Taitus 3 - UWONBƆR A GBƆNPƆŊ LIKƆƆNL

Uwonjiɛn a binbem

¹ Tiɛr bininfob nmɔn ke bi li nɔɔ biyudam nin bibɔrtiib a siim kaah wɔɔn man nin, ki li cheel bi mɔɔŋi, ki ŋa sili nin bin tun niwann nan ŋan biɛn,

² bi laa jɔɔ kutingbiig u ba bu, ki li be nin nposɔɔn, ki li jɔɔ nbinben ŋan, ki li tenn bininfob biɛn ibamɔn a jilima.

³ Isaŋ iba ti mu nan ye tijɔri le nin tukangbirdam, le ni lar ti ki ta ti ŋa tiyomir, ki jɔɔ kɔlisa birug nin dulinya nan a wan ŋan. Le ti jɔɔ kininaŋ nin linunchɔril, le bi nan ti le ti mu nan bitab.

⁴ Amaa Uwonbɔr wan ye ti feeru nan a ŋam nin U bam kaah nan degirin nin,

⁵ le U fee ti gab, naa ye ibuchin toon le ti tun ni, amaa U nyunyunbasanl bu. U fee ti gab waah nan fun ti nnyum ki sei ti nmaal pɔɔn nin kinaaŋ pɔŋ Kasi a Naaŋ a pɔɔm bu,

⁶ Kasi a Naaŋ nmɔn le U nan kpaar takpem ki jaa uninfo biɛn bu Yisa Masiya wan ye ti feegabdaan nin bu,

⁷ U nyunyunbasanl bu le U ke tibɔr ŋan, ti na li ŋa Uwonbɔr a faajib ki jɔɔ limiɛfol lan kaa jɔɔ diɛmin a tama.

⁸ Tibɔr nan ye ibamɔn le. Le n ban ni li jɔɔ ti ki wɔɔn bi iyoo biɛn wee nin che ban ŋa Uwonbɔr yada-n n choo biba ki ta bi saŋi ki tun itoon ŋan. Ni ma ye nan ŋan ki jɔɔ tinyɔɔr ki sei uninfo biɛn.

⁹ Amaa ni nyam ijɔrig nin nmaal a ninkpeeb a yin a bɔrin nin imɔkpel a famin nin ikɔn ki ta jiin Uwonbɔr a siim paam, nan bu-n ni ye yɔli le kaa jɔɔ tinyɔɔri.

¹⁰ A kpaan kumabiyiɛrugdaan taaliba bee itaa ilee wee waa kpenn ke, a nyam udaan a bɔrin ki laa ji kan u ki kpiɛ ni kanlin ni.

¹¹ A nyi ke man a ninfou ye kuŋmaruŋ le nin tibirdaan, u bii u bau.

Nwɔɔm man joor

¹² N tun Atemasi bee Tachikusi a ban ke, a pɔɔn a ba ki dan n ban Nikopolisi, nan bu-n n bon ke n be niin le kufaag a yoo.

¹³ Pɔɔn a ba ki ter Zenasi wan ye Rom yaab a bɔjiru win nin Apolosi bi sanchonlin ki laa che baah ban nan npar bi.

¹⁴ Ni kpaa le nin ti ninfob ntinn ki ta biba ki sei itoon ŋan a tum, ki ter bi lidaal biɛn baah ban nan, wee ki laa be nbinben man kaa jɔɔ tinyɔɔri.

¹⁵ Ban biɛn be n ban nin poor ni. Poor ban ban ti, bi yada bu-n na. Linyunyunbasanl li be ni biɛn bu.