Rom Yaab 8 - UWONBƆR A GBƆNPƆŊ LIKƆƆNL

Kinaaŋin paam a binbem

¹ Mambu, daandaan nan Uwonbɔr kaa yin bii bininfob ban be nin Masiya nni,

² nan bu-n, Masiya bu le limiɛfol a naaŋ a siim feem ki jaa tibirin nin nkumin a siimin.

³ Uwonbɔr tun nan wee nsiimin kaa fir tun nna nan bu-n uninfosaal a gbanann kaa nan fir ŋmag nsiim nmɔn ni, le U tun U tɔɔl a big le ki nann uninfosaal wan ye tibirdaan nin ke un nan mann tibir a manug. Le ki bii tibir tan be uninfosaal a gbanann nin ni-n,

⁴ na li ŋa man wee nin gbeen ti buchin a binbem kaah ye man nsiimin yaan, nan bu-n taah kaa ji be tigbanann a wiib a bamin wee ki nin be Uwonbɔr a Kasi a naaŋ kaah ye ti man nin.

⁵ Ban nɔɔ tigbanann a bamin a potiɛl be tigbanann nmɔn kaah ban man nin yaan le; amaa ban nɔɔ Kasi a Naaŋ a bamin mu a potiɛl be Kinaaŋin a bamin yaan le.

⁶ Wan ta u potiɛl ŋa tigbanann a bamin yaan ke ni ye nkum le, amaa lipotiɛl lan mu wee Kasi a Naaŋin ŋmagin ye limiɛfol le nin nposɔɔn;

⁷ wan ta u potiɛl ki ŋa tigbanann a bamin ke, u ye Uwonbɔr a dataag le, nan bu-n waa nɔɔ Uwonbɔr a siimin ni, hali kaa sin li fir nɔɔ mi.

⁸ Ban wee tigbanann a bam ŋmagin kaa li fir gbee Uwonbɔr a numi.

⁹ Nim, ma ke, tigbanann a bamin kaa ji ŋmag ni amaa Kinaaŋin le ni ŋmag ni, ni ye Uwonbɔr a Naaŋ be ni ni ke. Wan mu kaa jɔɔ Masiya a Naaŋin ke, waa ye Masiya yaa wi.

¹⁰ Amaa ni ye Masiya be ni ni ke, ni gbanann kpo tibir buu, nin ni ma biɛn ni, ni naaŋin fo nbuchin binben bu.

¹¹ Ni ye wan a Naaŋ fiin Yisa nkumin nin be ni ni ke, wan nan fiin Masiya nkumin nin mu li sei ni gbanann tan kpegin limiɛfol u Naaŋin a pɔɔm man be ni nin bu.

¹² Mambu, n nabum, ti jɔɔ naah ye ti tun man le amaa naa ye tigbanann a bami, ki li be Uwonbɔr a Naaŋin kaah wɔɔn ti man.

¹³ Ni ye ni nɔɔ tigbanann a bamin kaah wɔɔn ni man nin ke, ni li kpo; amaa ni che Uwonbɔr a Naaŋin ku tigbanann a bam a toon yin ke, ni li fo,

¹⁴ nan bu-n, ban wee Uwonbɔr a Naaŋin lii bi samin, bi ye Uwonbɔr a naachim le.

¹⁵ Uwonbɔr kaah ta U Naaŋ kan sei ni-n kaa ye Kinaaŋ kan li ŋa ni bi yom wee ni ji li san bijawaami, amaa U Naaŋ nmɔn bu le che ni kpann U naachim. Uma bu le ti kuun ki yi ke, “N Dindaau N Baa.”

¹⁶ Uwonbɔr a Naaŋin tɔɔl le jin siɛra ti naaŋin ke ti sin ye Uwonbɔr a buwaab le.

¹⁷ Daandaan nan ni ye ti sin ye Uwonbɔr a buwaab ke, man ke ti ye U faajib le, tim nin Masiya le lagin ki ye Uwonbɔr a faajib, ni ye tim nin Masiya lagin ki jin U fala-n ke tim nin U ma ji na yin lagin kan U pag.

Kupag kan la chaan

¹⁸ N chee ke fala kan wee ti ji daandaan nan kaa foo ti ta bigin kupag kan wee Uwonbɔr na yin kpiir ti ni nni.

¹⁹ Niwann nan wee Uwonbɔr naan nan biɛn le guu le bi sufu ŋa sili ki lig lidaal lan wee Uwonbɔr na yin kpiir U naachimin ni.

