Rom Yaab 12 - UWONBƆR A GBƆNPƆŊ LIKƆƆNL

Ban tun Uwonbɔr a toon a binbem

¹ Mambu, n balin ni le n nabum, Uwonbɔr a nyunyunbasanl bu, ni ta ni gbanann ki ŋa liwanfol a manug, kan be kasi ki gbee Uwonbɔr a num, ni ma ye liwonjiɛnl a toonl kinaaŋin.

² Ni laa chee sei dulinya nan yaab a binbem jigin ni, amaa ni mann pɔŋ ni potiɛla wee ni binbemin kpenn. Ni ma le ni li fir mag ki chee Uwonbɔr a bam kaah ye man. U bam man ŋan ki jɔɔ linungbeel ki be chasi-n.

³ Uwonbɔr kaah sam kunyunyunbaag kan nin bu le n bei ni biɛn nan ke: Uba laa tiɛr ke u ye lininfo gbingbemil ki jon waah be man nni, amaa che uninfo biɛn li tiɛr ibamɔn a bɔjil ki tenn u bau, ke yada kan wee Uwonbɔr ta sei win kaah kpaa man nin.

⁴ A li ke ti biɛn nan kaah jɔɔ gbanann tiba wee ti jɔɔ ibɔg man ni, igbanann bɔg nmɔn biɛn kaa lagin tun litoonl liba,

⁵ man mu le ye ni Masiya ni, ti ninfo gbaluŋ le lagin ki ŋa tigbanann tiba, le ligbanann bɔgil liba ye igbanann bɔg yan gurin yaan le.

⁶ Ti jɔɔ ipiin balbal le, ke Uwonbɔr kaah sei ti U nyunyunbasanl lan nin. Ni ye wan a piin ye ilinlen leen a pagim ke, che un ta tun u yada kaah kpaan man.

⁷ Ni ye wan a piin ye un tun ke, che un tun; wan a piin ye u li wɔɔn ke, che un wɔɔn;

⁸ ni ye wan a piin ye u li pɔɔgir u tab a gbanann ke, che u li pɔɔgira; ni ye wan a piin ye u li chaar tijiir ki ter bitab bi bɔr mugkaarin ke, che u li pu man na; ni ye wan a piin ye un ŋa usanliir le ke, che u li jɔɔ nsaliibinben nbamɔm; ni ye wan a piin ye u li san bininfob kunyunyunbaag le ke, che u li ŋaan man nin npopeen na.

⁹ Ni kpaa le nin njiɛm le ye ibamɔn. Ni li nan nan ye tibir; ki li ŋmag nan ŋan nin kenken.

¹⁰ Ni ta ni baga ki ŋa kunabitiig a jiɛmin yaan. Ki li tenn tab jilima ki jon ni tɔɔl.

¹¹ Ni laa san ligbanyagili, amaa wee ki li ŋmag kinaaŋin ni sufu ni, ki li tun tenn Uyudaan na.

¹² Ni che ni li mɔ na ni tama ni, ki li jɔɔ limɔril ni bɔr mugkaarin, ki li jɔɔ yada ni wonmiɛlin.

¹³ Ni li por naah jɔɔ nan ki tenn Uwonbɔr a ninfob ban ye bilanjiimin na. Ki li ŋaan bininfob tiŋann na.

¹⁴ Ni li kaab tikaar jaar ban mugir ni buu; ni li kaaba ki laa poog imɔɔŋ ki ŋaan bi.

¹⁵ Ni li jɔɔ nmɔn nin naah mɔ ban nin na; ki li wii nin ban wii-n na.

¹⁶ Ni li be nin tab nin nmɔn na. Ni laa jɔɔ kalanbaani; amaa ni chee ki li be nin bilanjiima. Ni laa wɔɔn ni biɛmi.

¹⁷ Ni laa ta uba a bir ki yɔ wi. Maan ni ba ki tun nan ŋan uninfo biɛn a numin.

¹⁸ Ni ye a bi li fir ke, naah tɔɔ a bu nan, li be nin nposɔɔn nin uninfo biɛn na.

¹⁹ Ni laa ta tibir ki yɔ tibiri, n jɔtiib, amaa ŋa npaan sei Uwonbɔr a ŋuufiiŋin, ni sɔb Uwonbɔr a gbɔŋin ke: “Ni ye min le n jiin; min le yin yɔ bi,” Uyudaan le len man.

²⁰ Amaa: “Ni ye nkom jɔɔ a dataag ke, a jim mu; ni ye nnyunyum jɔɔ u ke, a sei mu nnyum wee un nyu. Ni ye a tun ni niɛ nan ke, a yin jin u ifa le.”

²¹ Ni laa che tibir n nyaŋ ni, amaa ni ta nan ŋan ki nyaŋ tibira.