Tibɔkpiirkaan 17 - UWONBƆR A GBƆNPƆŊ LIKƆƆNL

Lipiijagɔɔril wan jɔɔ liyinl

¹ Le n kan malakam bilile ban ŋmag tiyir tilile-n a ni uba dan ki nan beim ke, “Dan wee n wɔɔniŋ lipiijagɔɔril wan jɔɔ liyinl a tudaril kaah yab man, wan ka nnyum takpen bu-n.

² Kutingbɔŋ a bɔrtiib dɔɔn nin wa, le kutingbɔŋ nan yaab nyun u wanchɔgin toon yin a daam ki gbeeu.”

³ Le malaka nmɔn nan taam ki jon kukunkɔɔgin Kasi a naaŋ a pɔɔm bu. Nin yaan le n nan kan upii uba kaah ka kuwanbiig kan man bu, le iyin yan sugir Uwonbɔr sɔb ki paa kuwanbiig nmɔn a gbanann biɛn bu, le kuwanbiig nmɔn jɔɔ iyul ilile nin iyinh piig.

⁴ Upii nmɔn nan yee tiwann yɔɔr tan man nin tan man geuŋ le, ki nan nyagin nin salima, nin itangbag nin nliɛm man ŋan ki nyagin. Ki ŋmag salima a yiinyɔɔg u nɔɔn, le kiyiinyɔɔg nmɔn gbee nin tijaginn tan ye titoonbir nin iwanchɔgin toon.

⁵ Liyinl le nan sɔb paa u yutunl bu ke, TIBƆWOONKAAR BABILƆNN KITINTAKPEŊIN IPIIJAGƆƆR BIƐN A NA KUTINGBƆŊ NAN A WANBIR BIƐN A NA

⁶ Le n kan ki miin upii nmɔn nyun Uwonbɔr a ninfogannkaab a cham le ki gbee, ban a cham nan jin siɛra Yisa bu-n. Maah nan kan win, le ni ŋaam ligaril takpem.

⁷ Le malaka nmɔn baanim ke, “Ba ŋa wee a che ni gariŋaa? N li wɔɔniŋ tibɔwoonkaar ki jiin upii-n nin waah nan jig kuwanbiig kan nin paam kan nan jɔɔ iyul ilile nin iyinh piigin.

⁸ Kuwanbiig kan wee a kan nin, nan be le, le kaa ji be daandaan nan ni, le ki na li nyan libogil lan nyɔɔ n-yaan ki jo nan yaan wee bi li bii u. Le kutingbɔŋ yaab ban a yin kaa sɔb be limiɛfol a gbɔŋin n-yaan dulinya a piinimin nin, bi nan kan kuwanbiig nmɔn ke ni li gar bi, nan bu-n u pii nan be, le kaa ji be daandaan nan nin, le ki ji na li dan.

⁹ “Ni niɛ nan ban npotiɛm le nin nlamgɔrikaam. Iyul ilile-n ye igungon ilile yan wee upii-n ka-n le.

¹⁰ I mu ji ye bibɔrtiib bilile le. Biŋmu luu, uba be, wan gurin kaa la dan nin; amaa u nan dan ke, ni kpaa le nin un be n-yonn wama.

¹¹ Kuwanbiig kan pii nan be wee kaa jin nan be-n, le ye ubɔr wan kpiɛ biniin nin. U ye bibɔrtiib bilile-n a ni uba le, le ki chaa u biim a bol.

¹² “Iyinh piig yan wee a kan nin le ye bibɔrtiib piig ban kaa la gaa bi naamin, amaa kukurug kiba a poolin bi li gaa tininkper a pɔɔm ke bibɔrtiibin ki kpiɛ kuwanbiig nmɔn bu.

¹³ Lol liba le bi jɔɔ ki na li ta bi pɔɔm nin bi ninkper a pɔɔm ki sei kuwanbiigin.

¹⁴ Bi na li to Kipeebigin bitɔb, amaa Kipeebigin na li nyaŋ bi, nan bu-n kipeebig nmɔn le ye biyudam a yudaau nin bibɔrtiib a bɔru, le ban na li be u ban ye ban wee u yin ki gann bi, wee bi ye yadadam ki nɔɔ win.”

¹⁵ Le malaka nmɔn beim ke, “Nnyum man wee a nan kan nin, wee lipiijagɔɔrilin ka mi bu-n, ye bininfob le, kuninfogbaluŋ, ibol nin ileen balbal.

¹⁶ Kuwanbiigin nin iyinh piig yan wee a nan kan nin na li nan lipiijagɔɔrilin, ki fee u faal biɛn wee ki jaa u lijakpalomil, bi na li ŋman u gbanann ki nyɔɔ u nŋmi.

¹⁷ Nan bu-n Uwonbɔr le nan ta ibon nmɔn ki ŋa bi potiɛmin ke bin tun Uma Uwonbɔr kaah lol man, ni bu le U che bi ŋa mɔbiba ki ta npɔɔn sei kuwanbiigin, hali nin Uma Uwonbɔr a bɔr kaah na li gbeen.

¹⁸ Upii wan wee a nan kan nin, n ye kitintakpeŋ kan ŋmag dulinya nan a bɔrtiib le.”