Марк 14 - Сыйлы Китап Янгы Разилешивню

Исагъа къаршы питне

¹ Ягьуди Пасха ва Маясыз Экмекни байрамы болма эки гюн къала. Баш дин къуллукъчулар ва дин алимлер Исаны гьилла булан тутуп оьлтюрмеге ёл излей.

² Олар: – Байрам гюнлерде этмеге тарыкъ тюгюл, дагъы ёгъесе халкъ баш гётережек, – дейлер.

³ Иса Байтанияда яман гён аврувдан авруйгъан Симонну уьюнде къонакълыкъда болгъан. О янтайып турагъанда, ичинде бек багьалы нард деген атир ийисли таза май къуюлгъан чыны кажинни де тутуп, онда бир къатынгиши гирип геле. Кажинни сындырып, о майны Исаны башына тёге.

⁴ Къонакъланы бирлери огъар ачувлана ва бир бирине: – Булай багьалы майны не учун шолай зая эте?

⁵ Шону чу уьч юз гюмюш акъчадан да артыкъгъа сатып, пакъырлагъа садагъа этип бермеге ярай эди! – деп сёйлейлер ва къатынгъа бек айып этмеге башлайлар.

⁶ Амма Иса булай дей: – Къатынны парахат къоюгъуз! Огъар неге къайнашасыз? Мени учун о бир яхшы иш этди!

⁷ Пакъырлар даим сизин яныгъызда болажакъ, не заман сюйсегиз де, олагъа яхшылыкъ этмеге болажакъсыз. Мен буса даим яныгъызда болмажакъман.

⁸ Къатын къолундан гелеген затын этди. Гёммеге гьазирлемек учун, о Мени чархыма май тёкдю.

⁹ Гертисин сёйлеймен сизге: бу Сююнч Хабар бютюн дюньяны не еринде билдирилсе де, бу къатын этген иш сёйленежек ва оьзю эсге алынажакъ.

Ягьуданы хыянатлыгъы

¹⁰ Шо вакъти Исаны он эки де якъчысыны бири болгъан Ягьуда Искариет, Ону баш дин къуллукъчуланы къолуна бермек учун, оланы янына гете.

¹¹ Олар шону эшитип, сююнелер ва огъар акъча бермеге сёз берелер. Ягьуда Исагъа хыянатлыкъ этмек учун онгайлы мюгьлет ахтарып айлана.

Пасха байрам аш

¹² Ягьуди Пасхагъа къурбан къозусу союлагъан Маясыз Экмекни байрамыны биринчи гюнюнде якъчылары Исагъа: – Пасха ашны Сен къайда ашама сюесен? Биз барып гьазирлейик, – дейлер.

¹³ Иса якъчыларындан экевюн йибере туруп, олагъа булай дей: – Шагьаргъа барыгъыз. Сизге онда кажин булан сув алып барагъан бир адам къаршылашар. Ону арты булан барарсыз.

¹⁴ О гирген уьйню есине: «Устаз, Пасха байрам аш ашамакъ учун якъчыларым да булан уьюнгде жыйылма болагъан ер къайдадыр деп сорай эди», – деп айтарсыз.

¹⁵ О сизге оьрде ясалгъан, бары да зат гьазирленген бир уллу отав уьйню гёрсетежек. Бизин учун ахшам ашны шонда онгарыгъыз.

¹⁶ Якъчылары ёлгъа тюшелер ва шагьаргъа гелгенде, бары да затны Иса айтгъан кюйде болуп табалар. Онда олар ягьуди Пасха ашны гьазирлейлер.

¹⁷ Ахшам он эки якъчысы да булан Иса шонда геле.

¹⁸ Олар тепсиде олтуруп ашап турагъанда, Иса: – Гертисин сёйлеймен сизге: Мени булан бирге тепсиде олтуруп ашап турагъанлардан биригиз Магъа хыянатлыкъ этежексиз, – дей.

¹⁹ Олар бек пашман болалар ва бирерлеп: – Шо мен тюгюлмендир чи? – деп сорамагъа башлайлар.

²⁰ Иса олагъа булай жавап бере: – Он экевден шо бирев экмегин Мени булан бир сукарагъа мандырагъаныгъыз болажакъ!

²¹ Сыйлы Язывларда Оьзюню гьакъында язылгъаны йимик, Мен, Инсанны Уланы, оьлме герекмен. Амма Инсанны Уланына хыянатлыкъ этген адамны гьалына адаршай! О адам анадан тувмай къалгъан буса яхшы эди!

²² Олар ашайгъанда, Иса экмек алып, шюкюр дуа да этип, сындырып якъчыларына пайлай. Сонг: – Алыгъыз, бу Мени къаркъарамдыр! – дей.

²³ Сонг О бир аякъны ала, шюкюр дуа да этип, олагъа бере ва барысы да ондан ичелер.

