Kuyamba 1 - Bhukhu la Kuyamba

Nkhani yakulengewa kwadziko

¹ Pakuyamba Mulungu adalenga dzulu napantsi.

² Dziko likhali chipilingu, mukhalibe chinthu. N'dima ukhali padzulu paboo, n'zimu wa Mulungu ukhafamba-famba padzulu pamadzi.

³ Mulungu adati, “Ngapakhale nakuwinika!” Kuwinika kudakhalapo.

⁴ Mulungu adawona kuti kuwinika n'kwabwino. Adapatula kuwinika nan'dima.

⁵ Kuwinika, Mulungu adakuchemela kuti, “Masikati” N'dima nkuwuti “Usiku.” Usiku udapita machibese nkubwela, imweyi idawa ntsiku yakuyamba.

⁶ Mulungu adati, “Ngapakhale namalile yapatule madzi.”

⁷ Mulungu adakonza chinthu, chakulekanisa madzi yapantsi namadzi yakudzulu.

⁸ Mulungu adachemela mbuto yapakatiyo kuti “Dzulu.” Usiku udapita machibese nkubwela, imweyi idawa ntsiku yachiwili.

⁹ Tsapano Mulungu adati, “Madzi yali pantsi padzulu ngayakochezane pambuto ibodzi, kuti pantsi pakuwuma pawoneke.” Bzidachita tenepo.

¹⁰ Mbuto yakuwumayo Mulungu adayipasa dzina lakuti “Dziko.” Madzi yadakochezana pabodzi adayachemela kuti “Nyanja.” Pamwepo Mulungu adawona kuti bzikhali bwino.

¹¹ Mulungu adati, “Padziko lapantsi ngapamele bzakumela bzakusiyana-siyana, bzakumela bzin'chita mbewu nabzakumela bzim'bala michelo, bzentse kuteyeza mishowo yabzene.” Bzidachitika tenepo.

¹² Padziko lapantsi padamela bzakumela bzakusiyana-siyana, bzim'bala michelo nabzakumela bzin'chita mbewu, bzentse kuteyeza mishowo yabzene. Pamwepo Mulungu adawona kuti bzikhali bwino.

¹³ Usiku udapita machibese nkubwela, imweyi idawa ntsiku yachitatu.

¹⁴ Mulungu adati, “Dzulu ngalikhale nachakuwinika kuti pawe nawusiku namasikati, pakhale nachilatizo chakuwonesa nyengo nantsiku nagole,

¹⁵ kuwinika kwadzululo kuwinikile pantsi.” Bzidachitika tenepo.

¹⁶ Mulungu adazakonza bzakuwinika bzikulu bziwili, chikulu chikhawinika masikati, ching'ono chikhawinika usiku, adakonza pomwe nyenyezi.

¹⁷ Mulungu adabziyikha mudzulu kuti bzimbawinika pantsi,

¹⁸ bzichitonga usiku namasikati, bzichipatula kuwinika nan'dima. Pamwepo Mulungu adawona kuti bzikhali bwino.

¹⁹ Usiku udapita machibese nkubwela, imweyi idawa ntsiku yachinayi.

²⁰ Mulungu adati, “M'madzi ngamukhale bzakulengewa bzamoyo, n'dzulu mumbuluke mbalami.”

²¹ Nakutenepo Mulungu adalenga bzilombo bzikulu bzam'madzi, nabzamoyo bzimfakanya m'madzi, kuteyeza mishowo yabzene, nambalami zentse zimbuluka kuteyeza mishowo yazene. Pamwepo Mulungu adawona kuti bzikhali bwino.

²² Mulungu adabzidalisa nkuti, “Balanani muwande mudzadze nyanja, mbalami ngazibalane zidzadze dziko.”

²³ Usiku udapita machibese nkubwela, imweyi idawa ntsiku yachishanu.

²⁴ Mulungu adati, “Padziko ngapawe nabzilombo bzamoyo kuteyeza mishowo yabzene, nabzifuwo nabzinkwawa namimba, nabzilombo bzamudziko kuteyeza mishowo yabzene, nabzinkwawa namimba kuteyeza mishowo yabzene.” Bzidachitika tenepo.

²⁵ Mulungu adalenga bzilombo bzapadziko kuteyeza mishowo yabzene, nabzifuwo kuteyeza mishowo yabzene, nabzinkwawa namimba kuteyeza mishowo yabzene. Pamwepo Mulungu adawona kuti bzikhali bwino.

²⁶ Pamwepo Mulungu adati, “Ngatikonzeni munthu adalingana nayise, akhale ningaife, azatonge ntsomba zamunyanja nambalami zan'dzulu, nabzifuwo nadziko lentse nabzentse bzinkwawa namimba padziko.”

²⁷ Nakutenepo Mulungu adalenga munthu adalingana nayiye, adamulenga kulingana na Mulungu, adalenga mwamuna nankazi.

²⁸ Mulungu adaadalisa, adati kwayiwo, “Balanani muwande, mudzadze dziko lentse lapantsi mulitonge, mutonge ntsomba zamunyanja, nambalami zan'dzulu, nabzilombo bzentse bzinfamba padziko lapantsi.”

²⁹ Mulungu adati, “Wonani, ndakupasani miti inchita mbewu, namichelo inchosa mbewu kuti ikhale chakudya chanu.

³⁰ Nyama zan'thengo nambalami zan'dzulu, nabzin'kwawa namimba, ndabzipasa miti yakugudila kuti ikhale chakudya chabzene.”

³¹ Pamwepo Mulungu adanyangana bzentse bzaadakonza, adawona kuti bzikhali bwino kwene-kwene. Usiku udapita machibese nkubwela, imweyi idawa ntsiku yachitanthatu.