Tibɔkpiirkaan 10 - UWONBƆR A GBƆNPƆŊ LIKƆƆNL

Malaka nin kigbanbig kpabkaag a bɔr

¹ Le n ji kan malaka takpeŋ uba kaah nyan paab ki chaa jiirin. U nan yee kitilangbɔŋ le ke likinkenlin, le uwaakpajatooŋ be u yul a paab; le u num paam nann nween, le u taai mu nann nŋmipeen.

² U nan ŋmag kigbanbig kpabkaag le, le ki kpar ki be u nɔɔn, le u ta u nɔɔjiim a taal ki siin limɔgilin, le u nɔɔgam a taal mu si limɔgil nmɔn a dool.

³ Le u tiɛn paab takpem ke ugbegin nin. Waah tiɛn man ki diɛ, le utaal a tintann a kukɔli nkerim milile-n pag.

⁴ Utaal a tiɛm kerim milile nmɔn kaah pag ki diɛ, le n ŋa sili ke n sɔb; amaa le n ji gbir likukɔl liba nyan paab ki len ke, “Li ŋmag utaal kaah tiɛn nkerim milile man nin a sufu-n na, wee ki laa sɔb ti ki bili.”

⁵ Le n kan malaka wan a taaliba tɔɔ limɔgil a nyum bu wee litɔ mu tɔɔ limɔgil a doolin kaah don u nɔɔjiim paab.

⁶ Le u poo Uwonbɔr wan be ki le gbaa be-n ke, wan nan naan paab nin nan biɛn be bi ni, nin dulinya nin nan biɛn be dulinya ni, nin limɔgil nin nan biɛn be limɔgilin ki len ke, “Nguurim kaa ji be!

⁷ Amaa idaa yan wee malaka wan kpiɛ bilile-n na yin pee u naatuŋ ke, Uwonbɔr a wool a bɔr li gbee, a li ke waah nan bei u toontum bilinlemin man nin.”

⁸ Le likukɔl lan wee n bi gbir wee li nyan paabin ji beim ke, “Li chaa, ki tan gaa kugbɔŋ kpabkaag kan kpar ki be malaka a nɔɔn wee u tɔɔ nyum nin limɔgil a dool bu-n.”

⁹ Le n jon malaka nban ki tan bei u ke un ta kigbanbig kpabkaag nmɔn ki seim ni. Le u beim ke, “Gaa ki ki ŋman na. Ni yin mɔ a mɔnn le ke tiseerin, amaa le ki mɔŋ a poolin.”

¹⁰ Le n gaa kigbanbig kpabkaag nmɔn u nɔɔn ki ŋman. Le ki sin mɔ n mɔnn ke tiseerin, amaa maah nan ŋman diɛ le ki mɔŋ n poolin.

¹¹ Le bi nan beim ke, “Ni kpaa le nin a pag ilinlen leen ki jiin bininfob, nin ibol, nin ileen balbal, nin bibɔrtiib paam takpem.”