Tibɔkpiirkaan 12 - UWONBƆR A GBƆNPƆŊ LIKƆƆNL

Upii nin kutunwiɛŋ

¹ Le lijinjeel nin ligaril a siɛra takpenl nan degirin paabin: Le upii uba nan yee nween a li ke likinkenlin, le uŋmal be u taatum, le u chig nnaam a yuchigirig kan jɔɔ iŋmabil piig nin ilee u yul bu.

² U nan jɔɔ lipool le ki kuun imariwiɛn kaah choo u nbu.

³ Le siɛra liba mu ji degirin paab a naamin ni: Ki ye kutunwiɛŋ kan man ki jɔɔ iyul ilile nin iyinh piig, le nnaam a yuchigirig milile chig iyul nmɔn bu.

⁴ Le kutunwiɛŋ nmɔn ta u jool ki tigin iŋmabil a bɔgirim a poolin mitaa nkerim nba ki jaa kutingbɔŋin, le kutunwiɛŋ nmɔn jon tan si upii wan yin maa nmɔn a nintogil ki guu, ke upii nan maa ke un ŋman kibiliɛgin.

⁵ Le upii nmɔn nan maa kibijag, kibijag kan na yin ta kukurug a jaangbiɛg ki ŋmag dulinya yaab biɛn ni. Le Uwonbɔr ta u don paab u naangbɔŋin bu.

⁶ Le upii nmɔn guun ki jon kukunkɔɔg a paab, nan yaan wee Uwonbɔr nan mann npaan ki bil guur upii nmɔn ke bi li lig u ki tan kpaa iweehn turil nin iweehn kobilee nin iweehn piloob.

⁷ Bitɔb le nan be paab. Le Maakil nin u malakam nan ton kutunwiɛŋ, le kutunwiɛŋ nin u mu a malakam ton jiin.

⁸ Amaa kutunwiɛŋ a pɔɔm kaa nan yabi, le bi nyaŋ bi, le bi lann binbebol paab.

⁹ Le bi nyan kutunwiɛŋ takpeŋ nmɔn gab, u pii ye uwaa wan nan be le yaayoo-n, wee bi yi u ke ulinlaril bee Sintani, wan liir dulinya yaab a sam ki che bi borin, le bi nyan uma nin u malakam ki gabin dulinya nan yaan.

¹⁰ Iyaayoo le n gbir nkukɔpɔɔn miba nyan paab ki ke: “Daandaan nan feegab nin npɔɔn nin ti Wonbɔru a naam dan na, nin U Masiya a naam a ninkper a pɔɔm foona. Nan bu-n wan nan galin ti nabumin, wan nan galin bi ti Wonbɔru a numin nween nin kunyiɛgin, bi nyan u gabin tuma.

¹¹ Bi nyaŋ wa kipeebig a cham bu nin bi siɛram bu baa nan jiɛ bi miɛfolin ki tan kaagi ki sul jir bɔɔn ki nyan nkumin ni.

¹² Mambu, ni che ni li mɔn na! Paab nin nan biɛn be niin ni! Amaa tibɔbir be dulinya nin limɔgil bu, nan bu-n ulinlaril kaah jiirin ni ban nin! U gbee nin kiŋuufiiŋ le, nan bu-n u nyi u saŋi kaah kaa yabi.”

¹³ Kutunwiɛŋ nmɔn kaah nan kan baah nyan u jaa dulinya nan yaan nin, le u nin nɔɔ ke un choo upii wan maa kibijagin.

¹⁴ Le Uwonbɔr nan ta libaanweenl takpenl a kpinkpann tilee ki sei upii nmɔn ke un yug ki jo kukunkɔɔg a paab nan yaan wee Uwonbɔr mann npaan ki guun win ke bi li jin u ki tan kpaan ibin itaa nin ligenl ki jiɛn uwaa-n wee u laa pii wi.

¹⁵ Le uwaa nmɔn nan sii nnyum u mɔnn a li ke nkpenn a nyumin, ke nnyum nmɔn npuu ki tan ta upii nmɔn.

¹⁶ Amaa le kutingbɔŋ nan ter upii nmɔn ki yaar u mɔb ki ta nnyum man wee kutunwiɛŋ sii u mɔn nin ki nyun.

¹⁷ Iyaayoo le kutunwiɛŋ nmɔn a ŋuul nan fii upii nmɔn bu, le u lol bitɔb ki jon ke un tan tob upii nmɔn a buwaab ban gurin, ban chee Uwonbɔr a siim wee ki jɔɔ Yisa a siɛra-n.