Kuyamba 23 - Bhukhu la Kuyamba

Sara adafa Abhurahamu angula manda

¹ Sara adakhala wamoyo kwamagole dzana namakumi mawili nanomwe (127). Yamweya ndiyo magole yadalalama Sara.

² Sara adazafela mu Kiriyati-aribha iyo ikhachemelewa pomwe kuti Hebhuroni, mudziko la Kenani. Kumweko Abhurahamu adakalila nkazi wake.

³ Pamwepo Abhurahamu adasiya chitanda chili munyumba nkuyenda kwaa Hiti kwaadakati,

⁴ “Ine ndine mulendo mudziko lino landikukhala pakati panu, ndipaseniko mbuto kuti ikhale manda, kuti ndikayikhe nkazi wangu kumweko.”

⁵ Wanthu wachi Hiti adati kwa Abhurahamu,

⁶ “Mbuye wathu, tetekelani kwayise, imwe ndimwe wakulemekezeka pakati pathu. Sankhulani mbuto yabwino yamungawone nkati mwamanda yathu, palibe munango wathu angakulambizeni manda yake, panango kukulambizani kuyikha chitanda chanu.”

⁷ Pamwepo Abhurahamu adasumuka nkukotama pantsi, achiwonesa ulemu kwaa Hiti, wanthu wambuto imweyo.

⁸ Iye adati kwayiwo, “Peno imwe mwabvuma kuti ndikayikhe nkazi wangu, tsapano ndiwuzilenimbo Efuroni mwana wa Zofari,

⁹ kuti andipase mphako yapa Makipera chakumbali kwamunda wake. Ninimpagali masheleni yaaninga walewa mwentse muchiwona, kuti ndikhalembo nambuto yangu yakuyikha wanthu wangu akafa.”

¹⁰ Tsapano Efuroni akhadakhala pakati paa Hiti, pamwepo Efuroni mu Hiti adadayila Abhurahamu a Hiti wentse achibva, awo wentse akhadapita napansuwo waguta.

¹¹ Iye adati, “Nee, mbuya wangu, nditetekeleni, ninkupasani munda namphako ili m'mwemo kuti bzikhale manda yanu. Ine ndaakukupasani wanthu wentse achibva, tsapano kayikheni chitanda chanu.”

¹² Pamwepo Abhurahamu adakotama pantsi patsogolo pawanthu wamudziko limwelo.

¹³ Iye adadayila Efuroni wanthu wentse wamudziko limwelo achibva, iye adati, “Ndaphata minyendo, ine ninkupasani masheleni yakugula mandayo, tambilani kuchitila kuti ndikwanise kuyikha wanthu wangu kumweko akafa.”

¹⁴ Efuroni adati kwa Abhurahamu,

¹⁵ “Mbuye wangu, ibvani, mbuto imweyi in'guliwa namasheleni yasiliva mazana manayi (400) basi, n'chinyi kwamunthu ninga iwe nayine? Imwe Yendani mukayikhe chitanda chanu.”

¹⁶ Pamwepo Abhurahamu adabvana na Efuroni achimpasa masheleni yaadalewa, adampasa masheleniyo wanthu wentse achibva. Adapagali masheleni yamasiliva mazana manayi (400) kuteyeza mphimo yaanyamalonda.

¹⁷ Nakutenepo munda wa Efuroni waku Makipela chakumabveladzuwa kwa Mamure, munda namphako ikhali m'mundamo namiti yentse ikhali pamwepo,

¹⁸ bzidapasiwa Abhurahamu kuti bzikhale bzake, ibzi bzidachitika a Hiti awo wentse akhadapita napansuwo waguta achibva.

¹⁹ Pambuyo payibzi, Abhurahamu adayikha nkazi wake Sara m'mphako yaku Makipera, chakumabveladzuwa kwa Mamure, iyo ikhachemelewa pomwe kuti Hebhuroni, mudziko la Kenani.

²⁰ Munda namphako ikhali m'mwemo bzidapelekewa kwa Abhurahamu naa Hiti kuti ikhale mbuto yakuyikha wanthu.