²⁴ Иса булай дей: – Бу аякъ хыйлыланы гюнагьларын гечдирмек учун тёгюлежек къанымдыр. О къан Аллагьны ва Ону халкъыны арасындагъы разилешивню белгисидир.

²⁵ Гертисин сёйлеймен сизге: Аллагь толу кюйде гьакимлик этеген заман гелгинче, Мен юзюмден этилген чагъырны дагъы ичмежекмен. О заман янгы чагъыр ичежекмен.

²⁶ Аллагьгъа макътав йыр йырлагъандан сонг, олар Зайтун тавгъа гетелер.

Петер Исаны инкар этмежекге сёз бере

²⁷ Шонда Иса якъчыларына булай дей: – Сиз барыгъыз да Мени къоюп гетежексиз. Сыйлы Язывларда: «Къойчуну оьлтюрежек, сиривдеги къойлары чачылышажакъ», – деп язылгъан чы.

²⁸ Мен оьлюп тирилген сонг, сизден алда Галилеягъа барып туражакъман.

²⁹ – Эгер Сени бары да инкар этсе де, мен инкар этмесмен! – дей Петер Огъар.

³⁰ Шо заман Иса огъар: – Гертисин сёйлеймен сизге: бугюн, гьатта бу гече хораз эки керен къычыргъынча, сен Мени уьч керен инкар этежексен, – дей.

³¹ Амма Петер: – Магъа Сени булан бирге оьлюп гетмеге тюшсе де, мен Сени инкар этмесмен! – деп дагъы да къаныгъывлу кюйде такрарлай. Оьзгелери де шолай дейлер.

Иса Гетсамания бавунда

³² Мундан сонг олар Гетсамания деген бир ерге гелелер. Иса якъчыларына: – Мен дуа этип битгинче, сиз мунда олтуруп туругъуз, – дей.

³³ О Петерни, Якъубну ва Югьанны Оьзю булан ала, къайгъырмагъа ва гьалекленмеге башлай.

³⁴ Олагъа: – Юрегимни терен къайгъы басгъан, мунда Мени булан къалып, юхламай туругъуз! – дей.

³⁵ Бираз ари тайып, ерге къапланып, шо мюгьлет болма тарыкълы зат, имканлы буса, Оьзюне етмесин деп, дуа этмеге башлай.

³⁶ Иса: – Атам! Сени къудратынг етмейген зат ёкъ. Мени бу къысматдан къутгъар! Амма Мен сюеген кюйде тюгюл, Сен сюеген кюйде болсун, – дей.

³⁷ Иса къайтып якъчыларыны янына гелгенде, оланы юхлай туруп таба. Петерге булай дей: – Сен юхлаймысан? Бир сагьат сама юхламай туруп болмадынгмы?

³⁸ Юхламагъыз. Болажакъ сынавлардан оьтмек учун дуа этигиз. Юрек хыял этсе де, къаркъараны буса гючю ёкъдур!

³⁹ О дагъы да ари тайып, алдагъы дуасындагъы сёзлени айта туруп дуа эте.

⁴⁰ Къайтып гелгенде, якъчыларын дагъы да юхлай туруп таба. Олар юхусундан гёзлерин ачып болмайлар. Огъар не жавап берегенин билмейлер.

⁴¹ Уьчюнчю гезик де оланы янына гелип, Иса: – Сиз гьали де ятып юхлап рагьатланамысыз? Таманыгъыз! Заман етишген. Мен, Инсанны Уланы, гюнагьлыланы къолуна бериле тураман.

⁴² Туругъуз, гетейик! Муна, гьали Магъа хыянатлыкъ этеген адам да ювукълашып геле, – дей.

Исаны тутулуву

⁴³ Иса бу сёзлени сёйлеп турагъанда, шоссагьат он эки якъчысыны бириси болгъан Ягьуда геле. Ону булан бирге баш дин къуллукъчулар, дин алимлер ва тамазалар йиберген къылычлары ва таякълары булангъы кёп халкъ да бола.

⁴⁴ Исагъа хыянатлыкъ этеген Ягьуда олар булан: – Мен Оьзюн оьбежек Адам Исадыр. Ону тутарсыз, тек Ону сакълыкъ булан элтерсиз, – деп алданокъ сёйлешген болгъан.

⁴⁵ Шоссагьат о Исагъа ювукълашып: – Устаз, – деп, Ону оьбе.

⁴⁶ Шо заман Исаны туталар.

⁴⁷ Ону янында токътагъан якъчыларындан бири, къылычын да сувуруп, уруп дин къуллукъчуланы башчысыны къулуну къулагъын гесип тюшюре.

⁴⁸ Шо заман Иса олагъа булай дей: – Сиз Мени уьстюме, бир жинаятчыны тутагъанда йимик, къылычлар да, таякълар да булан гелгенсиз.

