Kuyamba 19 - Bhukhu la Kuyamba

Kutaza kwa Sodhomu na Gomora

¹ Ngilozi ziwili zidabwela ku Sodhomu chakumawulo, pamwepo Loti akhadakhala pansuwo wa Sodhomu. Loti paadawona, adayenda kagumana nawo, adakotama pantsi,

² iye adati, “Azimbuye wangu, ndaphata minyendo, bwelani kunyumba kwamulanda wanu, mukagone kumweko usiku walelo, mukasambe nzayo zanu, muchizalamuka machibese-bese muchiyenda ulendo wanu.” Koma iwo adati, “Nee, tinkagona pansika.”

³ Koma iye adaatsungiliza bzakulimba, mpaka iwo adazabwelela nkuyenda kapita munyumba mwake. Adaakonzela feshita, adakonza zingwa ilibe chakufutisa, iwo nkudya.

⁴ Koma iwo anati agona, amuna wamuguta, amuna wamu Sodhomu, akulu naang'ono nawanthu wentse, adazungunuka nyumbayo;

⁵ adachemelela kwa Loti adati, “Ali kuponi amuna abwela kwayiwe usiku? Abulise pano panja kuti tigone nawo!” Pamwepo amuna wamu Sodhomu akhafuna kugona nawo.

⁶ Nakutenepo Loti adabula panja pakhana amunawo, nkufunga nsuwo.

⁷ Adati kwayiwo, “Ndaphata minyendo, abale wangu, lekani kuchita chinthu chakuyipa tenepa.

⁸ Wonani, ndina wana wangu awili wachikazi anati adziwa amuna; lekani ndiwabwelese kwayimwe, muchite nawo bzamunfuna. Lekani kuchita chinango chinthu kwaamuna awa, pakuti mbaalendo wangu.”

⁹ Koma iwo adati, “Choka apa!” Adati, “Uyu nimulendo muno, koma waakufuna kutonga! Tsapano taakukuphata mwadima kuposa iwo.” Pamwepo iwo adagwinya Loti achiyesa kuphwanya nsuwo kuti apite nkati.

¹⁰ Koma amuna awili wale adakwekwetela Loti nkati nkufunga nsuwo.

¹¹ Iwo adaachita kuti wanthu wentse akhali pansuwo wanyumba achite azimola, wentse akulu naang'ono, bzakuti adashupika, akhachita bzakupsapsadzila nsuwo.

Loti an'choka mu Sodhomu

¹² Tsapano amuna awiliwo adati kwa Loti, “Ko iwe una anango wakwako muguta lino? Akuwasa, wana wachimuna, wana wachikazi panango munango wawunaye muguta, uwachose mumbuto ino;

¹³ pakutiife taakuphwanya mbuto ino, pakuti kulila kwawanthu kwakula patsogolo pa Chawuta, iye watituma kuti tizaliphwanye.”

¹⁴ Loti adayenda kwaakuwasa wake awo akhali kuzaloola wana wake wachikazi, iye adati kwayiwo, “Chokani mumbuto ino, pakuti Chawuta waakuphwanya guta lino.” Koma akuwasa wake adawona ninga akundoseka nawo.

¹⁵ Nachakumadandakucha machibese-bese, ngilozizo zidati kwa Loti, “Sumuka utole nkazi wako nawana wako uyende, kuti uleke kufa pan'zalangiwa guta.”

¹⁶ Koma Loti, pakuti akhachedwa, adatochita bzakum'phata janja achim'bulisa muguta pabodzi nankazi wake, nawana wake wachikazi awili. Chawuta adamubvela chifundo, amunawo adamuchosa achim'bulisa kunja kwaguta.

¹⁷ Paadaabulisa kunja kwaguta inango gilozi idati, “Thawani muyende, lekani kuchewuka panango kuyima, muthawile kuphili kuti muleke kuchenekeka!”

¹⁸ Koma Loti adati kwayiwo, “Nee, azimbuye wangu.

¹⁹ Wonani, pakuti mwakomela ntima mulanda wanu, mwawonesa chifundo chikulu pakuchiza umoyo wangu; koma ningathawile lini kumapili, pakuti ngozi imweyi intiphata tinati tafika kumweko, tichifa.

²⁰ Wonani, pana guta lili pafupi kuti tingathawileko, nikaguta kang'ono, lekani ndithawile kumweko, ko sikaguta kang'ono kale? Umoyo wangu un'chiziwa.”

²¹ Ngilozi idati, “Ninkuthandiza pomwe nayibzi, nimphwanya lini guta lawalewa.

²² Kamangu thawila kumweko; pakuti ninkwanisa lini kuchita chinango chinthu unati wafika kumweko.” Nakutenepo Guta limwelo adalipasa dzina lakuti Zoari.

Kuphwanyiwa kwa Sodhomu na Gomora

²³ Loti paadafika ku Zoari dzuwa likhatobula.

²⁴ Pamwepo Chawuta adabvumbisa moto wasalufa muguta la Sodhomu na Gomora kuchoka kwa Chawuta kudzulu.

²⁵ Adaphwanya maguta yentse, nachigowa chentse nawanthu wentse wamugutalo, nambewu zentse zaakhadabzala padziko.

²⁶ Koma nkazi wa Loti akhateyela mbuyo, adachewuka nkusanduka chulu chamunyu.

²⁷ Abhurahamu adalamuka machibese-bese nkuyenda pambuto paakhadayima na Chawuta.

²⁸ Adanyangana ku Sodhomu na Gomora namuchigowa chamudziko lentse, adawona utsi uchichoka m'maguta yentse, ninga moto ukuchoka mubhayela.

²⁹ Koma Mulungu paadaphwanya maguta yamuchigowa mukhakhala Loti, iye adazakumbuka Abhurahamu, nakutenepo adazabulisa Loti kuti aleke kufa.

Kudachoka mishowo yaa Moabhi naa Amori

³⁰ Loti adazachoka mu Zoari, achikakhala m'mapili, pabodzi nawana wake awili wachikazi, pakuti akhagopa kukhala mu Zoari, nakutenepo adakakhala m'phako nawana wake awili.

³¹ Mwana wake wakuyamba adati kwamung'ono wake, “Apayi wathu akalamba, palibe amuna angatiloole padziko lino.

³² Ngatiwaledzelese navinyu kuti tikwanise kugona nawo, tikatenepo tin'zabala wana naapayi wathu.”

³³ Nakutenepo usiku umwewo adaledzelesa apayi wawo, mwana wakuyamba adapita munyumba nkukagona naapayi wake; Loti alibe kudziwa chidachitika mwana wake paadabwela kuzagona naye napaadayenda.

³⁴ Mangwana yache mwana wakuyamba wa Loti adati kwamung'ono wake, “Ine usiku wapitawu ndidagona naapayi, bwela tiwaledzelese pomwe kuti iwe ugonembo nawo usiku walelo, kuchitila kuti tichite wana.”

³⁵ Nakutenepo usiku umwewo adaaledzelesa pomwe apayi wawo, mung'ono wache nkugona nawo. Loti alibe kudziwa chidachitika mwana wake paadabwela kuzagona naye napaadayenda.

³⁶ Wana wa Loti wentse ali awili adaphata pathupi paapayi wawo.

³⁷ Mwana wa Loti nkulu adabala mwana wachimuna achimpasa dzina lakuti Moabhi. Ndiko kudachoka m'badwe waa Moabhi.

³⁸ Mwana wake mung'ono adabala mwana wachimuna achimpasa dzina lakuti Bheniami. Ndiko kudachoka m'badwe waa Amoni kufika nalelo.