Kuyamba 37 - Bhukhu la Kuyamba

Jozefi naakulu wake

¹ Jakobho akhakhala mudziko la Kenani, mukhakhala apayi wake ninga mulendo.

² Iyi ndiyo nkhani ya Jakobho nabanja lake. Jozefi paakhana magole khumi nanomwe, akhabusa mabila pabodzi naakulu wake wana wa Bhiliha na Zilipa akazi waapayi wake. Koma Jozefi akhawuza apayi wake bzakuyipa bzikhachitiwa naakulu wake.

³ Tsapano Izraeli akhafuna Jozefi kuposa wana wake anango wentse, pakuti nimwana waadabala wakalamba. Adamusonela chakubvala chitali chamanja matali.

⁴ Koma akulu wake paadawona kuti apayi wawo akhafunisisa Jozefi kuposa anango wentse, adamuzonda, adaleka kulewa-lewa naye bwino.

⁵ Ntsiku inango Jozefi adalota maloto, paadawuza akulu wake malotoyo, iwo adamuzondelatu kwakupitiliza.

⁶ Iye adati kwayiwo, “Tetekelani maloto yandalota,

⁷ ise tikhali m'munda tichimanga mitolo yatiligu, pamwepo ndidawona ntolo wangu udayima kuti dzololo, pamwepo mitolo yanu idabwela kuzayima kuzungunuka idakotamila ntolo wangu.”

⁸ Akulu wake adati kwayiye, “Iwe unachadidi kuti un'zatitonga tentse? Panango kuti uzatitonga tentse.” Nakutenepo iwo adamuzondelatu nathangwe yamaloto yake namafala yake.

⁹ Jozefi adalota pomwe yanango maloto, nkuwuza akulu wake, iye adati, “Ndalota pomwe maloto yanango, ndawona dzuwa namwezi nanyenyezi khumi nayibodzi bzichindikotamila.”

¹⁰ Koma paadawuza apayi wake naakulu wake, apayi wake adamutsimula, iwo adati, “Ko nimaloto yanshowo wanyi yamweyo? Ko ukulewa kuti chadidi ine naamayi wako naakulu wako tin'zakukotamila?”

¹¹ Pamwepo akulu wake adaphatiwa nanchanje, koma apayi wake adayikha bzaadalewa muntima mwawo.

Kugulisiwa kwa Jozefi nakuyendesewa kwake ku Ijipiti

¹² Ntsiku inango akulu wa Jozefi adayenda ku Shekemu kabusa mabila yaapayi wawo.

¹³ Tsapano Izraeli adati, kwa Jozefi, “Ko akulu wako saali kubusila bzifuwo ku Shekemu? Bwela, ninfuna kukutuma ku kwayiwo.” Iye adati, “Ndili pano.”

¹⁴ Apayi wake adati, “Ndaphata minyendo, yenda kwaakulu wako kwaakubusila mabila ukawone kuti ali tani, uzandiwuze kuti bzilitani.” Nakutenepo Jakobho adamutuma kuchoka mugowa la Hebhuroni kuyenda ku Shekemu.

¹⁵ Munthu adamuwona achifamba-famba nthengo. Munthuyo adam'bvunza kuti, “Ko ukupsaganyi?”

¹⁶ Jozefi adati, “Ndikupsaga akulu wangu, ndaphata minyendo, mungandiwuzeko kwaali kubusila bzifuwo bzawo?”

¹⁷ Mwamunayo adati, “Ayenda, koma ndaabva adati tiyendeni ku Dhotani.” Jozefi adazaateyela achikaawona ali ku Dhotani.

¹⁸ Adamuwona ali patali, iye anati wafika iwo nkuyamba kupangana kuti amuphe.

¹⁹ Iwo adati, “Nyanganani nyakulota ule wabwela.

²⁰ Ngatimupheni timuthuse mudindi, apayi akakatibvunza tinkati, ‘Adadyewa nanyama zan'thengo, tiwone kuti maloto yake yan'zathandizanyi.’ ”

²¹ Koma Rubheni paadabzibva adapulumusa Jozefi kuchoka m'manja mwawo, iye adati kwayiwo, “Ngatileke kumupha.”

²² Rubheni adati kwayiwo, “Lekani kumupha? Muthuseni mudindi lili muno muchipululu. Ngapaleke kuwoneka an'chita chakuyipa payiye.” Adalewa tenepo achifuna kumuchiza, kuti azam'bweze kwaapayi wake.

²³ Nakutenepo Jozefi paadafika pakhana akulu wake, adam'bvula chakubvala chake chamanja matali chaakhabvala.

²⁴ Adam'phata achimuthusa mudindi, dindi limwelo likhadawuma likhalibe madzi.

²⁵ Tsapano akulu wa Jozefi adazakhala pantsi achidya, ali pakudya tenepo adawona wanthu wachi Ishimayeli akhachoka ku Giliyadhi achiyenda ku Ijipiti, nangamela zawo zikhadatakula bzakudzola bzakununkhila nagamu nabhali namura.

²⁶ Judha adati kwaabale wake, “Ko bzintithandizanyi kupha mung'ono wathu tichibisa gazi lake?

²⁷ Ngatimuguliseni kwaa Ishimayeli, ngatileke kumpweteka pakuti ning'ono wathu, ndise wagazi libodzi.” Akulu wake naang'ono wake adamutetekela.

²⁸ Nakutenepo a anyamalonda wachi Midhiyani adapita napamwepo, adabulisa Jozefi mudindi, achimugulisa kwaa Ishimayeli namasheleni yasiliva makumi mawili, adatola Jozefi nkuyenda naye ku Ijipita.

²⁹ Rubheni paadabwelela kudindi, nkuwona kuti Jozefi mulibe, adang'amba bzakubvala bzake.

³⁰ Adabwelela kwaabale wake, adati kwayiwo, “Ndawona mudindi Jozefi mulibe! Ko niniyenda kuponi ine!”

³¹ Pamwepo iwo adapha mbuzi nkunyika chakubvala cha Jozefi mugazi lambuziyo.

³² Adatola chakubvala chake nkuyenda nacho kwaapayi wawo kwadakati, “Ibzi ndibzo bzatawona; wonani, ko nchakubvala lini chamwana wanu ichi?”

³³ Jakobho adachidziwa, iye adati, “Nchakubvala chamwana wangu, adatodyewa nabzinyama bzan'thengo. Jozefi adatong'ambiwa-ng'ambiwa!”

³⁴ Pamwepo Jakobho adang'amba bzakubvala bzake. Adabvala masakha achilila mwana wake kwantsiku zizinji.

³⁵ Wana wake wentse wachimuna nawachitsikana adayesa kumunyamaliza, koma alibe kukwanisa kumunyamaliza, iye adati, “Nee niniyenda kumbuto yawanthu wakufa kuna mwana wangu ndichilila.” Nakutenepo apayi wake adamulila.

³⁶ Nthawe imweyo a Midhiyani adakagulisa Jozefi ku Ijipiti kwa Potifa, nduna yamambo Farawo, nkulu waakhalilizi.