Tibɔkpiirkaan 9 - UWONBƆR A GBƆNPƆŊ LIKƆƆNL

¹ Le malaka wan kpiɛ miŋmu mu pee u naatuŋ, le n kan liŋmabil kaah nyan kitilangbɔŋ bu ki nan lu tum. Le bi sei liŋmabilin libogil lan nyɔɔ kaa jɔɔ tarig nmɔn a piim.

² N-yonn man wee u loor libogil lan nyɔɔ kaa jɔɔ tarigin, le tikpinnyir nyan niin ki nann nŋmi takpen a kpinnyir, le tikpinnyir nmɔn nan bɔŋ nween nin titilangbann.

³ Le itɔɔn nan nyan tikpinnyir nmɔn yaan ki lunn tum, le Uwonbɔr sei bi npɔɔn ke inɔɔn kaah jɔɔ npɔɔn man dulinya nan yaan nin.

⁴ Uwonbɔr nan bei bi ke bi laa sei dulinya nan a mɔɔr bee tiwann bu wan bee isiigi kidaŋi, amaa bin sei bininfob ban kaa jɔɔ Uwonbɔr a daagim bi yutun bu-n a binba.

⁵ Uwonbɔr kaa nan sei bi npɔɔn ke bin ku bininfobi, amaa ke bin mugir bi ki tan kpaa iŋmal iŋmu. Ntiton man wu ke unɔɔn kaah jun uninfo ke ni wu man nin.

⁶ Iyaayoo bininfob na li ban nkum, amaa le kaa li kan ni; bi na li ban bin kpo amaa le nkum na li guun ki jiɛn bi.

⁷ Itɔɔn nmɔn nan nann itaan yan wee bi ŋai bitɔb a sili-n le. Bi nan chig niba bi yuli bu le ni nann salima a naam a yuchigirig, le bi num paam nann bininfosaalib a num paam.

⁸ Bi kor nan nann bipiib a yukper le, le bi nyin mu nann igbegin a nyin.

⁹ Bi nan jɔɔ ngbingban tegirim man nann tikur a gbingban tegirim le, le bi kpinkpann fu ke itaan takpem kaah dar torokom ki chaa bitɔb a tom ke ni fu man nin le.

¹⁰ Bi jɔɔ ijoo le ki junn ke inɔɔn nin, bi jɔɔ npɔɔn bi jo-i nmɔn yaan ki li fir mugir bininfob iŋmal iŋmu.

¹¹ Bi nan jɔɔ wan ye ubɔr le u ye libogil nmɔn yaan a malaka, ki ye ubiir.

¹² Chinchinn a nan bir ma jon na; nan bir milee la chaan.

¹³ Le malaka wan kpiɛ miloob mu pee u naatuŋ, le n gbir likukɔl liba nyan salima a binbinlin lan be Uwonbɔr a nintogilin.

¹⁴ Le likukɔl nmɔn bei malaka wan kpiɛ miloob ki jɔɔ kunaatuŋin ke, “Lor malakam bina ban wee bi lol bi nkpen takpen man wee bi yi ke Yufiratiisi n yaan ki jaau.”

¹⁵ Le u nan lor malakam ban pii nan ŋa sili ki guu isaŋ, nin lidaal, nin li ŋmalu, nin libinl nmɔn ke bin ku bininfob a bɔgirim nkerim mitaa a kerim nba-n.

¹⁶ Le n gbir bitɔtogib ban jig itaan nin a kanl, le bi kanl nan ye tur a tur a kobilee. N gbir bi kanl la.

¹⁷ Maah nan kan itaan nin bitanjigib nmɔn nin, n zii ni, ni nan nann nan le: Bitanjigibin nan jɔɔ bigbingban tegirim man man ke nŋmi-n, ki be ke buginu, ki ye nduuyom a li ke lichibilin. Le itaan nin a yuli nann igbegin a yuli, le nŋmi nin tikpinnyir nin lichibil nyan bi mɔɔŋin ni.

¹⁸ Le imag itaa yan ye nŋmi nin tikpinnyir nin lichibil yan nyan itaan a mɔɔŋi ni nan ku bininfob a bɔgirim nkerim mitaa a kerim nba.

¹⁹ Itaan nin a pɔɔm nan be bi mɔɔŋin nin bi joi ni le, nan bu-n bi joi nan nann iwaa le, ki jɔɔ iyul, le bi jɔɔ junn bininfob.

²⁰ Le bininfob ban gur wee imag nan kaa ku bi nan, kaa nan chee ke bin kpenn ki ta bitɔɔl kaah maa nan nin ki gabi, baa nan ta npɔniim a jiɛnim ki jiɛn ni, nin ibawol yan wee bi ta salima ki maa i, nin salima nin tikur ninann nin tikurdiin nin itangbag nin tidaar, kaa chee bin ta bi bawoli yan kaa gaa bee kaa gbiri bee kaa choon nin gabi.

²¹ Le kaa chee kpenn bi binben ki jiɛn lininfokuli, nin inyɔg a toon, nin iwanchɔgin toon, nin nnaayigimin.