Kuyamba 39 - Bhukhu la Kuyamba

Jozefi nankazi wa Potifa

¹ Tsapano Jozefi adayendesewa ku Ijipiti, Potifa nduna ya Farawo, nkulu waakhalilizi, wachi Ijipiti adamugula kuchoka kwaa Ishimayeli awo adamuyendesa kumweko.

² Chawuta akhatsogolela Jozefi, nakutenepo Jozefi adasumukila paakhali munyumba mwambuya wake Potifa.

³ Mbuye wake adawona kuti Chawuta akhamutsogolela, pomwe kuti ndiye akhachitisa kuti iye asumukile pabzinthu bzake bzentse bzaakhachita.

⁴ Nakutenepo Jozefi adakomelewa ntima na Potifa kuti akhale mulanda wake, adazampasa basa lakumbayanganila munyumba mwake nabzinthu bzake bzentse bzaakhanabzo.

⁵ Kuchoka panthawe yaadamuchita nkulu wakunyanganila munyumba mwake nabzentse bzaakhanabzo, Chawuta adadalisa Potifa wachi Ijipiti nabzentse bzaakhanabzo kuphatanizila munda wake nathangwe la Jozefi.

⁶ Nakutenepo adayikha bzinthu bzake bzentse bzaakhanabzo m'manja mwa Jozefi; kukhala naye kwaadachita akhalibe basa nabzinango bzentse kunja kwachakudya basi. Tsapano Jozefi akhali wakukoma nkhope kwene-kwene, akhana chimilo chabwino.

⁷ Padapita kanthawe, nkazi wambuya wake adayamba kusilila Jozefi, nkuti kwayiye, “Gona nayine.”

⁸ Koma iye adalamba, adati kwankazi wambuya wake, “Nyanganani, anayine tenepa, mbuya wangu palibe chaaningopela, pakuti adayikha bzinthu bzentse m'manja mwangu;

⁹ panyumba pano palibe munango ana mphamvu kuposa ine; mambo wangu adandipasa mphamvu pabzinthu bzentse, kusiya kwayimwe basi, pakuti ndimwe nkazi wake; ningachitilenyi chinthu chakuyipa tenepo, ndichitazila Mulungu?”

¹⁰ Ne nkazi wa Potifa paadalewa-lewa na Jozefi ntsiku nantsiku, koma Jozefi alibe kubvuma kugona naye panango kukhala naye pafupi.

¹¹ Ntsiku inango, paadapita munyumba kaphata basa lake, alanda anango wentse pakhalibe.

¹² Nkazi wa Potifa adaphata chakubvala chake adati kwayiye, “Gona nayine.” Pamwepo Jozefi adapsukunyuka achisiya chakubvala chake m'manja mwankaziyo, iye nkubula panja.

¹³ Nkaziyo paadawona kuti Jozefi wathawa wasiya chakubvala chake,

¹⁴ iye adakuwilila kwaalanda akhaphata basa munyumba mwake, iye adati, “Wonani, mu Hebheru waadatibwelesela akufuna kutitazila, wapita munyumba mwangu achifuna kugona nayine, koma ine ndazakuwilila.

¹⁵ Pandakuwa ndipo pawathawa achibula panja, wasiya bzakubvala bzake.”

¹⁶ Pamwepo nkaziyo adayikha bzakubvala bza Jozefi kufikila mbuya wake wabwela.

¹⁷ Tsapano iye adalongosolela mwamuna wake nkhani ibodzi-bodziyo, adati, “Mulanda wachi Hebheru wamudatibwelesela pano akhafuna kundiphata.

¹⁸ Koma panthawe yandakuwa, wasiya bzakubvala bzake nkuthawa munyumba.”

¹⁹ Mbuye wake paadabva mafala yankazi wake yakuti, “Ibzi ndibzo bzandachitiliwa namulanda wanu” iye adakalipa nabzo kwene-kwene.

²⁰ Nakutenepo mbuya wa Jozefi adamuyikha mujeli, mukhayikhiwa akayidi wamambo, iyembo akhali mujeli.

²¹ Koma Chawuta adatsogolela Jozefi achimudalisa, adachita kuti wakunyangana mujeri amubvele chifundo.

²² Nkulu wamujeli adayikha Jozefi kuti anyanganile akayidi wentse akhali njelimo, nabzentse bzikhachitika mujelimo ndiye akhanyanganila.

²³ Nkuluyo alibe pomwe kumbazanyangana nabzamujelimo pakuti bzentse bzikhadayikhiwa m'manja mwa Jozefi, pakuti nthawe zentse Chawuta akhamutsogolela, achimusumusa pabzentse bzaakhachita.