Kuyamba 21 - Bhukhu la Kuyamba

Kubaliwa kwa Isaki

¹ Chawuta adadalisa Sara ninga kulewa kwaadachita, pomwe Chawuta adachita kwa Sara bzaakhadatsimikiza.

² Sara adaphata pathupi nkubalila Abhurahamu mwana wachimuna, panthawe yaakhadakalamba, panthawe ikhadalewedwa na Mulungu kuti an'zabadwa.

³ Abhurahamu adapasa dzina mwana waadabaliliwa na Sara lakuti Isaki.

⁴ Abhurahamu adagwata nyama yakhanda yachimuna mwanayo paakhana ntsiku zisele, kuteyeza bzaadawuziwa na Mulungu.

⁵ Abhurahamu akhana magole dzana Isaki paadabadwa.

⁶ Pamwepo Sara adati, “Mulungu wachita kuti ndikondwe ndiseke, koma wentse an'zabva nabzakubala kwangu an'zandiseka.”

⁷ Nakutenepo iye adazati, “Ko mbani akhadalewa kwa Abhurahamu kuti Sara angayamwise mwana? Koma ine ndam'balila mwana wachimuna kuwunkhalamba wake.”

⁸ Mwana adazakula nkumulekesa nkaka. Ntsiku yaadamulekesa nkaka, Abhurahamu adamuchitila feshita ikulu.

Hagari na Ishimayeli an'thamangisiwa

⁹ Ntsiku inango Sara adawona Ishimayeli mwana wachimuna wa Hagari mu Ijipiti, waadabalila Abhurahamu, achinyomba mwana wake Isaki.

¹⁰ Pamwepo Sara adati kwa Abhurahamu, “Thamangisa mulandakazi uyu namwana wake, pakuti mwana wamulanda uyu anfunika lini kuzadya nthaka pabodzi namwana wangu Isaki.”

¹¹ Ibzi bzidawawa Abhurahamu pakuti Ishimayeli akhali mwana wake pomwe.

¹² Koma Mulungu adati kwa Abhurahamu, “Leka kuwawidwa nabzamwana uyu namulandakazi wako Hagari. Iwe chita bzawawuziwa na Sara, pakuti ndidatsimikiza kale kuti m'badwe wako un'zachemelewa nadzina la Isaki.

¹³ Nin'zachitambo pomwe mwana wamulandakazi wako nshowo ukulu, pakuti iye nim'badwe wako pomwe.”

¹⁴ Mangwana yache Abhurahamu adalamuka machibese-bese nkutola zingwa nachola chakhanda chamadzi, nkubzipeleka kwa Hagari, adam'belekesa mwana wake, achimuwuza kuti ayende bzake. Hagari adasumuka nkuyenda achindozungayila muchipululu chamu Bheeri-shebha.

¹⁵ Madzi yakhali muchola payadamala Hagari adayikha mwana munyantsi mwachidzambwa.

¹⁶ Pamwepo iye adayenda, adakakhala patali pang'ono mamita dzana, adakumbuka chamuntima nkuti, “Ninfuna lini kuwona kufa kwamwana wangu.” Adakhala pamwepo achiwongota.

¹⁷ Mulungu adabva kulila kwamwana ule, ngilozi ya Mulungu idachemela Hagari ili kudzulu, idati kwayiye, “N'chinyi chakushupa, Hagari? Leka kugopa pakuti Mulungu wabva kulila kwamwana wako.

¹⁸ Sumuka takula mwana wako, umuphate m'manja, pakuti ine nin'zachita kuti nshowo wake uwe ukulu.”

¹⁹ Pamwepo Mulungu adamufungula maso, iye nkuwona n'chela wamadzi. Hagari adayenda katunga madzi nkudzadza chola chake nkumwesa mwana wakeyo.

²⁰ Mulungu adatsogolela Ishimayeli, iye adakula achikhala muchipululu, adazawa nyabezi wakupha nyama nawutati.

²¹ Akhakhala muchipululu chamu Parani, amayi wake adazamuloolela nkazi wachi Ijipiti.

Chibvano cha Abhurahamu na Abhimeleki

²² Nthawe imweyo Abhimeleki na Fikoli nkulu wankhondo yake adayenda kwa Abhurahamu, achikati, “Ndawona kuti Mulungu anayiwe pabzinthu bzako bzentse bzawun'chita.

²³ Tsapano iwepo lumbila kwayine mudzina la Mulungu kuti un'zandinamiza lini, ne nakum'badwe wangu wentse. Koma Ine ndawonesa kukhulupilika kwangu kwayiwe, nayiwembo pomwe uwonese kukhulupilika kwako kwayine nakudziko lawukukhala.”

²⁴ Abhurahamu adati, “Ine ninilumbila.”

²⁵ Abhurahamu paadadandawulila Abhimeleki nabzan'chela ukhadapambiwa naalanda wake,

²⁶ Abhimeleki adati, “Nin'dziwa lini kuti mbani adachita bzimwebzo, ine ndilibe kubzibva mpaka lelo.”

²⁷ Nakutenepo Abhurahamu adatola mabila nang'ombe achibzipasa Abhimeleki, amuna awiliwo adachita chibvano.

²⁸ Abhurahamu adapatula wana wamabila akazi anomwe, achiwayikha pambali.

²⁹ Abhimeleki adati kwa Abhurahamu, “Ko wana wamabila akazi anomwe wawapatulawa anilewanyi.”

³⁰ Abhurahamu adati, “Tambila wana wamabila awa anomwe, kuti ukhale mboni yangu kuti ndine ndidachela n'chelawu.”

³¹ Nakutenepo mbuto imweyo ikhachemelewa kuti Bheeri-shebha, pakuti iwo ali awili adalumbila.

³² Paadamala kuchita chibvano pa Bheeri-shebha, Abhimeleki na Fikoli nkulu wankhondo, adabwelela kudziko lawo laa Filisitiya.

³³ Abhurahamu adabzala muti wamutamarisiki pa Bheeri-shebha, nkupemphela Chawuta Mulungu wachikhalilo.

³⁴ Abhurahamu adakhala mudziko laa Filisitiya kwanthawe itali.