2 Коринфдегилеге 2 - Сыйлы Китап Янгы Разилешивню

¹ Шо саялы да мен сизин яныгъызгъа дагъы гелип, дерт гелтирип турмайым деп токъташдым.

² Неге тюгюл де, эгер де мен сизге дерт гелтирсем, шо заман мен оьзюн пашман этген адамдан къайры, мени ким сююндюрежек?

³ Къайтып гелгенде, мени сююндюрме тарыкълар мени пашман этмесин деп, мен де о гьакъда яздым. Неге тюгюл де, мен сююнежек болсам, сиз де барыгъыз да сююнежегигизге инанаман.

⁴ О гьакъда мен сизге толу юрегимни салып, къайгъыдан, дертден толуп, гёзьяшларым агъыла туруп яздым. Сизин дертге салмакъ учун тюгюл, мени сизге бакъгъан якъдагъы сюювюмню зорлугъун сиз билсин деп яздым.

Гюнагьлыны гечив

⁵ Эгер де ким буса да бирев мени кепимни бузду буса да, о меникин тюгюл, аз маз буса да (къопдуруп айтма чы сюймеймен!) сизин барыгъызны да кепин бузду.

⁶ Огъар чы о оьзю сизин кёплеригизден гёрген такъсыр да таманлыкъ этежек эди.

⁷ Гьали буса, о адам къайгъыгъа батып юрюмесин учун, ондан гечип къоюгъуз ва ону гёнгюн алыгъыз.

⁸ Ялбарып тилеймен сизге: огъар бакъгъан якъда сюювюгюзню гёрсетигиз.

⁹ Сиз бары да затларда тынглавлу болурмусуз – мен сизге шону сынап къарамакъ учун яздым.

^10-11 Гьали сиз кимден гече бусагъыз, мен де шондан гечемен. Мен гечген затны чы (эгер де гертиден де магъа гечме зат бар буса), бизин Иблисге алдатма къоймасын учун, Месигьни алдында сизин хатиригизден гечдим. Иблисни мурадын буса биз яхшы билебиз.

Сююнч Хабарны уьст геливю учун Аллагьгъа шюкюрлюк этив

¹² Месигьни гьакъындагъы Сююнч Хабарны билдирмек учун, мен Троадагъа гелген заманда, магъа Раббибизни иши учун ёл ачылды.

¹³ Амма шонда иман къардашым Титни тапмагъаным саялы, юрегим рагьатлыкъ тапмады. Шогъар гёре, мен олар булан савболлашып, Македониягъа бармагъа деп ёлгъа тюшдюм.

¹⁴ Амма Аллагьыбызгъа шюкюрлюк болсун! О гьар заманда да бизин Месигь булан бирликде уьстюнлюкге багъып алып юрюй. Месигьни гьакъындагъы билимни Аллагь бизден таба бары да ерде арив ийисли зат йимик арагъа чыгъара.

¹⁵ Неге тюгюл де, къутгъарылывну ёлундагъыланы ва оьлюмню ёлундагъыланы арасында биз Аллагьыбызгъа Месигь къурбан этеген арив ийисли затгъа ошайбыз.

¹⁶ Оьлюмню ёлундагъылары учун биз оьлюмню ийисибиз, къутгъарылывну ёлундагъылары учун яшавну ийисибиз. Шолай болмагъа дагъы ким бажарып болур?

¹⁷ Бир кёплер йимик, биз Аллагьны каламын оьзюбюзню пайдабыз учун билдирип айланмайбыз чы. Биз Аллагь йиберген адамлар гьисапда, Месигь булан бирликде Ону алдында гьакъ герти затны сёйлейбиз.