Tibɔkpiirkaan 11 - UWONBƆR A GBƆNPƆŊ LIKƆƆNL

Siɛradam Bilee a bɔr

¹ Le bi ta ligbingbaanl lan nann kijaangbiɛg wee bi jɔɔ magir tiwann nin ki seim, ki beim ke, “Li chaa ki tan mag Uwonbɔr a wonjiɛn niin nin i binbinlin na, wee ki kan biwonjiɛn ban be niin nin.

² Amaa laa mag iwonjiɛn niin a loobin ni, nan bu-n Uwonbɔr ta nloob nmɔn ki sei ban kaa ye biwonjiɛmin na. Bi na li chonn ki taan kasi a tiŋ nmɔn bu ki tan kpaan iŋmal pina nin ilee.

³ Le n na li sei n siɛradam bilee nmɔn npɔɔn wee bin pag ilinlen leen ki tan kpaa iweehn turil nin kobilee nin piloob ki yee botu a kinkenl.”

⁴ Siɛradam bilee nmɔn le ye Olif a siigi ilee-n nin fila a tutɔɔnbol a kerim milee-n, yan si kutingbɔŋ a Yudaau a nintogilin.

⁵ Ni ye uba nan ban un sei bi kidaŋ ke, nŋmi li nya bi mɔnn ki nan nyɔɔ bi dataam nmɔn ki ku bi. Wan biɛn nan ban un sei bi kidaŋ ke, ni kpaa le nin udaan nkpo man.

⁶ Siɛradam nmɔn jɔɔ npɔɔn man li fir choo utaal ke waa li nu n-yonn man wee bi be ki pag ilinlen leen nin; ki ji jɔɔ npɔɔn man li fir che nnyum nkpann ncham, ki ji li fir che imag a booli biɛn dan dulinya bu baah ban man nin.

⁷ N-yonn man wee bi nan diɛ bi siɛra a toon nmɔn ke, kuwanbiigin na li nyann libogil lan nyɔɔ wee kaa jɔɔ tarigin yaan ki to bi bitɔb ki nyaŋ ki ku bi.

⁸ Bi gbanann na li dɔɔn kitintakpeŋ a sanjal bu, ntim man wee pag woon a poolin bi yi mi ke Sodom nin Ijibir, nan yaan mu jigin wee bi nan kpaa bi Yudaau lidapunpunl bu-n.

⁹ Le bininfob na li nyan imaal biɛn, nin ileen balbal biɛn, nin ibol biɛn nin, ki nan lig bi gbanann nmɔn iweehn mun itaa nin ligenl amaa kaa yin chee bin pii tigbanann nmɔn ni.

¹⁰ Kutingbɔŋ nan a ninfob a pooi na li penn bi bilee nmɔn a kum bu, ki gel igel ki sei bi kpiɛtiib ipiin, nan bu-n bilinlem bilee nmɔn che ban be dulinya nan yaan jin fala pam.

¹¹ Iweehn itaa nin ligenl nmɔn kaah nan jon a bɔɔn, le kufoorug kan ye limiɛfolin nyan Uwonbɔr ban ki nan kɔɔ bi, le bi fii sir paab, le bijawaam choo ban kan bin takpem.

¹² Le siɛradam bilee nmɔn gbir nkukɔpɔɔn kaah nyan paab ki bei bi ke, “Ni donn paab do.” Le bi don kitilangbɔŋin ki jon paab, le bi dataam nan si ki lig bi.

¹³ Iyaayoo nmɔn le kutingbɔŋ dam takpem, le kitiŋ nmɔn a niin piig a poolin nkerim nbaba lu, le bininfob turilile nan kpo kutingbɔŋ nmɔn a damim ni, le bijawaam nan choo ban gurin, le bi sei Uwonbɔr wan be paabin kupag.

¹⁴ Ni lig! Niwanbirin nan kpiɛ milee-n jon na; niwanbirin nan kpiɛ mitaa-n li foon ke naa yuuri.

Kunaatuŋ kan kpiɛ milile

¹⁵ Le malaka wan kpiɛ milile mu pee u naatuŋ, le ikukɔpɔɔr be paab ki tann ki len ke: “Dulinya a naam kpann ti Yudaau nin U Masiya yaala, le u li ŋmag u naam hali nin isaŋ yan kaa jɔɔ diɛm.”

¹⁶ Le bininkpeeb pilee nin bina ban nan ka bi naangbann bu Uwonbɔr a nintogilin lu ki ta binum chigin tum ki poor Uwonbɔr,

¹⁷ ki len ke: “Ti tenniŋ kunɔɔpoog, Uyudaan Uwonbɔr wan jɔɔ npɔɔn biɛn, Wan pii nan be ki le la biɛ nin be, nan bu-n a gaa a pɔɔm man yaba le ki piin a naam a ŋmagim.

¹⁸ Le ibol a ŋuui fii; le A ŋuufiiŋ foon. Isaŋ foou nin bitakpiib a bɔr a jima nin A yɔ A toontum ban ye bilinlemin, nin A ninfogannkaab nin ban tenn A yinl jilima-n, ban gbee bininfob, nin ban kaa gbee bininfobi, ki bii ban bii dulinya.”

¹⁹ Le Uwonbɔr a wonjiɛn niin yan be paabin loor, le n kan Uwonbɔr a kaal adaka iwonjiɛn niin a poolin. Le utaal a jugin nyagin ki dun ki tann, le kutingbɔŋ dam, le itanyunbɔl gbingbem nan lunn.