Tibɔkpiirkaan 6 - UWONBƆR A GBƆNPƆŊ LIKƆƆNL

Tiwann tabin wann a bɔr

¹ Le n kan Kipeebigin kaah tabir chinchinn a wan tabin waŋ mulile-n a poolin. Le n gbir tiwann naan wann tan fo tina-n a ni uba a kukɔl kaah tann papaab ke utaalin ki ke, “Dan!”

² Le n nan lig ki kan utanpeen n nintogil! Le wan jig utaan nmɔn ŋmag butɔm, le bi sei u nnaam a yuchigirig, le u nyan ke unyaŋirin ki sin bon un nyaŋ.

³ N-yonn man wee Kipeebigin tabir kuwan tabin waŋ kan kpiɛ milee-n, le n gbir tiwann naan wann tan fo wan kpiɛ milee-n kaah len ke, “Dan!”

⁴ Le utaan uba ji nyan ki ye utanman. Le wan jig utaan nmɔn nan gaa npɔɔn ke un choo nposɔɔn nyan dulinya nan yaan, ki che bininfob n kɔr tab. Bi nan ta takoobi takpeŋ le ki sei u.

⁵ N-yonn man wee Kipeebigin tabir kuwan tabin waŋ kan kpiɛ mitaa-n, le n gbir kuwan naan waŋ kan fo ki kpiɛ mitaa-n kaah len ke, “Dan!” Le n lig, ki kan utanbɔn n nintogil! Wan nan jig utaan nmɔn nan ŋmag nan wee bi jɔɔ magir tiwann yɔɔrin tilee le u nɔɔn.

⁶ Le n gbir tifur tiba le ti nann likukɔl ki nyan tiwann naan wann tan fo tina nmɔn a sisiigin ki len ke, “Iyoo a kuliba kuba ye utoontunn a ween nba a yɔr le, ikɔɔn mu a kuliba itaa mu ye utoontunn a ween nba a yɔr, amaa laa bii nkpam nin ndaami!”

⁷ N-yonn man wee Kipeebigin tabir kuwan tabin waŋ kan kpiɛ mina-n, le n gbir kuwan naan waŋ kan fo ki kpiɛ mina-n a kukɔl kaah len ke, “Dan!”

⁸ Le n lig ki kan utanpeen lalag! Le wan jig utaan nmɔn a yinl ye Nkum, le Kitakpiin tiŋ yaab nɔɔ u bɔɔn ki mal u. Le Uwonbɔr sei bi npɔɔn ke bin ku dulinya nan a ninfob nbɔgirim mina a poolin nkerim nbau, ke bin ta takoobi, nin nkom, nin iwiɛn, nin dulinya nan a wan bir ki ku bi.

⁹ Waah nan tabir kuwan tabin waŋ kan kpiɛ miŋmu-n, le n kan ban wee bi nan kɔrin a tinnaam kumanug a binbinlin a nyagilin, nan bu-n Uwonbɔr a mɔleen nin siɛra kan wee bi nan ŋmagin.

¹⁰ Le bi nan yin nin nkukɔpɔɔn ki ke, “Uyudaan wan jɔɔ npɔɔn biɛn, fin wan ye kasi nin ubamɔndaan, ni yin yuur ki tan kpaan niin a tarig wee a ji dulinya nan yaab tibɔr ki jiin ti cham a pɔnlaa?”

¹¹ Le bi nan sei bi biɛn daalapeen fufɔbir, ki bei bi ke bin guur wamau hali nin bitoontum tab nin bi nabum ban wee bi na yin ku ke baah nan ku bi miɛnin man nin a kanlin nan foo.

¹² Le n lig ki kan waah tabir kuwan tabin waŋ kan kpiɛ miloobin. Le kutingbɔŋ dam takpem. Nween labir libunbɔnl ki nann botu a kinkenl lan wee bi ta tiŋɔɔkor ki naan nin, le uŋmal mu mann ke nchamin,

¹³ le iŋmabil nyan titilangbann nin ki nan lu tum, a li ke ntafapɔɔrim kaah ti ŋa ke mi daar bikinkam a sub wee iloonkal ker lur man nin.

¹⁴ Le kitilangbɔŋ kpab kpab ke kugbɔŋ kpabkaagin, le ijɔɔ nin igungon yan be nnyum a sisiigin fɔɔr i sisibol.

¹⁵ Le dulinya a bɔrtiib, nin nbɔrbum, nin bitɔtogib a sanliib, nin biwandam, nin ininfojal, nin biyom biɛn nin ban kaa ye biyom woo titangbafiɛrin nin titanpirin.

¹⁶ Le bi yin ijɔɔ nin titanpirin ki len ke, “Ni lu ti bu ki woon ti ni wee wan ka kunaangbɔŋin bu-n laa ji kan ti, wee Kipeebigin mu a ŋuufiiŋin laa pii ti!

¹⁷ Nan bu-n, bi ŋuul a fiim a daal takpenl nmɔn foon na, ke ŋma li fir siraa?”