Tibɔkpiirkaan 3 - UWONBƆR A GBƆNPƆŊ LIKƆƆNL

Ntoon man chaa Sadisi yaab ban

¹ Ki ji ke, “Sɔb sei Sadisi yaab a wonjiɛm a lagim a malaka ke: Wan ŋmag Uwonbɔr a naam milile nin iŋmabil ilile-n a mɔleen sɔ. N nyi ni ŋaar kaah ye man; bininfob nyi ke ni fo le amaa ni kpou.

² Ni fii paaba! Wee ki pɔɔg nan gur ki ban nin kpe-n, nan bu-n maa kan ni ŋaar tan ŋan ki gbee Uwonbɔr a numi.

³ Mambu, ni li tiɛr, nan wee ni gaa ki gbirin; ni chee sei tibɔr nmɔn na, wee ki kpenn ni binbema. Amaa ni ye naa fii paab ke, n li dan ke unaayig a dann nin, le naa yin nyi n-yonn man wee n yin dan ni.

⁴ Amaa ni jɔɔ bininfob wama Sadisi ban kaa che bi wan yɔɔr gbarin niba. Min nin bi ma na yin lagin chonn ki yee tiwanpenn, nan bu-n bi kpaan nin man le.

⁵ Wan fir nyaŋ ke u li yee tiwanpenn ke baah yee man nin. Maa li nyan udaan a yinl limiɛfol a gbɔŋin yaan ni, amaa le ki na li tiɛr u yinl n Baa nin U malakam a nintogil.

⁶ Wan jɔɔ litul ke, ni che un gbir Kinaaŋ kaah bei biwonjiɛm a laginn man.”

Ntoon man chaa Filadelifiya yaab ban

⁷ Ki ji ke, “Sɔb sei Filadelifiya a wonjiɛm a laguŋ a malaka: Wan be kasi ki ye ubamɔndaan ki ŋmag Defid a naanganl a piimin a mɔleen sɔ. U loor nan ke uba kaa li fir loon ni, le nan mu wee u loon ke uba kaa be ki li fir loor ni.

⁸ N nyi ni ŋaar kaah ye man. Ni lig, n loor ntisamɔn le ki sei ni le uba kaa li fir loon ntisamɔn nmɔn ni. N nyi naah jɔɔ npɔɔn wama, amaa ni biɛn yɔli ni ŋmag n mɔleen le kaa yii n yinli.

⁹ N li ŋa ban be Sintani a jiɛndiigin, wee ki ke bi ye Juu yaab amaa wee kaa sin ye Juu yaabin, ki ye bilinlaribin, n li che bin dan ki nan gbaan ni taatum ki tiɛr ke n jiɛ ni.

¹⁰ Naah nyigin wee ki jɔɔ limɔril ki ŋmag n siimin bu, n na li nyan ni limugil lan yin foon ki nan mag ban be dulinya nan yaan biɛn nin.

¹¹ N chaan le daandaan nan. Ni li ŋmag nan wee ni jɔɔ nna, wee uba laa nan fee ni naam a yuchigirigi.

¹² Wan nyaŋ ke, n li ŋa udaan Uwonbɔr a diig a jaantelig. Le waa ji li nya niin ni. N li sɔb n Wonbɔru a yinl nin n Wonbɔru a tiŋ kan ye Jerusalam pɔŋin ki paan u bu, kan yin nyan paab n Wonbɔru ban wee ki jiirin nin; le ki ji sɔb n mu a yin pɔnl ki paan u bu.

¹³ Wan jɔɔ litul ke, ni che un gbir Kinaaŋ kaah bei biwonjiɛm a laginn man.”

Ntoon man chaa Laodisiya

¹⁴ Le ki ji ke, “Sɔb ki sei Laodisiya a wonjiɛm a malaka ke: Wan a yinl ye Ibamɔn nin, nin ibamɔn a yada a siɛradaan wee ki ŋmag nan biɛn wee Uwonbɔr naan nin a mɔleen sɔ.

¹⁵ N nyi ni ŋaar kaah ye man, naa ton ni kaa ji sɔɔn ni. N bi ban ke ni li ye ban ton le bee ban sɔɔn!

¹⁶ Ni bu, naah ton mala mala wee kaa ton kaa ji sɔɔn nin, n yin sii ni le n mɔn ki gab.

¹⁷ Nim len le ke, ‘N ye uwandaan le; N ye wan jɔɔ le kaa ji ban niba.’ Amaa le kaa biɛ ke ni ye tikpachar le, ki jɔɔ kunyunyunbaag nin faladam ki ye bijɔɔm ban gaan nin ijakpalon.

¹⁸ Mambu n kpaan ni le ke ni daam salima kan pul nŋmi-n wee ki mann nin n ban, wee ni ŋa biwandam; ki ji daa tiwann yɔɔr penn tan wee ni li yee, ki fir degin ni fai naah gaan nin bu; wee ki daa nnunkpam n ban ki li balig wee ki ga.

¹⁹ Ban wee n jiɛ-n, bi ma le n fu bi bu ki dar bi tuli. Mambu ni ŋaam kinunmaŋ ki kpenn ni binbema.

²⁰ Min sɔ! N si ntisamɔn ki kpaar linaanganl. Ni ye wan gbir n kukɔl wee ki loor linaanganl ke, n li kɔɔ wee ki nan ji nin u, wee u mu nji nim.

²¹ Wan fir ki nyaŋ ke, n li sei udaan nsan wee min nin uma n nan lagin ki kal n naangbɔŋin bu. A li ke maah nan nyaŋ wee min nin n Baa lagin ki kal U naangbɔŋ bu man nin.

²² Wan jɔɔ litul ke, ni che un gbir, Kinaaŋ kaah bei biwonjiɛm a laginn man.”