Tibɔkpiirkaan 18 - UWONBƆR A GBƆNPƆŊ LIKƆƆNL

Babilɔnn kaah lu man

¹ Ni bɔɔn bu le n ji kan malaka kaah nyan paab ki chaa jiirin. U nan jɔɔ tininkper a pɔɔm takpem. Le u wonweem man nyan u ni wonn dulinya biɛn bu.

² Le u tiɛn paab nin nkukɔpɔɔn ke, “Ki lu! Babilɔnn kan ye kitintakpeŋin luu! Babilɔnn kpann npɔniim a binben bola nin nan yaan wee nnaanbiim gɔɔr nin nan yaan wee nnɔɔm man jɔɔ tijaginn kaa kpaan binib le gaa i gɔɔr.

³ Nan bu-n kutingbɔŋ nan a ninfob pii nyun ndapɔɔrim ke u wanchɔgin toon yin. Dulinya a bɔrtiib tun iwanchɔgin toon nin wa, le kpoŋkpoŋ dam kpann biwandam u wanŋan banl nmɔn bu.”

⁴ Le n ji gbir likukɔl liba nyan paab ki len ke: “Ni nya u ban na, n ninfob, wee u bir nmɔn laa tabin ni, wee u magil liba laa kan ni;

⁵ Nan bu-n u birin paan paan le ki tan pii paab, le Uwonbɔr tiɛr u galin nmɔn bu.

⁶ Ni jiin sei u waah sei ni nan nin; Ni yɔ waah ŋa nan ki sei ni a kerim mileeu. Ni ŋmarin ndapɔɔrim nkerim milee u tɔɔl a yiinyɔɔgin ki sei wa.

⁷ Ni sei mu limugil nin npoobiin takpema, a li ke kupag nin liwanŋanl banl lan wee u ti jɔɔ tenn u baantɔɔlin. U far ligbingbanl le u sufu ni ki ke, ‘N ka le ke upiibɔrin; maa ye lipukɔɔli, le maa li nyi mɔɔ tikpemɔri.’

⁸ Mambu weemba daal u magil nmɔn na li nyaŋ u: Nkum, nin tikpemɔr nin nkom na li choo u. Nŋmi le na li gaa u, nan bu-n Uyudaan Uwonbɔr wan ye npɔɔn daan le ji u tibɔr.

⁹ “N-yonn man wee kutingbɔŋ nan a bɔrtiib ban tun iwanchɔgin toon nin upii nmɔn nin ki jin u wanŋan banlin a mɔmin nan kan nŋmi man gaan win a kpinnyir kaah dug ke, bi li mɔɔ tikpemɔr upii nmɔn bu.

¹⁰ U fala nmɔn a jim na li choo bi bijawaam, bi na li sir nan yaan fɔg ki mɔr: ‘Woo! Woo, Kitintakpeŋaa, Babilɔnn aa, kitiŋ kan jɔɔ npɔɔn! Kukurug kiba a poolin le a tudaril foon!’

¹¹ “Dulinya a kpoŋkpoŋ dam na li mɔɔ tikpemɔr u bu, nan bu-n uba kaa ji na li be ki daa bi tugi jigin ni,

¹² itug yan ye salima, nin tikurninann, nin itangbag yan a daag pɔɔ, nin nliɛm man nyagin, nin ikinken ŋan, nin itan man geuŋ nin itan yan ŋaan bolbol nin itan man a wan yɔɔr, nin tidaar tan ŋan, nin tiwann tan wee bi ta uloob a nyin ki naan ni, nin tidaar tan a daag pɔɔ, nin tikurdiin, nin tikurpɔɔr, nin ichabpeen;

¹³ itug yan ye ilanjobon nin tiwann tan tenn tikpinn nbaam, tiwann tan nyɔɔr ki jɔɔ nbaam, nin isiig a nyinyinn nin nnyɔgkusim, nin ndaam nin Olif a kpam, nin n-yom ŋam nin idi, nin inaa nin ipee; itaan nin i torokom; nin tigbanann nin bininfob a naam.

¹⁴ “Bi na li len ke, ‘Iloon yan wee a ban nin bor a ban na. A jɔɔm nin tiwann tan ŋan niŋ biɛn bora, kaa ji li fir kan ni.’

¹⁵ Le kpoŋkpoŋ dam ban kɔɔr tiwann nmɔn kitiŋ nmɔn yaan wee ki kpann biwandamin upii nmɔn bu-n, na li sir nan fɔg, le nin ŋa bi bijawaam upii nmɔn a fala a jim bu. Bi na li mɔɔ tikpemɔr,

¹⁶ ki mɔɔ paab ke, ‘Woo! Woo, kitintakpeŋaa, kan nan yee ikinken ŋan nin itan man geuŋ nin itan man, le ki nan nyagin nin salima, nin itangbag yan jɔɔ kudaag, nin nliɛm!

¹⁷ Kukurug kiba a poolin njɔɔm takpem biɛn bor!’ “Le ban donn tiŋalin a yudam nin ban kɔɔ tiŋalin nin biŋalindom nin ban biɛn ji limɔgil nmɔn yaan nin, na li sir nan fɔg.

¹⁸ N-yonn man wee bi nan kan nŋmi man gaan win a kpinnyirin, le ki fabin ke, ‘Kitintakpeŋ nan nan jɔɔ kpiɛgaa?’

¹⁹ Bi na li minn titann ki gabir bi yuli bu, le ki mɔr tikpemɔr ki kunn ke: ‘Woo! Woo, kitintakpeŋaa, nan yaan wee ban biɛn nan donn tiŋalin nan kpann biwandam upii a jɔɔm bu-n! Le kukurug kiba a poolin le u jɔɔm nmɔn nan bor!

²⁰ Nim ban be paabaa, ni che ni li mɔ ni u buu! Ni che ni li mɔ na, Uwonbɔr a ninfob nin itoon nin bilinlem, Uwonbɔr jin u tibɔra waah nan ŋa ni man nin bu.’ ”

²¹ Le malaka wan pɔɔ yuur litangbagil lan polig ke linaal takpenlin, ki gab limɔgilin ki len ke: “Nin limugil nmɔn Bi na li tir Babilɔnn kitintakpeŋ nmɔn ki jaa tum, le baa ji li kan ki.

²² Bibiɛfaab nin bilangaab nin binaakpaapeeb nin binaatunpeeb a lai-n kaa ji na li gbir a ban ni. Kpoŋkpoŋ daan uba kaa ji na li be a ban ni. Linaal a mɔr kaa ji na li gbir a ban ni.

²³ Le fila a wonweem kaa ji na li won a bu jigin ni. Lipiichanil daan nin u bɔɔnh a kukɔl kaa ji na li gbir a ban ni. A kpoŋkpoŋ damin nan ye dulinya a ninfob gbingbemin le. A nyɔgimin kɔɔn ibol biɛn kulɔŋa.

²⁴ Babilɔnn nmɔn ni, le bi nan kan bilinlem nin Uwonbɔr a ninfob gannkaabin a cham nin ban biɛn wee bi nan ku kutingbɔŋ nan yaan nin.”