Rom Yaab 13 - UWONBƆR A GBƆNPƆŊ LIKƆƆNL

Taah li tun man ki tenn tininkper a pɔɔm

¹ Ni kpaa le nin uninfo biɛn n chee sei ubɔr yudaan a ninkper a pɔɔm kaah wɔɔn man, nan bu-n tininkper a pɔɔm li kaa be kaa ye Uwonbɔr kaah siin man ni. Tininkper a pɔɔm man be-n Uwonbɔr le ta mi ŋa.

² Ni ma bu, wan yii tininkper a pɔɔm a siimin a nɔɔm ke u yii Uwonbɔr kaah siin man nin le, bininfob ban ŋa man ke bi li ban litudaril jaa biba bu.

³ Ni ma bu ban ŋmag tininkper a pɔɔmin kaa ye kuwansanwaŋ ki sei bininfob ban tun nan ŋan ni, amaa ban kaa tun nan ŋan nin. A ban a li be a wiib ki laa san wan ŋmag tininkper a pɔɔmin naa? Man ke li tun nan ŋan na wee un pagiŋ.

⁴ Ni ma bu u ye Uwonbɔr a toontunnu wan li tun nan ŋan le ki sei ni. Amaa ni ye a tun nan kaa ŋan ke, a li san bijawaama, nan bu-n waa ŋmag takoobi yɔli. U ye Uwonbɔr a toontunnu le, wan wee U ta u siin U ŋuufiiŋin yaan ke un dar wan tun titoonbir a tul.

⁵ Mambu, ni kpaa le nin ti li jɔɔ limɔcheel ki tenn ban ŋmag tininkper a pɔɔm, wee ni laa ye taah li ŋa man ki nya litudarilin a binba, amaa naah li ŋa man wee ni potiɛl nlaa galin ni.

⁶ Ni niɛ nan bu le ni yɔ lampo, ni ma bu ban ŋmag tininkper a pɔɔm ye Uwonbɔr a toon tum le, ban ta bi saŋi biɛn sei tininkper a pɔɔm a siimin a ŋmagim.

⁷ Tun sei uninfo biɛn naah kpaan a tun sei u man na: Ni ye lampo a pɔnl le nɔɔŋ ke, a yɔ lampo nmɔn na; ni ye nchaarim a pɔnl le nɔɔŋ ke, a chaara; wan kpaan nin a sei u jilima ke, a sei mu, wan kpaan a don u ke a don mu.

Taah li tun man ki tenn tab

⁸ Ni laa che lipɔnl liba ngur dɔ kaa yɔn ni, man ke lipɔnl lan le gbaa be ki ye ti li jiɛ tabin a binba, ni ma bu wan jiɛ uninfosaal kpiɛg ke u gbeen nsiimin na.

⁹ Nsiim man ye, “Laa tun iwanchɔgin toon ni,” “Laa ku,” “Laa su,” “Laa jɔɔ linunchɔril a kpiɛg a wann bu,” nin nsiim man gurin biɛn, i lagin ki be lisiinjal liba nan yaan le: “Li jiɛ a kunkɔɔn tab ke ŋaah jiɛ a ba man nin.”

¹⁰ Njiɛm kaa tenn kunkɔɔn tab kidaŋi mambu njiɛm ye nan gbeen nsiimin le.

¹¹ Ni ŋaam nan, ni biɛm taah be n-yonn man daandaan nan a taai ya. Isaŋ foo nin ni ligir ni jiɛmin na, nan bu-n ti feegabin mal ti ki jon taah nan chinn ŋa yada n-yonn man nin na.

¹² Kutaag a wonim mala; le nweehn be forin le nmɔn. Ni ma bu ni che ti ta libunbɔnl a toon yin ki bil ngbaan wee ki ta nwonween a gbaginu ki yee.

¹³ Ni che ti binbem li ween na, a li ke ti be nweehn le-n, ki laa ye ban nyu ndaam a booli biɛn bee bidanyugbeebi, ki laa tun iwanchɔgin toon ti piibanlin bee ti jabanlin nin iwanjaab toon a boolin yi, ki laa jɔɔ imɔkpel nin lipiiponli.

¹⁴ Amaa ni ta Uyudaan Yisa Masiya ki yee ke kuwan yee waŋin, ki laa ban nsan man wee ni li nɔɔ ki tun tigbanann a kɔlisa birugin a bami.