Rom Yaab 14 - UWONBƆR A GBƆNPƆŊ LIKƆƆNL

Ni laa ji tab ti bɔri

¹ Ni gaam wan a yada kaa pɔɔ-n na, wee ki laa ji tab tibɔr tan ye limɔkpel a bɔri.

² Uninfo uba a yada bu li fir che un ji tijiir a booli biɛn, amaa uninfo wan a yada kaa pɔɔ-n, u ji tikpinfar a binba le.

³ Wan ji tijiir a booli biɛn nin laa yin wan kaa ji tijiir biɛn nin yɔli, wan mu kaa ji tijiir biɛn nin mu laa galin wan ji tijiir a booli biɛn nin ni, nan bu-n Uwonbɔr gaa u daan na.

⁴ A ye ŋma wee ki li fir galin uba a toontunnu waa? U tɔɔl a yudaau ban le u sisiim bee u lum yin nya. U li sir, Uyudaan li fir che un sir.

⁵ Uninfo uba tiɛr ke lidaal liba ŋan jon yan gurin na, le uba mu tiɛr ke idaa biɛn ye nba le. Che uninfo biɛn n nɔɔ waah tiɛr man u potiɛlin.

⁶ Wan ŋa lidaal liba kasi ki tiɛr ke li ŋan jon idaa yan gurin, u ŋaan man ki tenn Uyudaan le jilima. Uninfo wan kaa kɔ tijiir tiba nan, u ji ti ki tenn Uyudaan le jilima, ni ma bu u poor Uwonbɔr le ki nin ji; wan mu kɔ tijiir tibam nan, u kɔ ti ki tenn Uyudaan le jilima, le ki poor Uwonbɔr.

⁷ Ti ni uba kaa fo be u binba bu, le ti ni uba kaa kpeg u binba bu.

⁸ Ni ye ti fo be ke, ti be ki sei Uyudaan le, ni ye ti ji kpo ke, ti kpo ki sei Uyudaan le. Ni ma bu ti fo bee ti kpo ke, Uyudaan le ye ti.

⁹ Ni niɛ nan bu, le Masiya nan kpo ki fii nkumin naah li ŋa man wee U li ye ban fo nin ban kpo a Yudaau.

¹⁰ Ke fin, ba ŋa wee a ji a nabig tibɔraa? Bee ba ŋa wee a yin a nabig yɔlii? Nan bu-n ti biɛn na li sir Uwonbɔr a nintogil tibɔr a ji bol.

¹¹ Ni sɔb Uwonbɔr a gbɔŋin ke: “Maah ye Uwonbɔr wan fo-n, Uyudaan le len, idun biɛn na li gbaan N nintogil; ilanbil biɛn na li kpiir ki bei Uwonbɔr.”

¹² Ni ma bu, ti biɛn nan na li pag ki wɔɔn Uwonbɔr ti toon kaah ye man.

Laa che a kpiɛtiib nlu

¹³ Mambu ni che ti ta tab a bɔr a jim jiɛn na. Ki che ni li be ni sufu ni ke naa yin ye litangbag gbiɛrikaal bee naa yin leg ni nabig a sami.

¹⁴ Maah be Uyudaan Yisa ni-n bu, maa biɛn ni, tijiir tiba kaa be ki ye tijaginn ti baan tɔɔli. Amaa ni ye uba tiɛr ke tijiir tiba ye tijaginn ke, man ke u ma ban le ti ye tijaginn.

¹⁵ Ni ye a nabig a sufu bii ŋaah ji tijiir tan nin bu ke, man ke ŋaa ji nɔɔ njiɛm a sami. Laa che ŋaah ji tijiir tan nin bii a nabig kan wee Masiya nan kpo u bu-n ni.

¹⁶ Laa che bininfob n pag ki bii nan wee a chee ke ni ŋanin ni.

¹⁷ Nan bu-n Uwonbɔr a naamin kaa ye tijikaar nin tiwann nyuwann a bɔri, amaa mi ye nbuchin binben le, nin nposɔɔn, nin nmɔn Kasi a Naaŋin yaan,

¹⁸ nan bu-n uninfo wan ye Masiya a toontunn u wee ki tun man ke ni gbeeg Uwonbɔr a num le, le bininfob chee sei ke ni ŋan.

¹⁹ Mambu ni che ti pɔɔn ti ba ki tun nan li ta nposɔɔn dan nin nan li pɔɔg tab a sufu ti yada-n.

²⁰ Laa bii Uwonbɔr a toonl tijikaar bu. Tijiir biɛn ŋan, amaa naa ŋan nin uninfo n ji tijiir tan li che u kpiɛg n gbiɛr ki lu.

²¹ Naa ŋan nin a ŋman tinann bee a nyu ndaam bee a tun nan li che a nabig n lu.

²² Mambu ŋaah ŋa tiwann nan yada man a sufu ni li be fin nin Uwonbɔr a sisiigin na. Tikaar be uninfo wan kaa galin uba waah chee sei nan nin bu.

²³ Amaa wan jɔɔ nbiɛnim ki jiin waah ji tijiir tan nin paam wee ki sin jin ti ke u bii u bau. Nan bu-n waah jin nan nin kaa nyan u yada-n ni; nan mu wee a tun wee naa nyan a yada ni ke ni ye tibir le.