Kuyamba 46 - Bhukhu la Kuyamba

Jakobho nabanja lake aniyenda ku Ijipiti

¹ Nakutenepo Izraeli adaphata ulendo wake nabzentse bzaakhanabzo, adafika pa Bheeri-shebha adapeleka ntsembe kwa Mulungu waapayi wake Isaki.

² Usiku umwewo Mulungu adalewa-lewa kwa Izraeli kutulo, adati, “Jakobho! Jakobho!” Iye adati, “Ndili pano.”

³ Pamwepo Mulungu adati, “Ndine Mulungu, Mulungu waapayi wako, leka kugopa yenda ku Ijipiti, pakuti kumweko ninkakuchita nshowo ukulu.

⁴ Nin'zayenda nayiwe ku Ijipiti, ndichizakubweza pomwe kuno. Janja la Jozefi ndilo lin'zapunga maso yako.”

⁵ Pamwepo Jakobho adachoka ku Bheeri-shebha. Wana wa Izraeli adatakula apayi wawo, akazi nawana wawo mungolo zidatumiziwa na Farawo kuzaatakula.

⁶ Adatakulambo bzifuwo bzawo, nabzombo bzawo bzaadawona mudziko la Kenani achiyenda ku Ijipiti, Jakobho pabodzi nawam'badwe wake wentse,

⁷ wana wake, wana wawana wake wachimuna, wana wake wachikazi, nawana wachikazi wawana wake; m'badwe wake wentse adabwela nawo ku Ijipiti.

⁸ Aya ndiyo madzina yam'badwe wa Izraeli adayenda ku Ijipiti. Jakobho nawana wake, Rubheni, mwana wakuyamba wa Jakobho.

⁹ Wana wa Rubheni: Hanoki na Palu na Hezironi na Karumi.

¹⁰ Wana wa Simiyoni: Jemuyeli na Jamini na Ohadhi na Jakini na Zohari na Shaulo uyo adabaliwa nankazi wachi Kenani.

¹¹ Wana wa Levi: Gerishoni na Kohati na Merari.

¹² Wana wa Judha: Eri na Onani na Shela na Ferezi na Zera. Koma Eri na Onani adafela mudziko la Kenani. Wana wa Perezi akhali Hezironi na Hamuli.

¹³ Wana wa Isakari: Tola na Puva na Iyobhi na Shimironi.

¹⁴ Wana wa Zebhuluni: Seredhi na Eloni na Jahileyeli.

¹⁵ Awa ndiwo wana wa Liya waadabala na Jakobho paakhali mudziko la Padhani-aramu, namwana wake wachikazi Dhina. Wentse pabodzi wana wake wachimuna nawachikazi akhafika makumi matatu naatatu.

¹⁶ Wana wa Gadhi: Zifiyoni na Hagi na Shuni na Ezibhoni na Eri na Arodhi na Areli.

¹⁷ Wana wa Asheri: Imina na Ishiva na Ishivi na Bheriya na nana wawo Sera. Wana wa Bheriya: Hebheri na Malikiyeli.

¹⁸ Awa ndiwo wana wa Zilipa, uyo Labhani waadapasa mwana wake wachikazi Liya. Adabalila Jakobho wana khumi naatanthatu.

¹⁹ Wana wa Rakelo, nkazi wa Jakobho: Jozefi na Bhenjemani.

²⁰ Jozefi paakhali mudziko la Ijipiti adabala wana awili Manase na Efulemu. Amayi wawo akhali Asenati, mwana wa Potifera nyantsembe wamuguta la Oni.

²¹ Wana wa Bhenjemani: Bhela na Bhekeri na Ashibheli na Gera na Namani na Ehi na Roshi na Mupimu na Hupimu na Aridhi.

²² Awa ndiwo wana wa Rakelo waadabalila Jakobho, wentse pabodzi khumi naanayi.

²³ Mwana wa Dhani: Hushimu.

²⁴ Wana wa Nafitali: Jahizeyeli na Guni na Jezeri na Shilemu.

²⁵ Awa ndiwo wana wa Bhiliha, uyo Labhani waadapasa mwana wake wachikazi Rakelo, dabalila Jakobho wana anomwe.

²⁶ Wanthu wentse wa Jakobho adayenda ku Ijipiti, wam'badwe wake kuleka kuphatanizila azikazi wawana wa Jakobho, wentse pabodzi akhali makumi matanthatu naatanthatu;

²⁷ Wana wa Jozefi waadabalila mu Ijipiti akhali awili; wanthu wentse wanyumba ya Jakobho adabwela ku Ijipiti akhali makumi manomwe.

Jakobho nabanja lake anfika mu Ijipiti

²⁸ Adatsogoza Judha kwa Jozefi kuti akaawonese njila iniyenda ku Gosheni, pamwepo adafika mudziko la Gosheni.

²⁹ Pamwepo Jozefi adakonzeka ngolo yake nkuyenda kagumana na Izraeli apayi wake mu Gosheni, adabzipeleka kwayiwo, nkuwakumbatila achilila kwakanthawe.

³⁰ Izraeli adati kwa Jozefi, “Tsapano ningafe pakuti ndawona nkhope yako, ndadziwa kuti uchana moyo.”

³¹ Jozefi adati kwaabale wake nakwanyumba yentse yaapayi wake, “Ndaakuyenda kawuza Farawo ndichikati kwayiye, ‘Abale wangu nawanyumba yaapayi wangu awo akhali mudziko la Kenani abwela kwayine;

³² wanthu amwewo mbaanyakabusa, pakuti niwakufuwa ng'ombe, nakutenepo abwela namabila yawo, nang'ombe zawo nabzentse bzaakhanabzo.’

³³ Farawo akakuchemelani achikubvunzani kuti, ‘Basa lanu nilanyi?’

³⁴ Imwe munkati, ‘Ise alanda wanu ndise wakufuwa mabila, kuyambila pawubwana wathu mpaka lelo isepo naazipayi wathu,’ kuti mukakwanise kukhala mumbuto ya Gosheni; pakuti anyakabusa wentse an'nyantsila a Ijipiti.”