Югьан 2 - Сыйлы Китап Янгы Разилешивню

Кана деген юртда болгъан той

¹ Уьч гюнден сонг Галилеяны Кана деген юртунда бир той бола. Шонда Исаны анасы да болгъан.

² Иса булан Ону якъчылары да шо тойгъа чакъырылгъан болгъан.

³ Тойда чагъыр битгенде, анасы Исагъа: – Буланы чагъырлары битген, – дей.

⁴ – Анам, Магъа да, сагъа да шо не аварадыр? Мени заманым гьали де гелмеген, – дей Иса огъар.

⁵ Исаны анасы тойдагъы къуллукъчулагъа: – Сизге О не буюрса, шону этерсиз, – дей.

⁶ Онда гьарисине сексенден юз йигирма литрге ювукъ сув сыягъан алты таш кершен болгъан. Оьзлени адатына гёре, шо сувну ягьудилер жувунмакъ учун пайдаландыра болгъанлар.

⁷ Иса олагъа: – Кершенлени сувдан толтуругъуз, – дей. Олар авзуна ерли толтуралар.

⁸ Сонг Иса къуллукъчулагъа: – Гьали тёгюп, тойну юрютеген адамгъа элтигиз, – дей. Олар да элтелер.

⁹ Тойну юрютеген адам Иса чагъыргъа айландыргъан сувну татывлап къарай. Бу чагъыр къайдан гелгенни билмей, о гьакъда янгыз сувну тёкген къуллукъчулар биле. Шо саялы о оьзюню янына гиевню чакъырып,

¹⁰ огъар булай дей: – Адамлар яхшы чагъырны башлап бере. Кёп ичип, къонакълар эсиргенде буса, яманын бере. Сен буса яхшы чагъырны артгъа сакълагъан болгъан экенсен.

¹¹ Бу Иса этген аламатланы биринчиси болгъан. Шо аламат Галилеяны Кана деген юртунда этилген. Иса Оьзюню макътавлугъун муна шолай гёрсетген ва якъчылары Огъар иман салгъанлар.

¹² Мундан сонг Иса анасы, инилери, якъчылары да булан бирче Капернагьум шагьаргъа бара. Онда олар бир нече гюн къалалар.

Иса сатывчуланы ибадатханадан къувалай

¹³ Ягьуди Пасха байрам ювукълаша. Иса Ерусалимге геле.

¹⁴ О ибадатханада олтуруп оьгюзлер, къойлар, гёгюрчюнлер сатагъанлар булан акъча алышдырагъанланы таба.

¹⁵ Аркъандан эшип бир къамучу да этип, ибадатханадан оланы барын да, шолай да къойланы ва оьгюзлени къуваламагъа башлай. О алышдырагъанланы акъчаларын алып чача, оланы такъчаларын авдара.

¹⁶ Гёгюрчюн сатагъанлагъа: – Буланы мундан алып тайдырыгъыз. Мени Атамны уьюн базаргъа айландырмагъыз! – дей.

¹⁷ Шонда Исаны якъчылары Сыйлы Язывларда: «Сени уьюнге бакъгъан сююв мени ялындай яндыражакъ», – деп язылгъан сёзню эсге алалар.

¹⁸ Ягьудилени башчылары Огъар: – Шолай этмеге ихтиярынг барны Сен бизге не аламат булан гёрсетежексен? – деп сорайлар.

¹⁹ – Бу ибадатхананы бузугъуз. Уьч гюнден Мен муну къайтарып тургъузарман, – деп жавап бере Иса олагъа.

²⁰ – Бу ибадатхана къыркъ алты йыл къурулгъан. Сен муну уьч гюнден тургъузажакъмысан? – дейлер олар Огъар.

²¹ Иса буса ибадатхана демек булан Оьзюню къаркъарасы гьакъында айтгъан.

²² Иса оьлюмден тирилгенде, якъчылары О сёйлеген бу сёзлени эсге алгъанлар ва Сыйлы Язывлагъа да, Иса айтгъан сёзлеге де инангъанлар.

²³ Иса Ерусалимде ягьуди Пасха байрамда гёрсетген аламатларына къарап, кёплер Огъар иман салалар.

²⁴ Амма, инсанланы юреклерин билегени саялы, Иса олагъа инанып битмей.

²⁵ Инсанны гьакъында Огъар гьеч биревню де англатыв бергени тарыкъ болмагъан. Неге тюгюл де, инсанны ичинде не барны О Оьзю биле болгъан.