Kuyamba 17 - Bhukhu la Kuyamba

Kugwatiwa kwakhanda lachimuna, chilatizo chachibvano

¹ Abhuramu paakhana magole makumi pfemba napfemba (99), Chawuta adabziwonesa kwayiye nkuti, “Ndine Mulungu, Nyamphambvu zentse, teyela njila zangu, khala wakulungama.

² Nin'zachita chibvano changu pakati payine nayiwe, nin'zakuwandisani kwene-kwene.”

³ Pamwepo Abhuramu adakotamisa nkhope yake, Mulungu nkuti kwayiye,

⁴ wona, ndikuchita chibvano ichi nayiwe lelo, iwe un'zawa apayi wamishowo mizinji.

⁵ Un'zachemelewa lini nadzina lakuti Abhuramu pomwe, koma un'zachemelewa kuti Abhurahamu, pakuti ndaakukuchita apayi wamishowo mizinji.

⁶ Nin'zakupasa wana azinji kwene-kwene, m'badwe wako un'zakhala mishowo mizinji, anango wawo an'zakhala mazimambo.

⁷ Nin'zachita chibvano changu pakati payine nayiwe, nakum'badwe un'zabwela pambuyo pako, pakuti nichibvano chin'khala kufika lini nalini. Ine nin'zakhala Mulungu wako mpaka kum'badwe wako wentse um'bwela.

⁸ Nakutenepo nin'zakupasa dziko lentse la Kenani, lawukukhala ninga mulendo, nin'zalipeleka kwayiwe nakum'badwe wako un'zabwela. Dziko la Kenani lin'zakhala nthaka yawo kufika lini nalini, pamwepo ine nin'zakhala Mulungu wawo.

⁹ Mulungu adati kwa Abhurahamu, “Iwe pabodzi nam'badwe un'zabwela unfunika kuchengeta chibvano changu nayiwe.

¹⁰ Ichi ndicho chibvano changu chawunfunika kuteyeza pakati payine nayiwe nam'badwe wako um'bwela. Mwamuna wentse pakati panu anfunika kuzagwatiwa khanda lachimuna.

¹¹ Munfunika kugwatiwa panyama khanda lachimuna, chikhale chilatizo chachibvano changu pakati payine nayimwe.

¹² Mwana wentse wachimuna aninga wafikisa ntsiku sele pakati panu ngaagwatiwe khanda lachimuna, mwamuna wentse kum'badwe wanu, aninga abaliwa munyumba yanu, panango wakuguliwa namasheleni kuchoka kwawachilendo ali lini wam'badwe wanu.

¹³ Wentse adabadwa munyumba mwako nawentse adaguliwa namasheleni anfunika kugwatiwa khanda lachimuna. Nakutenepo chibvano changu chin'khala munyama yako, chibvano chinsaya kumala.

¹⁴ Mwamuna wentse ansaya kugwatiwa nyama yakhanda lake lachimuna an'zachosewa pakati pawanthu wake, pakuti aninga waphwanya chibvano changu.”

¹⁵ Mulungu adati kwa Abhurahamu, “Sarayi nkazi wako leka kumuchemela nadzina lakuti Sarayi, kuyambila lelo waakuchemelewa kuti Sara.

¹⁶ Nin'zamudalisa achikubalila mwana wachimuna, nin'zamudalisa, iye an'zawa amayi wamishowo yawanthu, mwayiye mun'zachoka mazimambo.”

¹⁷ Abhurahamu adakotamisa nkhope yake nkuyamba kuseka, iye nkuti chamuntima, “Munthu ana magole dzana (100) angabale mwana? Sara angabale mwana iye wawa namagole makumi pfemba?” (90)

¹⁸ Abhurahamu adati kwa Mulungu, “Ninga mwandochita kuti Ishimayeli adye nthaka yangu!”

¹⁹ Koma Mulungu adati, “Nee, Sara nkazi wako an'zakubalila mwana wachimuna wawun'zapasa dzina lakuti Isaki. Nin'zachita chibvano changu nayiye, chibvano changu nayiye chakufika lini nalini nakum'badwe wake umbwela.

²⁰ Koma nkhani ya Ishimayeli ndayibva, iye nin'zamudalisa ndichichita kuti abalane awande, an'zakhala kholo laanemwanamambo khumi naawili, nin'zamuchita nshowo ukulu.

²¹ Koma nin'zachita chibvano namwana wako Isaki, mwana wawun'zabaliliwa na Sara gole lamangwana panthawe ibodzi-bodzi ino.”

²² Mulungu paadamala kulewa-lewa na Abhurahamu, adayenda.

²³ Pamwepo Abhurahamu adatola mwana wake Ishimayeli naalanda wamunyumba mwake, waadagula namasheleni, amuna wentse wamunyumba mwa Abhurahamu, adaagwata nyama yakhanda lachimuna ntsiku imweyo, kuteyeza bzikhadalewedwa na Mulungu.

²⁴ Abhurahamu paadagwatiwa nyama yakhanda lachimuna akhana magole makumi pfemba napfemba (99).

²⁵ Mwana wake Ishimayeli akhana magole khumi namatatu (13) paadagwatiwa nyama yakhanda lake lachimuna.

²⁶ Ntsiku imweyo Abhurahamu namwana wake Ishimayeli adagwatiwa nyama yakhanda lachimuna,

²⁷ naamuna wentse wamunyumba mwake, awo adabadwa munyumba mwake, naawo waadagula namasheleni kwawachilendo, adagwatiwambo nyama yakhanda lachimuna.