²⁰ Tiwann naan wann nmɔn biɛn a pool bii le taah kaa fir tun naah bi ye ti-n tun nan nin, naa ye tiwann naan wann nmɔn a wiibi, Uwonbɔr wan naan ti-n kaah la ban ti li be man le yen, amaa le ki sei ti tama,

²¹ ke tiwann naan wann tɔɔl li nya nburim a yomirin, ki kɔɔ Uwonbɔr kaah ta wiib kan jɔɔ kupag ki sei U buwaabin yaan.

²² Ti nyi ke tiwann naan wann biɛn le dun le ke nmarwiɛn kaah wu man nin hali nin daandaan nan.

²³ Naa ye ni yaa binba, amaa tim ban wee Uwonbɔr chinn sei ti U Kasi a Naaŋin a looi yin tɔɔl dun le ti sufu ni ki guu n-yonn man wee Uwonbɔr na yin ta ti kpann U tɔɔl a buwaab, ki sei ti nkpenim a manug ti gbanann nin.

²⁴ Tama nan bu le ti kan feegab. Amaa tama kan wee ti ga-n kaa ye tama kolibi. Ŋma a tama be niwann nan wee u pii jɔɔ-n buu?

²⁵ Amaa ni ye ti jɔɔ tama taah kaa la jɔɔ tiwann tan nin bu ke, ti jɔɔ limɔril le ki guu ti.

²⁶ Man le ye ni, Kinaaŋin ter ti le ti daburigi yin. Taa nyi taah yin miɛ Uwonbɔr ki ban nan ni, amaa Kasi a Naaŋin tɔɔl le gaa ki miɛ Uwonbɔr ki tenn ti nin ndundun man wee imɔleen kaa li fir pag wɔɔn ni.

²⁷ Le Uwonbɔr wan feen ki lig ti sufu-n nin nyi Kasi a Naaŋin a potiɛl, nan bu-n Kasi a Naaŋin le gaan ki miɛ tenn Uwonbɔr a ninfob gannkaabin Uwonbɔr a bam kaah wɔɔn man.

²⁸ Le ti nyi ke niwann biɛn nin, Uwonbɔr tun le ki tenn bininfob ban jiɛ win naah li ŋan ki sei bi man, U jɔɔ nan bu wee U yin bi.

²⁹ Ban wee Uwonbɔr pii nan nyi ki bon ke bi na li chee ki kpenn ki li be ke u bija-n kaah be man nin, wee nin che U bija nmɔn nŋa kibininkpeeg u nabum takpem a sisiigin.

³⁰ Ban wee Uwonbɔr bon bi bu-n, bi ma le u yin; ban wee U yin nmɔn, bi ma le U ke bi bɔr ŋan; ban wee U ke bi bɔr ŋan nin nmɔn, bi ma le u ji che bi kan kupag.

Uwonbɔr a jiɛm man be Masiya ni

³¹ Ti ni yin len ke nii ki jiin ni niɛ nan paam maa? Ni ye Uwonbɔr si ti chaŋ ke, ŋma li fir kɔnn taa?

³² Uwonbɔr wan kaa nan yii U tɔɔl a bija a kum bu, amaa le ki ta u mann kumanug ki sei ti biɛn, ke ni yin ŋa nii wee waa ji li fir ta U ki kpiɛ tiwann tan biɛn gurin bu ki sei taa?

³³ Ŋma li fir galin bininfob ban wee Uwonbɔr gann nan naa? Uwonbɔr le len ke bi bɔr ŋan.

³⁴ Ŋma li fir bii baa? Masiya le nan kpo, le nan jon man le ye u nan fii nkumin na, ki ka Uwonbɔr a nɔɔjiim paam ki miɛ Uwonbɔr ki tenn ti.

³⁵ Ŋma li fir bɔgir ti nyan Masiya a jiɛm nan yaan naa? Tibɔmugkaar bee nton bee limugil bee nkom bee nnan bee kidaŋ bee bitɔb a jugaa?

³⁶ A li ke naah sɔb Uwonbɔr a gbɔŋin ke: “Fin bu le ti be nkum a daŋin lidaal biɛn; ki nann upee wan wee bi ŋa sili bin kɔrin.”

³⁷ Aai nin ni ma biɛn ni, ti jon ban nyaŋa Masiya a jiɛmin bu.

³⁸ N nyi kaa biɛn ni ke naa ye nkum bee limiɛfol, kaa ye malakam bee npɔniimi, kaa ye tiwann yɔɔr tan be daandaan nan bee tiwann yɔɔr tan la yin dan ni, kaa ye ipɔɔn iba,

³⁹ kaa ye nkpikper bee nnyunyɔɔni, kaa ye tiwann yɔɔr tan be tiwann naan wann nin biɛn ni, ni ba kaa be ki li fir bɔgir ti nyan Uwonbɔr a jiɛm man be ti Yudaau Masiya ni-n yaan ni.