Kuyamba 40 - Bhukhu la Kuyamba

Jozefi anilapanula maloto yaakayidi

¹ Pakudapita nthawe, nyakupeleka vinyu wamambo wa Ijipiti nanyakuphika zingwa adatazila mbuya wawo mambo wa Ijipiti.

² Farawo adakalipila manduna yake mawili. Nkulu waanyakupeleka vinyu nankulu waanyakuphika zingwa.

³ Adaayikha mujeli, munyumba yankulu waakhalilizi, mujeli mukhana Jozefi.

⁴ Nkulu waakhalilizi adayikha wanthuwo m'manja mwa Jozefi, adakhala kwakanthawe mujeli.

⁵ Usiku unango alanda wamambo wa Ijipiti awili wale, wakupeleka vinyu, nanyakuphika zingwa wamambo wa Ijipiti akhali mujeli adalota. Munango namunango maloto yake, loto lokha likhalewa bzakusiyana.

⁶ Jozefi paadafika kwayiwo mangwana yache machibese-bese, adawona kuti iwo niwakudodoma.

⁷ Nakutenepo iye adaabvunza manduna ya Farao waakhanawo mujeli yamunyumba mwabuya wake kuti, “Thangwe lanyi lelo nkhope zanu n'zakudodoma?”

⁸ Iwo adati kwa Jozefi, “Talota maloto, koma pasaya anilapanula.” Jozefi adati kwayiwo, “Ko kulapanula tulo sikun'choka kwa Mulungu? Ndaphata minyendo ndiwuzeni maloto yanu ndibve.”

⁹ Pamwepo nkulu waanyakupeleka vinyu adalongosolela Jozefi maloto yake, iye adati, “Ndawona muvayini patsogolo pangu,

¹⁰ ukhana mithayi mitatu. Masamba payadayamba kuphukila udayambambo kuchita maluwa, nkubala magilepisi yakutokota.

¹¹ Pamwepo komeshi ya Farawo ikhali m'manja mwangu. Ndidapsinyila nsuzu wamagilepisi mukomeshi ya Farawo, ndichipeleka komeshiyo m'manja mwa Farao.”

¹² Jozefi adati kwayiye, “Ibzi ndibzo bzabzinilewa, mithayi mitatu nintsiku zitatu.

¹³ Kumala kwantsiku zitatu, Farawo an'zakutsudzula achikubwezela pabasa lako lawukhachita pakuyamba lakupeleka vinyu kwamambo.

¹⁴ Koma undikumbukembo, bzikakufambila bwino, ndaphata minyendo, undichitilembo chifundo, ukandiyimililembo kwa Farawo kuti andibulisembo muno,

¹⁵ pakuti ine ndidachita bzakubewa kudziko laa Hebheru. Ine palilibe chandidachita kuti angandiyikhe mujeli.”

¹⁶ Tsapano nkulu waanyakuphika zingwa paadabva kulapanula kwa Jozefi kukhali kwabwino, iye adati, “Nayinembo pomwe ndalota maloto, ndidasenza mpsanda zitatu, zikhana zingwa.

¹⁷ Mumpsanda yapadzulu mukhana chakudya cha Farawo chakusiyana-siyana, koma chakudyacho chikhadyewa nambalami chili mumpsanda ikhali pansolo wangu.”

¹⁸ Jozefi adati, “Ibzi ndibzo bzinilewa maloto yako, mpsanda zitatu bzinilewa ntsiku zitatu.

¹⁹ Nkati mwa ntsiku zitatu, Farawo achakugwata nsolo, achikumangilila pamuti, mbalami zichizadya thupi lako.”

²⁰ Ntsiku yachitatu, mambo adachitila alanda wake feshita yakupembelela ntsiku yakubaliwa kwake. Paakhali padale adachemelesa nkulu waanyakupeleka vinyu nankulu waanyakuphika zingwa.

²¹ Adabwezela nkulu waanyakupeleka vinyu pabasa lake, achipeleka khomeshi m'manja mwa Farawo,

²² koma nkulu waanyakuphika zingwa adamangililiwa pamuti, kuyendelana nabzidalewedwa na Jozefi.

²³ Koma nkulu waanyakupeleka vinyu alibe kuzakumbuka Jozefi, adamuyebwelatu.