Kuyamba 49 - Bhukhu la Kuyamba

Mafala ya Jakobho yakumalizila

¹ Jakobho adachemela wana wake wachimuna nkuti kwayiwo, “Kochezanani mwentse ndikuwuzeni bzin'zakuchitikilani muntsiku zim'bwela.”

² “Kochezanani mubve imwe wana wa Jakobho, mubve kwaapayi wanu Izraeli.

³ “Rubheni, ndiwe mwana wangu wakuyamba, mphamvu zangu, wakuyamba wamphamvu zangu, udapitiliza pakukuziwa, udapitilila pamphamvu.

⁴ Wakusaya kukhazikika ninga madzi, un'zawa lini nkulu, pakuti udakwila pachalimba paapayi wako, nkupapsipisa, udakwila pachalimba pangu!

⁵ “Simiyoni na Levi mpawubale bwawo; bzida bzandewo nimabhemba yawo.

⁶ Moyo wangu leka kupita mukupangana kwawo, kulemekezewa kwangu ngakuleke kuphataniziwa nachipani chawo. Pakuti muwukali wawo anipha wanthu, nakufuna kwawo an'gwata mikangato yang'ombe.

⁷ Ngawutembelelewe ukali wawo, pakuti un'gopsa; nankwiyo wawo, pakuti niwadima! Nin'zaapatula mwa Jakobho, nin'zaabalalisa mudziko la Izraeli.”

⁸ “Judha, abale wako an'zakudumbiza, janja lako lin'zawa pakhosi paazondi wako; wana waapayi wako an'zakukotamila.

⁹ Judha nimwana wamphondolo, kuchoka pakudya nyama, mwanangu, wayenda. Adambwathama pantsi, adatsanda ninga mphondolo, ninga mphondolo ikazi; mbani angayese angamutokonye?

¹⁰ Mphsimbo yawumambo in'zachoka lini pana Judha, panango mphsimbo yakutonga kuchoka pakati paminyendo yake, kufikila wabwela ku Shilo, mishowo yentse yawanthu in'zamutetekela.

¹¹ An'zamangilila dhonki lake pamuvayini, mwana wadhonki lake pamuvayini wabwino. Aniwasha bzakubvala bzake muvinyu, nanguwo zake mugazi lamagilepisi.

¹² Maso yake yan'zafuyila navinyu, mano yake yan'zachena nankaka.”

¹³ “Zebhuluni an'zakhala mumphepete mwanyanja, an'zakhala gombe lamabote, malile yake yan'zawa ku Sidhoni.”

¹⁴ “Isakari nidhonki lakulimba, an'gona pakati pamathanga.

¹⁵ Adawona kuti mbuto yakupumulila ikhali yabwino, ikhakondwelesa. Nakutenepo iye adakotamisa phewa kuti atakule, iye adazakhala kapolo pakuphata basa lachibhalo.”

¹⁶ “Dhani an'zatonga wanthu wake, ninga ubodzi wamishowo ya Izraeli.

¹⁷ Dhani an'zakhala nyoka m'mbali mwanjila, nyoka ina ululu m'mbali mwanjila, iyo iniluma bzithatha bzahachi, bzakuti wakuyifambisa anigwa pantsi nangoto.

¹⁸ Niniyimila chipulumuso chanu, imwe Chawuta.”

¹⁹ “Gadhi an'zafikiliwa namagananga, koma iye an'zaateyela achiwathamangisa.”

²⁰ “Chakudya cha Asheri chin'zakhala namafuta, an'zakolola chakudya chawumambo.”

²¹ “Nafitali nimphala in'thamanga idatsudzuka, anilewa mafala yabwino.”

²² “Jozefi ali nin'thayi um'bala, n'thayi um'bala m'mbali mwakamadzi; mithayi yake intambalala padzulu pampanda.

²³ Anyamisewe adamufikila bzin'gopsa, adamulasa, achimushupa;

²⁴ koma utati wake udakhala wamphamvu, manja yake yadawa yakulimba, namanja ya Nyamphamvu wa Jakobho, nadzina lanyakabusa, mwala wa Izraeli,

²⁵ na Mulungu waapayi wako uyo an'zakuthandiza, na Mulungu Nyamphamvu zentse an'zakudalisa, namadaliso yan'choka kudzulu. Madaliso yam'boo, madaliso yamasuku nayamimba.

²⁶ Madaliso yaapayi wako, niyamphamvu kuposa madaliso yamapili yachikhalilo, yamposa bzabwino bziniwoneka m'mapili yachikhalilo; bzabwino bzamapili yansaya kumala; ngabzikhale pansolo wa Jozefi, pansolo pawuyo akhadapatukana naabale wake.”

²⁷ “Bhenjemani nimphupi in'cheneka, machibese inidya nyama yayaphata, mawulo in'gawa bzayaphata.”

²⁸ Iyi ndiyo mishowo khumi namiwili yaa Izraeli, ibzi ndibzo bzidalewedwa naapayi wawo kwayiwo paakhaadalisa, kudalisa munthu yekha-yekha namadaliso yaniyendelana nayiye.

Kufa nakuyikhiwa kwa Jakobho

²⁹ Pamwepo Jakobho adawuza wana wake kuti, “Nthawe yakufa kwangu yafika. Imwe mukandiyikhe kumanda kudayikhiwa makholo yangu, mumphako ili m'munda wa Efuloni mu Hiti,

³⁰ mumphako ili m'munda pa Makipela, chakumabveladzuwa kwa Mamure mudziko la Kenani, idaguliwa na Abhurahamu pabodzi namunda wa Efuroni mu Hiti kukhala manda.

³¹ Kumweko ndiko kudayikhiwa Abhurahamu nankazi wake Sara; pomwe kumweko ndiko kudayikhiwa Isaki nankazi wake Rabheka; pomwe kumweko ndiko kwandidayikha Liya,

³² munda namphako bzili mwemo bzidaguliwa kwaa Hiti.”

³³ Jakobho paadamaliza kuwuza wana wake adagona pakuchalimba pake nkufa achikayikhiwa kwawanthu wakwake.