Tibɔkpiirkaan 5 - UWONBƆR A GBƆNPƆŊ LIKƆƆNL

Kugbɔŋ kpabkaag nin Kipeebig a bɔr

¹ Le n kan wan ka kunaangbɔŋin bu kaah ŋmag kugbɔŋ kpabkaag u nɔɔjiim, le kugbɔŋ nmɔn jɔɔ nsɔbim ku bɔɔn nin ku nintogil, le bi ta tiwann tan tabin tilile ki tabin piin ku bu.

² Le n kan malaka wan jɔɔ npɔɔn takpem kaah tann papaab takpem ki len ke, “Ŋma kpaan ki li fir tabir tiwann tabin wan nan wee ki loor kugbɔŋ kpabkaag nmɔn naa?”

³ Amaa uba kaa nan be paab a naamin bee dulinya nan yaan bee kitakpiin tiŋ ki na li fir loor kugbɔŋ kpabkaag nmɔn bee ki lig ku poolin ni.

⁴ Le n mɔɔ ki mɔɔ nan bu-n uba kaa nan be ki kpaan un loor kugbɔŋ kpabkaag nmɔn bee ki lig ku poolin ni.

⁵ Le bininkpeebin a ni uba beim ke, “Laa mɔri! Lig, wan ye ligbeginl wee ki nyan Juda a maalimin nin, ki ye Defid a yaabilin, u nyaŋ niwann biɛn na. U li fir tabir ndaagim mulile-n ki loor kugbɔŋ kpabkaag nmɔn.”

⁶ Le n kan Kipeebig, le ki nann ke bi kɔr ki le-n, le ki si Kunaangbɔŋin a sisiigin, le tiwann naan wann tan fo tina-n nin bininkpeebin gɔɔn u. Kipeebig nmɔn nan jɔɔ iyinh ilile le nin inunbil ilile, ni ma nan ye Uwonbɔr a naam milile ban wee u nan tun bi dulinya nan a logi ina-n yaan biɛn ni.

⁷ Le u dan ki nan gaa kugbɔŋ kpabkaag nmɔn wan ka kunaangbɔŋin bu a nɔɔjiimin ban.

⁸ Waah nan gaa kugbɔŋ nmɔn ki diɛ-n, le tiwann naan wann tan fo tina-n nin bininkpeeb pilee nin bina-n sɔɔn tum Kipeebig nmɔn a nintogil. Bi biɛn nan jɔɔ tibiɛr le nin salima a yir, le nnyɔgkusim gbee bi sam nmɔn yaan, ki ye Uwonbɔr a ninfogannkaabin a wonmiɛl.

⁹ Le bi gaah ilan pɔɔn ki ke, “Fin le kpaan nin a yuur kugbɔŋ nmɔn ki loor ndaagimin, nan bu-n fin le bi nan kɔr, le a ta a cham ki da bininfob ki sei Uwonbɔr ki nyan imaal biɛn nin ileen biɛn, nin bininfob biɛn nin ibol biɛn ni.

¹⁰ Le a jin bi nnaam, ki ta bi ŋa biminmanib ke bi li jiɛn ti Wonbɔru, le bi na li kal kunaangbɔŋin bu.”

¹¹ Le n lig ki gbir malakam takpem a kukɔli, le bi kanl ye turil turil, nin turpiig a turpiig. Le malakam nmɔn nan gɔɔn kunaangbɔŋin nin tiwann naan wann tan fo tina-n nin bininkpeebin.

¹² Ki gaah ilan nin ikukɔl yan pɔɔ ki ke, “Kipeebig kan wee bi nan kɔrin le kpaan, nin un gaa npɔɔn nin lifaal, nin nlamgɔrikaam, nin ngbananpɔɔn, nin jilima nin kupag nin ndom!”

¹³ Le n gbir nan biɛn wee Uwonbɔr nan naan, wee ni be paab, nin kutingbɔŋ nan yaan, nin kitakpiin tiŋ nin nan be nnyumin, nin nan biɛn be i yaan, kaah gaah ilan ki ke, “Ndom nin jilima nin kupag nin npɔɔn li be wan ka kunaangbɔŋin bu nin Kipeebigin bu, hali nin isaŋ yan kaa jɔɔ diɛm.”

¹⁴ Le tiwann naan wann tan fo tina-n len ke, “Ibamɔn” le bininkpeebin sɔɔn tum ki jiɛn Uwonbɔr.