Rom Yaab 6 - UWONBƆR A GBƆNPƆŊ LIKƆƆNL

Tibir bu le ti kpo amaa Masiya bu le ti fo ki be ni U nin nmɔkpaa

¹ Ti ni yin len ke nii? Ti le li mann tun tibira wee nin che Uwonbɔr a nyunyunbasanl npɔr bee?

² Naa li fir ye man ni! Tibir bu ke, ti kpou; ke ni yin ŋa nii wee ti gbaa be tibir nmɔn yaan naa?

³ Bee naa nyi ke tim ban biɛn nan fun Uwonbɔr a nyunful Masiya bu-n nan fun u kum a nyunful mu waa?

⁴ Mambu ti nan kpo nin Yisa le bi pii ti nin u ma, Uwonbɔr a nyunfulin bu, a li ke Masiya kaah nan fii nkumin nin u Baa a pagin, man le ti mu yin be limiɛfol pɔnlin yaan.

⁵ Ni ye tim nin Yisa lagin kpo man ke, man le ti le ji na yin lagin fii nin U.

⁶ Ti nyi ke ti binben kpegimin nan lagin kpaa nin Masiya u, na li ŋa man ki bii tibir a gbanann, wee ti laa ji be tibir a yomirin ni;

⁷ Nan bu-n, wan biɛn kpo ke, u nyan tibir a yomirin na.

⁸ Daandaan nan ni ye ti kpo nin Masiya ke, ti jɔɔ yada ke ti na li lagin be nin u.

⁹ Nan bu-n ti nyi ke Masiya kaah nan fii nkumin nin, waa ji yin kpo jigin ni; nkum kaa jɔɔ npɔɔn ki li fir nyaŋ wi.

¹⁰ Nkum man wee u kpe-n, ti yaa bir bu le u kpo taaliba ki sei ti biɛn; amaa limiɛfol lan wee u nin jɔɔ-n, u nin be ki sei Uwonbɔr le.

¹¹ Man nmɔn jigin, ni kan ni ba ki kpiɛ ban kpo ki sei tibirin na, amaa Masiya ni, ni jɔɔ limiɛfol ki sei Uwonbɔr.

¹² Mambu ni laa ji che tibir ŋmag ni gbanann tan kpeg nan ni, ki laa chee sei tibir a gbanann nmɔn a bami.

¹³ Laa ta a gbanann a bɔgi ki sei tibir ke npooton a toontunn tiɛri, amaa ta a baa ki sei Uwonbɔr, ki li be ke bininfob ban nyan nkumin ki be limiɛfolin nin; wee ki nin ta a gbanann a bɔgi ki sei Uwonbɔr ke tibuchinn a toontunn tiɛrin.

¹⁴ Tibir kaa ji yin ye a yudaau wi, nan bu-n, nsiim kaa ŋmag ŋi, amaa Uwonbɔr a nyunyunbasanlin bu le a be.

Nbuchin binben a yomir

¹⁵ Ni nin ye nii? Ti li tun tibir ki ke nsiim kaah kaa ji ŋmag ti wee ti be Uwonbɔr a nyunyunbasanlin nin buu? Naa li fir ye man ni!

¹⁶ Naa nyi ke a ta a baa ki sei uninfo uba ki ye u yomu ki cheel u mɔb ke, a sin ye uyom le ki sei wan a mɔb wee a cheel nmɔn, ni ye a chee sei titoonbir le ke a ye titoonbir a yomu le, le ni joorim nan ye nkum le, bee a mu ji jɔɔ limɔcheel ke, ni ma yin che a ŋa uninfo buchin naa?.

¹⁷ Amaa n tenn Uwonbɔr kunɔɔpoog, nin nim ban nan ye titoonbir a yomi wee ki nan nɔɔ nwɔɔnim man wee ni nan gaa nin ni sufu biɛn nin bu.

¹⁸ Ni ŋmar ki nyan tibirin na le ki nin ŋa nbuchin binben a yomi.

¹⁹ N ta bininfosaalib a binbem le ki pag nan bu-n ni tɔɔl a won naaŋin ni jɔɔ idaburig le. A li ke naah nan jɔɔ ni gbanann a bɔgi ki ŋaan tijaginn a toon a yomirin, nin npooton man mann kpiɛgin, daandaan nan ni ta ni gbanann ki ŋa nbuchin binben a yomirin na wee ki li be kasi.

²⁰ Naah nan be tibir a yomirin nin, ni nan be ni wiib le nbuchin binben kaa nan ŋmag ni.

²¹ Ba a nyɔɔr wee ni kan n-yonn nmɔn nin naah ni nan san nan ifa daandaan nan naa? Ni ma biɛn nan a joorim nan ye nkum le!

²² Amaa daandaan nan wee Uwonbɔr fee ni jaa ni tibirin wee ni nin ye Uwonbɔr a yomi nan, tinyɔɔr tan wee ni kan ye kasi a binbem le, le ni joorim ye limiɛfol lan kaa jɔɔ ndiɛm.

²³ Titoonbir a nyɔɔr ye nkum le, amaa le Uwonbɔr a piin ye limiɛfol lan kaa jɔɔ ndiɛm ti Yudaau Masiya ni.