Joshuwa 1 - Bhukhu la Kuyamba

Mulungu aniwuza Joshuwa katola Kenani

¹ Mozisi mulanda wa Chawuta paadafa, Chawuta adati kwa Joshuwa mwana wa Nuni, uyo akhatumikila Mozisi,

² Mulanda wangu Mozisi wafa, tsapano iwe sumuka pabodzi nawanthu wawunawo uyende kung'ambu kwa Jorodhani chakumadokelo, kudziko landili kupasa wana wa Izraeli.

³ Mbuto yentse yamun'zaponda nanzayo zanu ndakupasani kuteyeza kutsimikiza kwandidachita kwamulanda wangu Mozisi.

⁴ Kuyambila kuchipululu kufika ku Lebhanoni, mpaka kukamadzi kakulu ka Ufuratesi, nadziko lentse laa Hiti kufika kunyanja ikulu, mpaka kun'nyulila dzuwa, lin'zakhala dziko lanu.

⁵ Palibe munthu an'zakwanisa kuyimisana nayiwe pantsiku zentse zawumoyo wako. Ninga bzandidachita kwa Mozisi nin'zachitambo kwayiwe, nin'zakulekelela lini panango kukusiya wekha.

⁶ Khala wamphamvu, limba ntima, pakuti ndiwe un'zachitisa kuti a Izraeli atole dziko landidalumbila kupasa azipayi wawo.

⁷ Khala wamphamvu, limba ntima, uchenjelele kuteyeza mitemo yentse yamudawuziwa na Mozisi mulanda wangu, lekani kupatukila kujanja ladidi panango lanzele, kuti musumukile kwentse kwamuniyenda.

⁸ Bhukhu ili lamitemo ngalileke kuchoka pamulomo wako, ulikumbukile ntsiku zentse usiku namasikati, kuti uchenjelele kuchita bzentse bzidanembewa m'mwemo, ukatenepo un'zasumukila munjila zako zentse, pamwepo uninga watokwanisa.

⁹ Ko sindakuwuza? Khala wamphamvu, limba ntima. Leka kugopsewa panango kushupika, pakuti Chawuta Mulungu wako ana iwe kwentse kwawuniyenda.

Joshuwa aniwuza wanthu bzakuchita

¹⁰ Amwepo Joshuwa adawuza manduna yawanthu wa Izraeli kuti,

¹¹ “Yendani nkati mwamisasa mukawuze wanthu kuti, ‘Kon'zekelani mbuwa zanu, pantsiku yachitatu kuyambila lelo munkayambuka Jorodhani, muchiyenda katola dziko lanthaka yanu lamudapasiwa na Chawuta Mulungu wanu.’ ”

¹² Pamwepo Joshuwa adawuza wanthu wanshowo wa Rubheni nawa Gadhi nakati-nakati wanshowo wa Manase kuti,

¹³ “Kumbukani mafala yamudawuziwa na Mozisi mulanda wa Chawuta yakuti, ‘Chawuta Mulungu wanu an'zakupasani pakukhala, an'zakupasani dziko ili.’

¹⁴ Azikazi wanu nawana wanu nabzifuwo bzanu bzin'zasala kung'ambu kwa Jorodhani chakumabveladzuwa kudziko lamudapasiwa na Mozisi. Koma wamphamvu wentse ali pakati panu, an'zatsogola adapklhata bzida adakonzekela nkhondo achitsogolela abale wanu, kuti aathandize,

¹⁵ kufikila Chawuta wapasa abale wanu pakukhala bzaadachita kwayimwe. Iwo achikakhala mudziko laadapasiwa na Chawuta Mulungu wanu. Pamwepo imwe mun'zabwelela kudziko lanu, kudziko lachakumabveladzuwa kung'ambu kwa Jorodhani lamudapasiwa na Mozisi mulanda wa Chawuta.”

¹⁶ Iwo adadayila kwa Joshuwa, “Bzentse bzamuntiwuza tin'chita, kwentse kwamuntituma tiniyenda.

¹⁷ Ise tinkutetekelani bzatidachita kwa Mozisi, nakutenepo ise tinkutetekelani. Chawuta Mulungu wanu ngaakhale nayimwe bzaadachita kwa Mozisi!

¹⁸ Wentse ampandukila mitemo yanu, nakuleka kutetekela mafala yamulomo wanu, nabzentse bzamuniwawuza ngaaphewe. Imwe limbani ntima, khalani wamphamvu.”