Joshuwa 12 - Bhukhu la Kuyamba

Mazimambo yadakundiwa na Mozisi

¹ Aya ndiyo mazimambo yamadziko yadakundiwa nawana wa Izraeli, yaadatolela nthaka yamadziko yawo, yakung'ambu kwa Jorodhani ku Arabha chakumabveladzuwa, kuyambila pachigowa cha Arinoni kafika kuphili la Herimoni, nawentse wamubzigowa bza Jorodhani chakumabveladzuwa.

² Sihoni mambo waa Amori uyo akhakhala mu Heshibhoni akhatonga kuyambila pa Aroyeri, ili mumphepete mwachigowa cha Arinoni, pomwe kuyambila pakati pachigowa kufikilatu pakamadzi ka Jabhoki, pamalile yawanthu Amoni kati-nakati yadziko la Giliyadhi,

³ yakhayambila kuchigowa cha Jorodhani yachikafika kunyanja ya Galileya chakumabveladzuwa, yadalungama kunjila yaku Bheti-jeshimoti yachikafika kunyanja ya Arabha, nyanja ya munyu, yachikafika chakunyantsi kumatelo ya Pisiga.

⁴ Adakunda pomwe dziko lamambo Ogi waku Bhashani, ule adasala pawanthu wamphamvu wa Refayimu akhakhala pa Ashitaroti napa Edhireyi,

⁵ uyo akhatonga wanthu akhakhala m'phili la Herimoni na Saleka nadziko lentse la Bhashani, kufika kumalile yaa Geshuri naa Maaka, nakati-nakati yaa Giliyadhi, mpaka kafika kumalile ya Sihoni mambo waku Heshibhoni.

⁶ Mozisi mulanda wa Chawuta nawana wa Izraeli adakunda mazimambo yamweyo. Mozisi mulanda wa Chawuta adapeleka dziko limwelo kunshowo wa Rubheni nawa Gadhi nakati-nakati yawanthu wadzinza la Manase kukhala lawo.

Mazimambo yadakundiwa na Joshuwa

⁷ Aya ndiyo mazimambo yadakundiwa na Joshuwa pabodzi nawana wa Izraeli, dziko lachakumadokelo kung'ambu kwa Jorodhani, kuyambila ku Bhaali-gadhi mugowa la Lebhanoni mpaka kuphili la Halaki ilo linkwiza lichiyenda ku Seyiri. Joshuwa adapeleka dziko limwelo kumishowo ya Izraeli kuti likhale lawo kugawiliwa kwaadachitiliwa.

⁸ Adagawa dziko lentse kuphatanizila dziko lamapili, namunyantsi mwalene, muchigowa cha Jorodhani nam'matelo yam'mapili namuchipululu chamu Judhiya, namu Negebhu, mudziko laa Hiti, laa Amori, laa Kenani, laa Perezi, laa Hivi nadziko laa Jebhusi.

⁹ Wanthu wa Izraeli adakunda mambo waku Jeriko namambo waku Ayi, pambali pa Bheteli,

¹⁰ mambo waku Jerusalema nawaku Hebhuroni

¹¹ mambo waku Jarimuti nawaku Lakishi

¹² mambo waku Egiloni nawaku Gezeri

¹³ namambo waku Dhebhiri nawaku Gedheri

¹⁴ namambo waku Horima nawaku Aradhi

¹⁵ namambo waku Libhina nawaku Adhulamu

¹⁶ namambo waku Makedha nawaku Bheteli

¹⁷ mambo waku Tapuwa nawaku Heferi

¹⁸ mambo waku Afeki nawaku Lasharoni

¹⁹ mambo waku Madhoni, nawaku Hazori

²⁰ mambo waku Shimuroni-meroni, mambo waku Akishafi

²¹ mambo waku Tanaki nawaku Megidho

²² mambo waku Kedheshi nawaku Jokineyamu mu Karimeli

²³ mambo waku Dhori nawaku Nafati-dhori nawaku Goyimu mu Giligali

²⁴ nawaku Tiriza. Mazimambo yentse pabodzi yakhafika makumi matatu nam'bodzi.