Tibɔkpiirkaan 19 - UWONBƆR A GBƆNPƆŊ LIKƆƆNL

¹ Ni bɔɔn bu le n gbir niba a mɔr, le ni nann ke kuninfogbaluŋ a kukɔlin ki nyan paab ki tann ke: “Ti don Uwonbɔr a yinl! Feegab nin kupag nin npɔɔn ye ti Wonbɔru yaan le,

² nan bu-n U bɔjil ŋan le ki ye ibamɔn. U bii lipiijagɔɔril takpenlin na, wan ta iwanchɔgin toon ki boon kutingbɔŋin. U dar u tul ki jiin U toontumin a cham buu.”

³ Le kuninfogbaluŋin ji kunn ki len ke: “Ti don Uwonbɔr a yinl! Tikpinnyir tan nyan u nin do paab le hali nin iyoo yan kaa jɔɔ diɛm.”

⁴ Le bininkpeeb pilee nin bina nin tiwann naan wan tan fo tina-n sɔɔn tum ki jiɛn Uwonbɔr, wan nan ka u naangbɔŋ bu-n. Le bi kuun ke, “Ibamɔn, Ti don Uwonbɔr a yinl!”

Kipeebigin a piichanil a chiig a bɔr

⁵ Le likukɔl nyan kunaagbɔŋin yaan ki len ke: “Ni don ti Wonbɔru, nim ban biɛn ye u toontum, wee ki san u, ban kaa gbee bininfob nin ban gbee bininfob!”

⁶ Iyaayoo le n ji gbir nan nann kuninfogbaluŋ a fur, le ki nann nnyum puukaam a fur bee utaal kaah tann a fur ki len ke, “Ti don Uwonbɔr a yinl! Nan bu-n ti Yudaau Uwonbɔr wan ye Npɔɔn biɛn daan nin le ŋmag ti.

⁷ Ni che ni li mɔ ta wee ti pooi li peen na wee ti sei U kupag! Nan bu-n Kipeebigin a piichanil a yoo foou, le u bɔɔnh ŋa u ba siliu.

⁸ Le Uwonbɔr sei u bɔɔnh nmɔn itan ŋan yan nyagin ki be chasi, ke un yee.” (Itan ŋan nin le si Uwonbɔr a ninfogannkaab a buchin toon a taai yin.)

⁹ Le malaka-n beim ke, “Sɔb ke: ‘Tikaar be ban wee bi yin bi ke bi nan ji Kipeebigin a piichanil a jiir nan bu!’ ” Le ki ji len ke, “Ni niɛ nan le ye Uwonbɔr a mɔleen ibamɔn.”

¹⁰ Iyaayoo le n lu u taatum ki jiɛn u. Amaa le u beim ke, “Laa ŋa man ni! N ye a toontum kpiɛg le nin a nabum ban ŋmag Yisa a siɛra-n. Li jiɛn Uwonbɔr a! Nan bu-n Yisa a siɛra ye Kinaaŋ a linlen leen le.”

Utanpeen jigir nan a bɔr

¹¹ Le n nan kan paab kaah loor, le utanpeen si niin n nintogil, le wan jig ki a yinl ye yada daan nin ibamɔn. Le u ji tibɔr nin tibuchinn, ki tog bitɔb.

¹² Le u numbili nann nŋmipeen, le nnaam a yuchigirim takpem chig u yul bu. Liyinl liba nan sɔb paa u bu le uba kaa nyi li taai, see uma a binba.

¹³ Le u wan yee wan man nin ncham, le u yinl ye Uwonbɔr a Mɔbonl.

¹⁴ Le paab a tɔtogib nɔɔ u, ki jig itanpeen ki yee itan ŋan yan peen ki be chasi.

¹⁵ Le takoobi kan ka nyan u mɔn, le u li ta ki kɔn nyaŋ ibol. “U li ta kukurug a jaangbiɛg ki ŋmag bi.” Ki li taan bi ke baah taan isiloon a daam man nin, ni ma ye Uwonbɔr wan ye npɔɔn biɛn daan a ŋuul nin u ŋuufiiŋ.

¹⁶ U wann yeewann nin u panl bu, le liyinl liba nan sɔb paa ke: BIBƆRTIIB BIƐN A BƆRU NIN BIYUDAM BIƐN A YUDAAU.

¹⁷ Le n kan malaka kaah si nween, ki kunn nkukɔpɔɔn ki yi nnɔɔm man yugir paab ki ke, “Dan, ni lagin taba wee ki nan ji Uwonbɔr a jɔɔg a jiir takpen nan,

¹⁸ wee ni fir ŋman bibɔrtiib, nin bitɔtob a yudam, nin bipɔɔndam, nin itaan nin bitanjigib, nin bininfob biɛn ban ye bi ba nin ban ye biyom, ban gbee bininfob nin ban kaa gbee bininfob a nann.”

¹⁹ Le n kan kuwanbiigin nin kutingbɔŋ nan a bɔrtiib nin bitɔtogib kaah lagin bin to utaan jigirin nin u tɔtogib bitɔb.

²⁰ Amaa bi nan choo kuwanbiig nmɔn na nin tibɔkar a linlenu wan nan sir u taalin wee ki tun ligaril a siɛra-n. Siɛram nan le u nan ta bii ban nan gaa kuwanbiigin a daagim a potiɛl le bi jiɛn u nunaŋin. Bi bilee nmɔn la nan fo le bi ta bi jaa lichibil a ŋmiim a mɔgilin yaan.

²¹ Takoobi kan nan nyan utaan jigirin a mɔn nin, le u nan ta ku ban gurin biɛn, le nnɔɔm biɛn jin bi gbanann kpiinn ki nan gbee.