Tibɔkpiirkaan 16 - UWONBƆR A GBƆNPƆŊ LIKƆƆNL

Uwonbɔr a ŋuul a yir

¹ Le n gbir likukɔl kaah nyan iwonjiɛn niin n-yaan ki bei malakam bilile-n ke, “Ni li chaau ki tan kpaar Uwonbɔr a ŋuufiiŋ a yir tilile-n ki jaa kutingbɔŋ buu.”

² Le chinchinn a malaka-n jon ki tan kpaar nan be u yiigin ki jaa kutingbɔŋ bu, le ibiɛ yan bir, ki wu takpemin choo ban jɔɔ kuwanbiigin a daagimin nin ban jiɛn kuwanbiigin a nunaŋin.

³ Le malaka wan kpiɛ bilee mu kpaar nan be u yiigin ni ki jaa limɔgilin, le nnyumin labir ke utakpiir a chamin, le tiwann naan wan tan fo biɛn ki be limɔgil nmɔn yaan nin kpo.

⁴ Le malaka wan kpiɛ bita mu kpaar nan be u yiigin ki jaa ikpen nin nnyunbumin bu, le mi kpann ncham.

⁵ Le n gbir malaka wan ŋmag nnyumin kaah len ke: “A bɔjil i nan ye ibamɔn le, fin wan be nin wan nan be, kasidaan nin, nan bu-n A jin tibɔr nin ibamɔn na;

⁶ nan bu-n bi nan nyan a ninfogannkaab nin a linlem a chama, le a ta ncham ke bin nyu, naah kpaan bi man.”

⁷ Le n gbir likukɔl kaah nyan libinbinlin ban ki len ke, “Nn, Uyudaan Uwonbɔr Npɔɔn biɛn daan, a bɔjil ŋan le ki ye ibamɔn.”

⁸ Le malaka wan kpiɛ bina-n mu kpaar nan be u yiigin a poolin ki jaa nween bu, le ki sei nween npɔɔn ke un ta nŋmi ki nyɔɔ bininfob wee bin kab.

⁹ Nŋmi-n a tuntoŋ nan kɔɔ bi takpem pam, hali ke bi nan sugir Uwonbɔr wan jɔɔ limagil a pɔɔmin a yinl, amaa bi le nan yii le kaa kpenn bi binbem ki pag wi.

¹⁰ Le malaka wan kpiɛ biŋmu mu kpaar nan be u yiigin ki jaa kuwanbiigin a naangbɔŋ bu, le libunbɔnl lu kuwanbiig nmɔn a naamin. Le bininfob ŋman bi lanbili ntiton nmɔn yaan,

¹¹ le ki sugir Uwonbɔr wan be paab naah wu bin nin bi biɛi nbu, amaa le kaa chee bin kpenn bi binbem nan wee bi tun nin bu.

¹² Le malaka wan kpiɛ biloob mu kpaar nan be u yiigin ki jaa nkpenn takpen man wee bi yi mi ke Yufiratiisi bu, le li nnyum fɔɔr ki jiɛn npaan sei bibɔrtiib ban nyan Liwonpɔɔnl paamin.

¹³ Le n nan kan nnaanbiim mitaa le bi nann ke ititalin, bi nan nyan kutunwiɛŋin, nin kuwanbiigin nin tibɔkar a linlemin a mɔɔŋin le.

¹⁴ Bi ye npɔniim a naam ban ŋaan ligaril a siɛra, le bi chaa dulinya munl nan biɛn a bɔrtiib ban, ki lagin bi ke bin to bitɔb Uwonbɔr Npɔɔn biɛn daan a datakpenl daal.

¹⁵ “Lig! N li dan ke unaayigin! Tikaar be wan kaa dɔɔ jiɛn, wee ki ŋmag u wann yeewann, wee u laa nan choon gaan wee u yul nkpo.”

¹⁶ Le bi lagin bibɔrtiib nmɔn bogiliba nan yaan wee Hiiburu yaab a leen nin bi yi ke Amagedɔn nin.

¹⁷ Le malaka wan kpiɛ bilile mu kpaar nan be u yiigin ki jaa nfaamin, le nkukɔpɔɔn nyan kunaangbɔŋ n-yaan ki tiɛn iwonjiɛn niin nin ke, “Ni ŋaau!”

¹⁸ Le utaal piin ki nyagin ki dun ki tann nin tifur, le tum dam, uninfosaal a binbem kutingbɔŋ nan yaan, kutingbɔŋ kaa la nan nyi ki dam ki nann man ni, kitiŋ a damim nmɔn nan bir pam.

¹⁹ Le kitintakpeŋin bɔgir nkerim mitaa bu, le ibol a tim lur. Le Uwonbɔr nan tiɛr Babilɔnn kan ye kitintakpeŋin bu, le ki ta U ŋuul a yiinyɔɔg kan gbee nin u ŋuufiiŋ a daami ki sei Babilɔnn yaab ke bin nyu mi biɛn na.

²⁰ Igungon yan biɛn be nnyum a sisiigin nin nan guun na le ijɔɔ biɛn bor.

²¹ Le itanyunbɔl gbingbem nyann kitilangbɔŋin ki kpiɛg ke linaalin, ki nan lur bininfob bu. Le bi poog imɔɔŋ ki jaar Uwonbɔr waah che limagil lan lur bi bu-n bu, nan bu-n limagil nmɔn nan bir pam.