Kuyamba 32 - Bhukhu la Kuyamba

Jakobho ankonzeka kagumana na Esau

¹ Jakobho adayenda ulendo wake, ngilozi za Mulungu zidagumana naye;

² Jakobho paadaziwona adati, “Iyi ninkhondo ya Mulungu.” Nakutenepo mbuto imweyo adayipasa dzina lakuti Mahanayimu.

³ Jakobho adatuma atumiki patsogolo pake kwankulu wake Esau uyo akhakhala mumbuto ya Seyiri mudziko la Edhomu,

⁴ achiwawuza kuti, “Yendani kwa Esau mbuya wangu mukamuwuze kuti, ‘Mulanda wanu Jakobho wati, ndidakhala kwa Labhani kwandikhakhala kufika lelo,

⁵ ndina ng'ombe namadhonki namabila nambuzi naalanda wachimuna nawachikazi. Tsapano ndatuma atumiki kwayimwe mbuya wangu kuti mundikomele ntima.’ ”

⁶ Atumiki adabwelela kwa Jakobho, achikati, “Tidafika kwankulu wanu Esau. Tsapano iye akubwela kuzagumana nayimwe, ana wanthu mazana manayi.”

⁷ Jakobho paadabva mafalayo adabva mantha kwene-kwene achishupika. Iye adapatula wanthu waakhanawo namabila mubzipani bziwili,

⁸ achikumbuka kuti, “Peno Esau anfika achimenya chipani chibodzi, chinango chipani chinthawa.”

⁹ Jakobho adati, “Mulungu waayavu wangu Abhurahamu, Mulungu waapayi wangu Isaki, imwe Chawuta ndimwe mudati kwayine, ‘Bwelela kudziko lako, kudziko laabale wako. Mudati bzinthu bzentse bzininfambila bwino.’

¹⁰ Pakuti ine ndikhafunika lini kuwona ntsisi nachikhulupililo chentse chamudawonesa mulanda wanu. Pandidayambuka Jorodhani ndikhana mpsimbo basi, tsapano ndakhala bzipani bziwili.

¹¹ Ndaphata minyendo yanu, ndipulumuseni m'manja mwankulu wangu Esau. Ndikugopa, pakuti angafike achitipha tentse, azikazi nawana.

¹² Koma imwe mudati, ‘Nin'zakuchitila bzabwino, ndichizachita kuti m'badwe wako uzawande ninga n'chenga wamunyanja, an'zawanda bzakusaya kuwelengeka.’ ”

¹³ Nakutenepo Jakobho adagona pamwepo usiku umwewo. Mangwana yache adasankhula pabzaakhanabzo achibzipeleka mpfupo kwankulu wake Esau,

¹⁴ mbuzi zikazi adachosa mazana mawili, mbuzi zikono makumi mawili, mabila makazi mazana mawili namikono yamabila makumi mawili,

¹⁵ nangamela zikazi makumi matatu nabziwana bzayene nang'ombe zikazi makumi manayi namikono yang'ombe khumi, namadhonki makazi makumi mawili namikono yamadhonki khumi.

¹⁶ Jakobho adayikha bzifuwobzo m'manja mwaalanda wake, ntiti nantiti ukhali pawene wokha. Iye adati kwaalanda wake, “Imwepo muyende patsogolo pangu nabzifuwo, koma pakhale nambuto pakati pantiti unango nawunango.”

¹⁷ Adawuza akhana chipani chapatsogolo kuti, “Mukagumana nankulu wangu Esau, akakubvunzani kuti, ‘Ndimwe alanda wayani? Ko mukuyenda kuponi? Ko bzifuwo bzamunabzo m'bzayani?’

¹⁸ Imwe munkati, ‘M'bzamulanda wanu Jakobho, nimpfupo zatumiziwa kwa mbuya wangu Esau, iye ali kuteyela m'mbuyo mwathu.’ ”

¹⁹ Adawuza bzibodzi-bodzi kuchipani chachiwili nachachitatu nawentse akhateyela mbuyo kuti, “Mukagumana na Esau munkamuwuze bzibodzi-bodzibzo,

²⁰ imwe munkati, ‘Mulanda wanu Jakobho akuteyela mbuyo.’ ” Iye adakumbuka kuti, “Panango ningampembze nampfupo zaninintumiza ndichikawonana naye panango achikanditambila.”

²¹ Nakutenepo, adatumila mpfupo patsogolo pake, iye achisala usiku umwewo ali pansasa.

Jakobho an'chita mabimbili na Mulungu pa Penuyeli

²² Usiku umwewo Jakobho adasumuka, nkutola azikazi wake awili, naalandakazi wake awili nawana wake khumi naam'bodzi nkuyambuka kamadzi ka Jabhoko.

²³ Adaayambusa kamadzi achiyambusambo pomwe bzinthu bzake bzentse bzaakhanabzo,

²⁴ koma Jakobho adasala pamwepo ali yekha. Pamwepo adachita mabimbili namunango mwamuna mpaka kumadandakucha.

²⁵ Mwamunayo paadawona kuti wataza kukunda Jakobho, adam'menya nampsimbo yake panchafu, iye nkubzuguduka bondo.

²⁶ Mwamunayo nkuti, “Ndileke ndiyende pakuti nkumadandakucha!” Koma Jakobho adati, “Ninkuleka lini uchiyenda ulibe kundidalisa.”

²⁷ Mwamuna umweyo adati, “Ko dzina lako ndiwe yani.” Iye adati, “Ndine Jakobho!”

²⁸ Mwamuna ule adati, “Kuyambila lelo uchachemelewa lini kuti Jakobho, waakuchemelewa kuti Izraeli, pakuti wachita mabimbili na Mulungu nawanthu uchikunda.”

²⁹ Jakobho adati, “Ndaphata minyendo, ndiwuzembo dzina lako.” Mwamunayo adati, “Thangwe lanyi unfuna kudziwa dzina langu?” Pamwepo adamudalisa.

³⁰ Mbuto imweyo Jakobho adayipasa dzina lakuti Penuyeli adati, “Ndawonana na Mulungu maso namaso, koma ndilibe kufa.”

³¹ Jakobho paakhachoka mu Penuyeli dzuwa likhatochoka, koma iye akhagwinthama pakuti akhadabzuguduka mwendo wake.

³² Ndibzo bzidazachitisa kuti a Izraeli aleke kudya midzipe yamunchafu mpaka lelo. Pakuti mwamunayo adamenya Jakobho pabondo yapanchafu.