Tibɔkpiirkaan 2 - UWONBƆR A GBƆNPƆŊ LIKƆƆNL

Ntoon man chaa Efesusi yaab ban

¹ Le u beim ke, “Sɔb sei Efesusi a wonjiɛm a malaka ke: Wan ŋmag iŋmabil ilile u nɔɔjiimin wee ki choon salima a filaam a tɔɔnbol ilile-n a mɔleen sɔ:

² N nyi ni ŋaar, ni nunman nin ni mɔril man. Ki ji nyi naah kaa ban bininfob ban a pooi to, mambu le ni nan mag ban nan ke bi ye itoon wee kaa sin ye-n ki biɛ baah ye tibɔkardam man.

³ Ni jɔɔ limɔril le ki jin fala n yinl bu, amaa le naa bagi.

⁴ Amaa nan bu wee n galin ni sɔ: Ni jiɛ-n ni chinchinn a jiɛmin nna.

⁵ Ni tiɛrim naah nan nyan nan fɔg man wee ki nan lunn! Ni kpenn ni binbema wee ki li tun ke naah nan tun man chinchinn nin na. Ni ye naa kpenn ke, n li dan ki nan yuur ni salima a filaam a tutɔɔnbolin kisisibol.

⁶ Amaa naah ŋaan nan wee ni ŋan sɔ: Ni nan titoonbir tan wee Nikolatan yaab tun ni, ke n baantɔɔl kaah kaa nan ti man nin le.

⁷ Wan jɔɔ litul ke, ni che un gbir Kinaaŋ kaah bei biwonjiɛm a laginn man. Wan fir nyaŋ ke, n li sei u npaan wee un ji limiɛfol a siig a looi, yan be Uwonbɔr a kpaabin.”

Ntoon man chaa Simarina yaab ban

⁸ Le u ji ke “Sɔb sei Simarina a wonjiɛm a malaka ke: Wan ye Npiinim nin Njoorim, wan nan kpo wee ki ji fii nkumin nin a mɔleen sɔ.

⁹ N nyi ni fala a jim bu nin naah ye faladam, amaa ni ye bijɔɔndam le! Ki nyi biba kaah jɔɔ kutingbiig ki bei ni ke bi ye Juu yaab le amaa kaa sin ye; amaa bi ye Sintani a wonjiɛndiig a ninfob le.

¹⁰ Ni laa che bijawaam jɔɔ ni fala kan wee ni yin ji nbu. N bei ni le, Sintani li loon nim bibam tiloondirin ki mag ni, le nin che ni ji fala iweehn piig. Ni le li ŋmag ni yadau, hali ni le ye nkum ke ni, wee n nan sei ni limiɛfol a yuchigirig.

¹¹ Wan jɔɔ litul ke, ni che un gbir Kinaaŋ kaah bei biwonjiɛm a laginn man. Wan fir nyaŋ ke, waa li kan nkum man yin kpiɛ milee-n a daŋ kolibi.”

Ntoon man chaa Pagamum yaab ban

¹² Ki ji ke “Sɔb ki sei Pagamum a wonjiɛm a malaka ke: Wan jɔɔ takoobi kaaŋ imɔɔŋ ilee-n a mɔleen sɔ.

¹³ N nyi naah be nan yaan, nan yaan wee Sintani a naam a gbɔŋ be-n. Amaa le ni sin ŋmag n yinl nbamɔm. Naa ta naah ŋaam yada-n ki jaa, hali nin Antipasi a yonn nin wan nan ye n yada a siɛradaau ibamɔn nin, wee bi nan ku u ni tiŋin ni, Sintani a binbebolin.

¹⁴ Ni biɛn yɔli, n jɔɔ tiwann wama nan che n galin ni: Ni jɔɔ bininfob biba be ni ban ki ŋmag Balaam a wɔɔmin, wan nan tinn Balag waah li ŋa man wee Iziral yaab n tun tibir ki ŋman tibawonann, ki li tun iwanchɔgin toon.

¹⁵ Man le ni mu jɔɔ ban ŋmag Nikolatan yaab a wɔɔnim.

¹⁶ Mambu ni kpenn ni binbem ma! Naa ye man ke, n li dan daandaan nan ki nan ta takoobi kan nyan n mɔbin nin ki kɔnn bi.

¹⁷ Wan jɔɔ litul ke, ni che un gbir Kinaaŋ kaah bei biwonjiɛm a laginn man. Wan fir nyaŋ ke, n li sei u kulɔŋ a boroboro kan woo-n, wee bi yi ke maana-n. N mu ji li sei u litangbag penl lan wee liyinl pɔnl sɔb paan li bu, le wan gaa litangbagil nmɔn a binba le li nyi liyinl nmɔn a taai.”

Ntoon man chaa Tayatira yaab ban

¹⁸ Ki ji ke “Sɔb sei Tayatira yaab a wonjiɛm a malaka ke: Uwonbɔr a bija wan a numbili nann nŋmipeen wee u taafar nyagin ke kukurug kan nyagin nin a mɔleen sɔ.

¹⁹ N nyi ni ŋaar, ni jiɛm ni yada, ni toon nin ni nnyiginim, le ni nin tun ki jon naah nan chinn ki tun man nin na.

²⁰ Ni biɛn yɔli, Nan wee n jɔɔ ki galin ni sɔ: Ni cheel tenn upii wan wee bi yi u ke Jezebiɛl, wee u yi uba ke ulinlenn nin. Upii nmɔn a wɔɔm che n toontum kɔɔ iwanchɔgin toon nin lipiibanlin nin lijabanlin nin tibawojiir a jimin.

²¹ N sei u isaŋ ke un kpenn u wanchɔgin toon nmɔn na, amaa le waa ban man ni.

²² Mambu n li che un dɔɔn nin iwiɛn, ki che ban dɔɔn nin win n ji fala takpem, man ke bi kpenn ki nyan upii nmɔn a binbemin.

²³ N li ku u buwaab. Le biwonjiɛm a laginn biɛn n biɛ ke min le ye wan dibir bininfob a sufu nin bi potiɛl, le n li yɔ ni biɛn ni ŋaar bu.

²⁴ Daandaan nan n bei nim ban gur be Tayatira, wee kaa nɔɔ upii nmɔn a wɔɔm wee kaa ji tinn Sintani kaah yi nan ke tibɔwoonkaarin (Maa yin ta litugil liba tun ni):

²⁵ Ni le li ŋmag nan wee ni jɔɔ-n hali nin maah na li dan.

²⁶ Wan fir nyaŋ ki tun maah ban man hali ki nan kpaa ndiɛm ke, n li sei u tininkper a pɔɔm wee un ŋmag ibol biɛn.

²⁷ ‘U na li ta kukurug a jaangbiɛg le ki ŋmag dulinya yaab; u li burbur bi ke tiyɔgirin’ a li ke maah gaa tininkper a pɔɔm n Baa ban man nin.

²⁸ N ji li sei u njakpanyiɛn a ŋmabil.

²⁹ Wan jɔɔ litul ke, ni che un gbir Kinaaŋ kaah bei biwonjiɛm a laginn man.”