⁴⁹ Мен гьар гюн сизин булан ибадатханада болуп, сизге Аллагьны каламын англатып турдум, сиз де Мени тутмадыгъыз. Амма Сыйлы Язывларда язылгъан сёзлер яшавгъа чыкъмагъа герек!

⁵⁰ Шо заман бары да якъчылары Исаны къоюп къачалар.

⁵¹ Исаны артындан гелегенлени арасында ялангъач къаркъарасына кетен шаршав чырмалгъан бир жагьил улан болгъан. Олар ону да туталар.

⁵² Амма о улан, оланы къолунда шаршавун да къоюп, сыпкъырылып, ялангъач кююнде къачып гете.

Ягьудилени оьр мажлисини алдында

⁵³ Исаны дин къуллукъчуланы башчысыны янына гелтирелер. Онда бары да баш дин къуллукъчулар, тамазалар ва дин алимлер де жыйылалар.

⁵⁴ Петер буса дин къуллукъчуланы башчысыны абзарына ерли, арекден туруп, Исаны арты булан юрюй. Онда отну алдында да олтуруп, къаравулчулар булан бирге исси болуп тура.

⁵⁵ Баш дин къуллукъчулар ва бютюн ягьудилени оьр мажлиси буса Исаны оьлтюрмек учун Огъар къаршы ялгъан шагьатлар ахтарып айланалар. Амма Ону айыбын тапмайлар.

⁵⁶ Кёплер Огъар къаршы ялгъан шагьатлыкъ этсе де, оланы шагьатлыкълары бир бирине къыйышмай.

⁵⁷ Огъар къаршы булай ялгъан шагьатлыкъ этегенлери де бола:

⁵⁸ – Биз Ону къол булан ишленген бу ибадатхананы Мен дагъытажакъман, уьч гюнден къол булан ишленмеген башгъасын тигежекмен деп сёйлейгенин эшитдик.

⁵⁹ Амма оланы ялгъан шагьатлыкълары мунда да бир бирине къыйышмай.

⁶⁰ Шо заман дин къуллукъчуланы башчысы ортагъа чыгъып, Исагъа: – Неге бир жавап да бермейсен? Буланы Сагъа айтагъанларына къаршы айтмагъа затынг ёкъму? – деп сорай.

⁶¹ Иса сёйлемей токътай ва гьеч жавап бермей. Шо заман дин къуллукъчуланы башчысы Огъар: – Аллагьу Тааланы Уланы ва Месигь Сенмисен? – деп дагъы да сорай.

⁶² – Менмен. Инсанны Уланын да бары да затгъа гючю етеген Аллагьны онг ягъында олтуруп, кёкню булутларыны уьстюнде гелегенин гёрежексиз, – деп жавап бере Иса.

⁶³ Шо заман дин къуллукъчуланы башчысы, уьст опуракъларын йыртып йиберип: – Бизге дагъы шагьатлар негер тарыкъдыр?

⁶⁴ Муну Аллагьгъа къаршы капир затланы сёйлейгенин эшитдигиз! Сиз нечик ойлашасыз? – дей. Оланы барысы да О айыплы ва оьлтюрюлме герек деп гьисап эте.

⁶⁵ Бирлери Ону бетине тюкюрмеге, гёзлерин байлап, токъаламагъа башлайлар. – Къайда, пайхаммарлыгъынгны гёрсет, – дей. Къаравулчулар да Ону аралап тюймеге башлайлар.

Петер Исаны инкар эте

⁶⁶ Петер тюпде, абзарда турагъанда, ону янына дин къуллукъчуланы башчысыны къаравашларындан бириси геле.

⁶⁷ Отда исинип турагъан Петерни гёргенде, огъар яхшы тикленип къарап: – Шо назаретли Иса булан сен де бар эдинг чи, – дей.

⁶⁸ – Сен нени гьакъында сёйлейгенингни билмеймен ва англамайман, – деп инкар этип, Петер къабакъ тюпге багъып чыгъып гете. Шо заман хораз къычыра.

⁶⁹ Къараваш, Петерни дагъы да гёрюп, янында токътагъанлагъа: – Бу да олардан биревю, – деп сёйлемеге башлай.

⁷⁰ Петер дагъы да инкар эте. Арадан бираз заман оьтген сонг, онда токътагъанлар Петерге дагъы да: – Сен оланы биревю экенинг герти. Сен де галилеялысан чы, – дейлер.

⁷¹ – Сиз айтагъан Адамны мен танымайман, – деп, ант этмеге башлай о.

⁷² Шо заман хораз экинчи керен де къычыра. «Хораз эки керен къычыргъынча, сен Мени уьч керен инкар этежексен», – деп Иса айтгъан сёзлени Петер шо заман эсине гелтире ва гьынкъ этип йыламагъа башлай.