Tibɔkpiirkaan 7 - UWONBƆR A GBƆNPƆŊ LIKƆƆNL

Iziral yaab turikobig nin turpina nin turina (144,000) a bɔr

¹ Ni bɔɔn bu le n kan malakam bina kaah si dulinya nan a logi ina-n yaan ki choo nfaam man nyan ilog ina-n nin ŋmag ke mi laa daar kɔɔ kutingbɔŋin ni bee limɔgilin ni bee ki daar busub bu.

² Le n ji kan malaka uba le u nyan liwonpɔɔnl paam ki ŋmag Uwonbɔr wan fo-n a wann tabin wann. Le u yin nin nkukɔpɔɔn ki bei malakam bina ban wee bi sei bi npɔɔn ke bin sei kutingbɔŋ nin limɔgilin kidaŋin ke:

³ “Ni laa sei kutingbɔŋ bee limɔgil bee isiig kidaŋi, hali nin taah na li ta tiwann tabin wann ki tabin ti Wonbɔru a toontum a yutun bu.”

⁴ Le n nan gbir baah tabin ibol yan biɛn nyan Iziral a kanlin: Le bi kanl nmɔn nan ye turikobig nin turpina nin turina, ibol yan biɛn nyan Iziral.

⁵ Juda a mɔfiigin bininfob turpiig nin turilee le bi nan tabin bi, le Rubenn a mɔfiigin bininfob turpiig nin turilee le bi nan tabin, le Gad a mɔfiigin bininfob turpiig nin turilee le bi nan tabin,

⁶ Aser a mɔfiigin bininfob turpiig nin turilee le bi nan tabin, le Nafitali a mɔfiigin bininfob turpiig nin turilee le bi nan tabin, le Manaasa a mɔfiigin bininfob turpiig nin turilee le bi nan tabin,

⁷ le Simiɛn a mɔfiigin, bininfob turpiig nin turilee le bi nan tabin, le Liifai a mɔfiigin, bininfob turpiig nin turilee le bi nan tabin, le Isakar a mɔfiigin, bininfob turpiig nin turilee le bi nan tabin,

⁸ le Zebulun a mɔfiigin, bininfob turpiig nin turilee le bi nan tabin, le Josef a mɔfiigin, bininfob turpiig nin turilee le bi nan tabin, le Bɛnjamɛnn a mɔfiigin, bininfob turpiig nin turilee le bi nan tabin,

Kuninfogbaluŋ a bɔr

⁹ Ni bɔɔn bu le n lig ki kan kuninfogbaluŋ n nintogil ban wee uba kaa li fir kan bi kanli, bi nan nyan ininfobool, nin imaal, nin bininfob, nin ileen biɛn nin le, ki si kunaangbɔŋin ban Kipeebigin a nintogil. Bi nan yee tiwanpenn le ki ŋmag tikpikpagbann bi nɔɔn.

¹⁰ Le bi mɔɔ nin nkukɔpɔɔn ki ke: “Feegab ye Uwonbɔr yaan le, wan ka kunaangbɔŋ bu-n, ki ji ye Kipeebigin yaan le.”

¹¹ Malakam biɛn nan si le ki gɔɔn kunaangbɔŋin, nin bininkpeebin nin tiwann naan wann tan fo tina-n. Le bi nan lu ki ta bi num chigin tum kunaangbɔŋin a nintogil ki jiɛn Uwonbɔr

¹² ki ke: “Ibamɔn! Ndom nin kupag, nin nlamgɔrikaam nin kunɔɔpoog nin jilima nin npɔɔn nin ngbananpɔɔn ye ti Wonbɔru yaan le hali nin iyoo yan kaa jɔɔ diɛmi. Ibamɔn!”

¹³ Le bininkpeebin a ni uba baanim ke, “Ban yee tiwanpenn nan ye ŋmam maa, bee bi nyan laa?”

¹⁴ Le n jiin ke, “N yudaau, fin le nyi.” Le u len ke, “Bi ma ye ban nyann limug takpenl a poolin; ki ye ban wee bi ta Kipeebigin a cham ki ŋunn biwan yɔɔr le ti nin peen.

¹⁵ Mambu, “Bi be Uwonbɔr a naangbɔŋin a nintogil le ki tun tenn Uwonbɔr nween nin kunyiɛg u wonjiɛndiigin; le wan ka kunaangbɔŋ bu-n li nyann u nanboŋin ki piin bi bu.

¹⁶ Nkom kaa ji li choo bi; nnyunyum kaa ji li choo bi, nween mu kaa li faa bi, bee nan ton biɛn nin.

¹⁷ Nan bu-n Kipeebig kan ka kunaangbɔŋ bu ki be bi sisiigin nin, le yin ye bi peekpaaru; u li ta bi ki jo limiɛfol a nyunbuŋin. Le Uwonbɔr li pir bi num a nyinyinn biɛn.”