Kuyamba 28 - Bhukhu la Kuyamba

¹ Pamwepo Isaki adachemela Jakobho nkumudalisa, adati kwayiye, “Leka kuloola nkazi wachi Kenani.

² Yenda, ku Padhanamu kunyumba kwa Bhetuyeli apayi waamayi wako, ukaloole kumweko m'bodzi wawana wa Labhani mano waamayi wako.

³ Mulungu Nyam'phamvu zentse ngaakudalise akupase wana azinji, kuti m'badwe wako uwande ukhale nawanthu azinji.

⁴ Ngaapeleke madaliso ya Abhurahamu kwayiwe, nakum'badwe wako, kuti azatole dziko lawukukhala ninga mulendo, lidapasiwa Abhurahamu na Mulungu.”

⁵ Nakutenepo Isaki adayendesa Jakobho ku Padhanaramu, kwa Labhani mwana wa Bhetuyeli mu Aramu, mano wa Rabheka, amayi wa Jakobho na Esau.

Esau aniloola munango nkazi

⁶ Tsapano Esau adadziwa kuti Jakobho adadalisiwa, achimuyendesa ku Padhaniramu kuti akaloole kumweko, paadamudalisa adamuwuza kuti, “Leka kuloola nkazi wachi Kenani.”

⁷ Esau adadziwa kuti Jakobho adatetekela apayi wake naamayi wake nkuyenda ku Padhaniramu.

⁸ Pamwepo Esau adadziwa kuti apayi wake akhafuna lini akazi wachi Kenani.

⁹ Pamwepo Esau adazayenda kukhana Ishimayeli mwana wa Abhurahamu, kwaadakaloola mwana wake wachitsikana akhachitiwa Mahalati nana wa Nebhayoti.

Maloto ya Jakobho pa Bheteli

¹⁰ Jakobho adachoka pa Bheeri-shebha nkuyenda ku Harani.

¹¹ Paadafika pambuto inango, adagona pamwepo usiku umwewo. Jakobho adatola mwala wachilemela pambuto imweyo, adatsamila nkugona.

¹² Paakhadagona tenepo, adalota pachita mathambiko, yakhadayimisiwa padziko, yachifika kudzulu. Adawona ngilozi za Mulungu zichikwila nakubuluka pamathambikoyo.

¹³ Chawuta akhadayima padzulu pamathambiko yamweyo, iye adati, “Ndine Chawuta, Mulungu waapayi wako Abhurahamu na Mulungu wa Isaki, mbuto yawudagona ndayipasa kwayiwe nawana wako.

¹⁴ M'badwe wako un'zawanda kulingana napfumbi lapadziko. An'zamwazikila kumadziko yentse yakumabveladzuwa nayakumadokelo kufika nachakudzulu mpaka kunyantsi. Wanthu wentse an'zadalisiwa nathangwe lako iwe nam'badwe wako.

¹⁵ Wona, ndina iwe, nin'zakuchinjiliza kwentse kwawun'zayenda. Nin'zakubwezela pomwe mudziko lino. Nin'zakusiya lini mpaka ndachita bzandidalewa kwayiwe.”

¹⁶ Jakobho adapalamuka kutulo nkuti, “Chawuta ali pambuto ino, koma ine ndikhalibe kudziwa.”

¹⁷ Pamwepo iye adaphatiwa namantha nkuti, “Mbuto ino in'gopsa! Infunika kukhala nyumba ya Mulungu. Uwu ninsuwo wakudzulu!”

¹⁸ Nakutenepo Jakobho adalamuka machibese-bese, nkutola mwala wachilemela waakhadatsamila nkuwuyimisa nkuthulula mafuta padzulu pawene.

¹⁹ Mbuto imweyo adayipasa dzina lakuti Bheteli, koma dzina laguta limwelo likhali Luzi pakuyamba.

²⁰ Tsapano Jakobho adalumbila adati, “Mulungu akanditsogolela, akandichinjiliza pawulendo wangu wandikuyenda, akandipasa chakudya nabzakubvala,

²¹ ndichibwelela pomwe kumuyi kwaapayi wangu mwan'delekho, Chawuta an'zakhala Mulungu wangu.

²² Mwala wachilemela uwu, wandayimisa, pan'zakhala nyumba ya Mulungu, nin'zapeleka chakhumi pabzentse bzamun'zandipasa.”