Joshuwa 4 - Bhukhu la Kuyamba

Kugwezekewa kwaminyala yachikumbuso

¹ Wanthu wentse paadamala kuyambuka Jorodhani, Chawuta adati kwa Joshuwa,

² “Sankhula amuna khumi naawili muwanthu, panshowo wokha-wokha pachoke munthu m'bodzi,

³ uwawuze kuti, ‘Alokote minyala khumi namiwili pakati pa Jorodhani, pambuto padayima minyendo yaanyantsembe wa Mulungu, muyitakule muyambuke nayo mukayiyikhe pambuto pamunkagona usiku walelo.’”

⁴ Pamwepo Joshuwa adachemela amuna khumi naawili waadasankhula kuchoka kunshowo wawana wa Izraeli, panshowo wokha-wokha pakhachoka munthu m'bodzi.

⁵ Joshuwa adati kwayiwo, “Yendani pakati pa Jorodhani kutsogolo kwa Bhokisi la Chibvano la Chawuta Mulungu wanu. Munango namunango wanu atakule mwala ubodzi awusumuse awuyikhe paphewa lake, kuteyeza kuwanda kwanshowo wawana Izraeli.”

⁶ Minyala imweyo izakhale chilatizo pakati panu. Wana wanu akazakubvunzani kuti, “Minyala imweyi inilewanyi?”

⁷ Imwe mun'zaawuza kuti, “Bhokisi la Chibvano la Chawuta, palidayambuka Jorodhani madzi yadayima. Nakutenepo minyala imweyi niyakukumbusa wana wa Izraeli bzidachitika kufika lini nalini.”

⁸ Wanthu wa Izraeli adachita bzaadawuziwa na Joshuwa. Adakatakula minyala khumi namiwili kuchoka pakati pa Jorodhani, kuteyeza kuwanda kwanshowo wawana wa Izraeli, kuteyeza bzikhadawuziwa Joshuwa na Chawuta. Adatakula minyalayo achikayiyikha paadagona, adayigwezeka pamwepo.

⁹ Joshuwa adagwezekambo pomwe minyala khumi namiwili pantsi pakati pa Jorodhani pakhadayima minyendo yaanyantsembe wa Mulungu akhadatakula Bhokisi la Chibvano. Minyala imweyo ilipo pamwepo mpaka lelo.

¹⁰ Anyantsembe wa Mulungu akhadatakula Bhokisi la Chibvano adayima pakati pa Jorodhani, mpaka Joshuwa wamaliza kuchita bzentse bzaadawuziwa na Chawuta, kuteyeza bzentse bzikhadawuziwa Joshuwa na Mozisi. Wanthu adakulumiza kuyambuka Jorodhani.

¹¹ Wanthu wentse paadamala kuyambuka, anyantsembe wa Mulungu akhadatakula Bhokisi la Chibvano la Chawuta, adayambukambo wanthu wentse achiwona.

¹² Wana wa Rubheni nawana wa Gadhi nakati-nakati yawana wanshowo wa Manase adayambuka adakonzekela nkhondo, ali patsogolo pawanthu wa Izraeli, kuteyeza bzaakhadawuziwa na Mozisi.

¹³ Wanthu masawuzande makumi manayi (40,000) akhadakonzeka kumenya nkhondo adayenda patsogolo pa Chawuta, adayambukila kumadambo ya Jeriko.

¹⁴ Ntsiku imweyo Chawuta adasumusa Joshuwa pamaso paa Izraeli wentse, iwo adamugopa ninga kugopa kwaadachita Mozisi, munthawe zentse zawumoyo wake.

¹⁵ Chawuta adati kwa Joshuwa,

¹⁶ “Wuza anyantsembe wa Mulungu adatakula Bhokisi la Chibvano abule mu Jorodhani.”

¹⁷ Nakutenepo Joshuwa adawuza anyantsembe kuti, “Chokani mu Jorodhani.”

¹⁸ Anyantsembe wa Mulungu akhadatakula Bhokisi la Chibvano la Chawuta paadandoti chokeni pakati pa Jorodhani, bzithatha bzanzayo zawo pabzidandoti pondeni pakuwuma, madzi yamu Jorodhani yadabwelela pambuto payene, yachidzala mphepete mwentse bzayakhali pakuyamba.

¹⁹ Wanthu adachoka mu Jorodhani pantsiku yakhumi mumwezi wakuyamba, adakazika matenti yawo pa Giligali, kumalile yachakumabveladzuwa kwa Jeriko.

²⁰ Minyala ile khumi namiwili yaadatakula kuchoka Jorodhani, Joshuwa adachita kuti igwezekewe pa Giligali.

²¹ Iye adati kwaa Izraeli, “Mutsogolo wana wanu akazabvunza azipayi wawo kuti, ‘Minyala iyi inilewanyi?’

²² Imwe mun'zawuza wana kuti, ‘Wanthu wa Izraeli adayambuka kamadzi ka Jorodhani kakuwuma.’

²³ Pakuti Chawuta Mulungu wanu adawumisa madzi mu Jorodhani patsogolo panu kufikila mwayambuka, ninga bzaadakuchitilani Chawuta Mulungu wanu pa Nyanja Ifuyila, yaadatiwumisila kufikila tayambuka.

²⁴ Kuchitila kuti, wanthu wentse wapadziko lapantsi azadziwe kuti Chawuta niwamphamvu, kuti mugope Chawuta Mulungu wanu kufika lini nalini.”