Kuyamba 22 - Bhukhu la Kuyamba

Isaki ampelekewa ntsembe

¹ Pambuyo payibzi, Mulungu adayesa Abhurahamu, adati kwayiye, “Abhurahamu,” iye adati, “Ndili pano.”

² Mulungu adati, “Tola mwana wako Isaki, umweyo m'bodzi yekha wawunfuna uyende naye kudziko la Moriya, ukamuchite mpfupo yakutenthelatu kuphili landiti ndikuwuze.”

³ Mangwana yache machibese-bese Abhurahamu adayikha chakukhalila padhonki lake, nkutola alanda wake awili namwana wake wachimuna Isaki. Adatema nkhuni zakukatenthesa ntsembe, adasumuka nkuyenda kumbuto yaakhadawuziwa na Mulungu.

⁴ Ntsiku yachitatu Abhurahamu adanyangana nkuwona mbuto patali.

⁵ Pamwepo Abhurahamu adati kwaalanda wake, “Imwe salani pano nadhonki ili, ine namwana tikuyenda kapemphela kumbuto iyo yamukuwona, tichizabwelela bzathu.”

⁶ Abhurahamu adatakulisa mwana wake Isaki nkhuni zakukatenthesa ntsembe, iye adatakula moto nachisu, wentse ali awili nkuyenda.

⁷ Isaki adati kwaapayi wake Abhurahamu, “Apayi!” Iye adati, “N'chinyi mwanangu.” Iye adati, “Moto nankhuni tinabzo, ko bila lakukapeleka ntsembe lili kuponi?”

⁸ Abhurahamu adadayila, “Mulungu ndiye ankawona bila lakukapeleka ntsembe, mwanangu.” Nakutenepo wentse ali awili adayenda bzawo.

⁹ Paadafika pambuto yaakhadawuziwa na Mulungu, Abhurahamu adamanga mbuto yakupelekela ntsembe pamwepo, nkulongapo nkhuni. Adamanga mwana wake nkumugonesa padzulu atali padzulu pankhuni.

¹⁰ Pamwepo Abhurahamu adapfuthula janja lake kutola chisu kuti aphe mwana wake.

¹¹ Koma ngilozi ya Chawuta idamuchemela kuchoka kudzulu, idati kwayiye, “Abhurahamu, Abhurahamu.” Iye adati, “Ndili pano.”

¹² Ngilozi idati, “Leka kupfuthula janja lako pamwana, panango kuchita chinthu chili chentse payiye, tsapano ine ndawona kuti iwe un'gopa Mulungu, pakuti iwe ulibe kulamba kundipasa mwana wako m'bodzi yekha.”

¹³ Abhurahamu adanyangana-nyangana nkuwona nkono wabila udaphatiwa nyanga muchidzambwa. Nakutenepo Abhurahamu adakatakula bilayo, achimpeleka mpfupo yakutenthelatu pambuto pamwana wake.

¹⁴ Abhurahamu adapasa mbutoyo dzina lakuti, “Chawuta an'zawona.” Nalelo mbutoyo in'chemelewa kuti, “Paphili la Chawuta an'zawona.”

¹⁵ Pamwepo ngilozi ya Chawuta idachemela Abhurahamu kachiwili kuchoka kudzulu, idati,

¹⁶ “Chawuta wati, ‘Ninilumbila nadzina langu,’ pakuti iwe wanditetekela, ulibe kulamba kupeleka mwana wako m'bodzi yekha.

¹⁷ Nin'zakudalisa, nin'zawandisa m'badwe wako ninga nyenyezi zakudzulu, pomwe ninga n'chenga wamunyanja. M'badwe wako un'zakunda azondi wawo.

¹⁸ Kupitila mum'badwe wako, mishowo yentse yapadziko in'zadalisiwa, pakuti wanditetekela.”

¹⁹ Nakutenepo Abhurahamu adabwelela kwaakhadasiya alanda wake, adasumuka nkubwelela ku Bheeri-shebha kwaakhakhala, Abhurahamu adakhala mu Bheeri-shebha.

M'badwe wa Nahori

²⁰ Pambuyo payibzi, Abhurahamu adazawuziwa kuti, “Milika adabalila m'bale wake Nahori wana.”

²¹ “Wakuyamba akhali Uzi, kuchizabwela Bhuzi m'bale wake, na Kemueli payi wa Aramu,

²² kuchizabwela Kesedhi na Hazo na Piridhashi na Jidhirafu na Bhetuyeli.”

²³ Bhetuyeli adakhala apayi wa Rabheka. Awa wana asele adabaliwa na Milika nkazi wa Nahori, m'bale wa Abhurahamu.

²⁴ Nkazi wapambali Nahori akhachemelewa Rehuma uyo adabala Tebha na Gahamu na Tahashi na Maaka.