Tibɔkpiirkaan 4 - UWONBƆR A GBƆNPƆŊ LIKƆƆNL

Paab a wonjiɛnl

¹ Ni bɔɔn bu le n nan lig, ki kan paab a naam a naanganl kaah loor ki yaa. Le likukɔl lan wee n pii nan chinn gbir wee li nann kunaatuŋin beim ke, “Donn do, wee n wɔɔniŋ nan kpaa talar ki na yin tun ni niɛ nan biɛn a bɔɔn.”

² Libol nmɔn n nan be nin Kinaaŋ le, ki kan kunaangbɔŋ kaah be paab le uba ka ki bu.

³ Le wan nan ka ki bu nmɔn nan nyagin le ke sataŋ nin lichabilin. Le uwaakpajatooŋ nan jin kunaangbɔŋ nmɔn ki tan to litangbagil lan nann kisikpinnsiig.

⁴ Le tinaangbann pilee nin tina nan gɔɔn kunaangbɔŋ nmɔn, le bininkpeeb pilee nin bina nan ka ti bu. Bi nan yee tiwann penn le ki chig salima a naam a yuchigirim bi yuli bu.

⁵ Le kitajug nyagin ki nyan kunaangbɔŋ nmɔn yaan, nin utaal a dundunl nin titintann. Le filaam bilile si niin ki gaan. Ni niɛ nan le ye Uwonbɔr a naam milile.

⁶ Le niwann niba mu nan be kunaangbɔŋ nmɔn a nintogil ki nann niɛnu a maar tan yaalin ke limɔgilin. Niɛnu a maarin a sisiigin, kunaangbɔŋ nan be, le tiwann naan wann tan fo tina nan be ki gɔɔn ki. Le bi bɔɔn nin bi nintogil biɛn nan ye inunbil.

⁷ Chinchinn a wanfolin nan nann ugbegin le, le wan kpiɛ milee mu nann unaaja, wan kpiɛ mitaa n mu a num nann uninfosaal, le wan kpiɛ bina-n mu nann libaanweenl lan yugiri paab.

⁸ Tiwann naan wan tan fo tina nmɔn biɛn nan jɔɔ tikpinkpann tiloloob, le bi gbanann biɛn ye inunbil, hali nin bi ŋmiɛn nin na. Le nween nin kunyiɛg biɛn baa jiɛn ni le ki ke, “Kasi, kasi, kasi, le ye Uyudaan Uwonbɔr Npɔɔn biɛn daan, wan nan be, ki la be, ki la yin dan.”

⁹ Ni ye tiwann naan wan tan fo tina-n nan sei wan ka kunaangbɔŋ bu ki gbaa be kaa jɔɔ diɛmin kupag, jilima nin ipoor ke,

¹⁰ bininkpeeb pilee nin bina-n lur wan ka kunaangbɔŋin bu n yaa taatum le, ki jiɛn uma wan be wee kaa jɔɔ diɛmin. Bi chigir bi naam a yuchigirim le bil kunaangbɔŋin yaan ki len ke:

¹¹ “Ti Yudaau Uwonbɔr, a sin kpaan, a gaa kupag nin jilima nin npɔɔn na nan bu-n fin le nan naan niwann biɛn, a bam bu le bi nan naan niwann biɛn, le ki fo be.”