Rom Yaab 5 - UWONBƆR A GBƆNPƆŊ LIKƆƆNL

Taah li ye bininfob ŋam Uwonbɔr ban man

¹ Mambu, ti yada kan che ti ŋa bininfoŋam Uwonbɔr ban nin, li che ti be Uwonbɔr ban nin nposɔɔn ti yudaau Yisa Masiya bu,

² wan a yada bu wee ti kan Uwonbɔr a nyunyunbasanl lan yaan wee ti nin be nan. Le ni mɔ ti nin tama kan wee ti jɔɔ-n ke ti na li por Uwonbɔr a pag.

³ Naa ye man a binba, amaa ti fala a jimin gbaa ni mɔ ti le, nan bu-n fala a jim le jɔɔ nnyiginim chaan;

⁴ nnyiginim li tenn ti nbinben le nbinben tenn ti tama.

⁵ Le tama kaa li che ti ji ifa, nan bu-n Uwonbɔr nan che U Kasi a Naaŋ kan wee U ta sei ti-n le kpaar U jiɛmin ki ŋa ti sufu ni.

⁶ Ni kan na, Uwonbɔr kaah gann isaŋ yan, taah kaa la nan jɔɔ npɔɔn nin bu, le Masiya dan ki nan kpo sei ban kaa jɔɔ nween ni.

⁷ Ni li pɔɔ takpem nin uninfo uba n chee ki kpo uninfo buchin bu, amaa niba ke uba li chee ki kpo uninfo ŋan bu.

⁸ Amaa Uwonbɔr kaah mag ki wɔɔn ti U tɔɔl a jiɛm man wee U jiɛ ti-n ye nan le: Taah le la nan ye tibirdamin, le Masiya kpo ki sei ti.

⁹ Waah ta U chamin ki ŋunn ti ki ŋa ti bininfoŋam nan, nan jon man le ye, U bu le ti yin kan nŋmarim ki nya Uwonbɔr a ŋuufiiŋin yaan;

¹⁰ Taah nan ye Uwonbɔr a duntiibin, le U bija a kumin bu tim nin U ma jir ki mɔŋ nin tab, nan jon man le ye taah jir mɔŋ nin Uwonbɔr nan, U bija a miɛfolin bu ti li kan fee gab.

¹¹ Naa ye ni yaa binba, amaa ni ye nmɔn le ki sei ti Uwonbɔr ban nin ti Yudaau Yisa Masiya wan che tim nin Uwonbɔr jir ki mɔŋin bu.

Adam nin Masiya a bɔr

¹² Mambu, tibir kaah nan nɔɔ uninfo uba bu ki kɔɔn dulinya nan yaan nin, wee u bir nmɔn ta nkum ki dan nin, ni ma che nkum dan bininfob biɛn bu, nan bu-n ti biɛn tun tibira.

¹³ Le nsiim nan nan foon ki miin tibir pii be dulinya ni. Amaa baah kaan tibir nan yaan wee nsiim kaa be.

¹⁴ Amaa nin ni ma biɛn ni, nkum li le ŋmag na nyan Adam a yonn ki nan kpaa Moziz a yonn, hali ki nyaŋ ban kaa tun tibir ke Adam kaah nan tun tibir ki nan bii Uwonbɔr a siimin, Adam nan jɔɔ wan yin ŋɔɔrin nin a nunaŋ le.

¹⁵ Amaa Uwonbɔr a piin yin kaa nann Adam a birin ni. Ni ye bininfob takpem kpo uninfo uba nmɔn a bir bu ke, man ke Uwonbɔr a nyunyunbasanlin ma li jo man, le U piin yan nyann uninfo uba wan ye Yisa Masiya a nyunyunbasanlin nin ma li yab ki tan lagir le Un ta sei bininfob takpem!

¹⁶ Jigin, Uwonbɔr a piin yin kaa nann uninfo uba a birin ni: Tibɔr a jim nɔɔ uba a bir bu le ki ta nkum dan, amaa ipiin yan wee Uwonbɔr ta sei ti-n ma nɔɔ bininfob takpem a toonbir bu le, le Uwonbɔr ke ti bɔr ŋan.

¹⁷ Ni ye uninfo uba a bir bu, le nkum nɔɔ uninfo uba nmɔn bu ki dan ke, man ke Uwonbɔr a buchin piin yan yab ki san ti kunyunyunbaagin ma jon man na, U ma ye Yisa Masiya wan sei ti limiɛfolin.

¹⁸ Mambu uninfo uba a bir bu kaah nan che Uwonbɔr bii bininfob biɛn nin, man mu le uninfo uba a buchin binbem bu mu le che Uwonbɔr bei bininfob biɛn ke bi bɔr ŋan le ki sei bi limiɛfol.

¹⁹ A li ke naah nan ye uninfo uba a mɔyiil bu le nan che bininfob takpem kpann tibirdamin, man mu le uninfo uba a mɔcheel bu mu yin che bininfob takpem n kpann bibuchim.

²⁰ Nsiimin nan kpiɛ le ki che titoonbir pɔr. Amaa le titoonbir kaah pɔr man nmɔn linyunyunbasanlin pɔr jon man na,

²¹ naah ŋa man wee titoonbir che nkum nyaŋ bininfob biɛn nin, man mu le nbuchin binben mu yin che linyunyunbasanl mu n sei ti limiɛfol lan kaa jɔɔ ndiɛmi ti Yudaau Yisa Masiya bu.