenda ukayikhe apayi wako kuteyeza kulumbila kwawudachita.”

⁷ Nakutenepo Jozefi adayenda kayikha apayi wake. Adayenda naalanda wentse wa Farawo naakulu-akulu wentse wanyumba yake, naakulu-akulu wentse wadziko la Ijipiti,

⁸ nawentse wanyumba ya Jozefi, naabale wake, nawanyumba yaapayi wake; koma wana wawo, namabila yawo, nang'ombe zawo ndibzo bzidasala mu Gosheni.

⁹ Adayenda nangolo nawakuzifambisa, chikhali chipani chikulu kwene-kwene.

¹⁰ Paadafika pambuto yakupulila pa Atadhi, kung'ambu kwa Jorodhani chakumabveladzuwa, adalila mphele ikulu kwene-kwene kwantsiku zinomwe, kulila apayi wake.

¹¹ Wanthu wamu Kenani paadawona kulila kwaakhachita, paakhali pambuto yakupulila pa Atadhi iwo adati, “Iyi ninkhawa ikulu kwaa Ijipiti.” Nakutenepo mbuto imweyo adazayipasa dzina lakuti, “Abheli-mizirayimu,” mbuto imweyo ili kung'ambu kwa Jorodhani.

¹² Nakutenepo wana wake adamuchitila bzaadaawuza,

¹³ pakuti wana wake adatakula chitanda chake nkuyenda nacho kudziko la Kenani, achikachiyikha mumphako m'munda wa Makipela chakumabveladzuwa kwa Mamure, yaadagula Abhurahamu pabodzi namunda, kwa Efuroni mu Hiti kukhala mbuto yakuyikha wanthu.

¹⁴ Paadamaliza kuyikha chitanda chaapayi wake, Jozefi adabwelela ku Ijipiti naabale wake, nawentse waakhadayenda nawo kayikha apayi wake.

Jozefi anilekelela akulu wake

¹⁵ Abale wa Jozefi paadawona kuti apayi wawo afa, adati, “Panango Jozefi atizonde, achibwezambo kwayise bzentse bzakuyipa bzatidachita kwayiye?”

¹⁶ Nakutenepo iwo adatuma fala kwa Jozefi lakuti, “Apayi wanu anati afa adatiwuza kuti,

¹⁷ ‘Uzani Jozefi kuti lekelela bzakuyipa bzaabale wako nakutaza kwawo, ndaphata minyendo, pakuti adachita chakuyipa kwayiwe.’ Tsapano, taphata minyendo yanu, lekelelani bzakuyipa bzaalanda wa Mulungu waapayi wanu.” Jozefi adalila paadamuwuza mafala yamweyo.

¹⁸ Pamwepo akulu wake adafika patsogolo pake achimukotamila, nkuti, “Wonani, ndise alanda wanu.”

¹⁹ Koma Jozefi adati kwayiwo, “Lekani kugopa, ko ine ndatola mbuto ya Mulungu?

²⁰ Imwe mudandichitila chakuyipa, koma Mulungu adachita chabwino, kuti wanthu azinji akhale wamoyo, ninga bzaali lelo.

²¹ Nakutenepo imwe lekani kugopa, ine ninkupasani chakudya imwe nawana wanu.” Nakutenepo iye adaalimbisa achiwanyamaliza.

Kufa kwa Jozefi

²² Jozefi adakhala mu Ijipiti, iye nawanyumba yaapayi wake; Jozefi adakhala kwamagole dzana nakhumi.

²³ Jozefi adawona wana wa Efulemu wam'badwe wachitatu, nawana wa Makiri mwana Manase, awo waakhatola ninga wana wake.

²⁴ Jozefi adati kwaabale wake, “Ine ndawa pafupi kufa. Koma Mulungu an'zakuzungilani, achizakuchosani mudziko lino achikuyendesani kudziko laadalumbila kupasa Abhurahamu na Isaki na Jakobho.”

²⁵ Pamwepo Jozefi adalumbilisa abale wake wana wa Izraeli iye adati, “Mulungu an'zakuzungilani imwe mun'zatakula mabondo yangu kuchoka mudziko lino.”

²⁶ Nakutenepo Jozefi adafa ali namagole dzana nakhumi; chitanda chake chidawumisiwa, nkuyikhiwa m'bawulu mu Ijipiti.