Tibɔnyaan ti Mak ŋmee ti na 9 - UWONBƆR A GBƆNPƆŊ LIKƆƆNL

¹ Ni bɔɔn bu le Yisa ji len ke, “Ibamɔn le n bei ni nan, biba be do kaa li kpo see ke bi nan kan Uwonbɔr a naamin a dam a pɔɔm.”

Yisa a gbanann kaah nan kpenn man

² Ni ween iloob daal a bɔɔn, le Yisa nan ta Piita nin Jemisi nin Jɔnn ki don lijɔɔl fufɔgil a paab, bi binba. Iyaayoo le bi kan u gbanann kaah kpenn,

³ le u wan yee waŋ nyagin ki peen parr. Uba kaa be kutingbɔŋ nan yaan ki li fir ŋunn tiwann yɔɔr wee tin peen man ni.

⁴ Le bi kan Elaja nin Moziz kaah degir u bu ki pag nin u.

⁵ Le Piita bei Yisa ke, “Wan wɔɔn, ni ŋan nin taah be do nan. Ti li ŋa tinanbonn titaa, kuba ye a yaag, le kuba mu ye Moziz yaag, le kan gurin mu ye Elaja yaag.”

⁶ Bijawaam kaah nan choo Piita nin u kpiɛtiibin bu le che waa ji nan nyi waah li pag man ni.

⁷ Iyaayoo nmɔn le kitilangbɔŋ nan piin bi bu, le bi gbir likukɔl kitilangbɔŋin a paab ke, “N bijiɛkaag sɔ, ni chee u mɔba man.”

⁸ Le bi gbiɛ lig, le kaa ji kan uba bi ban ni. See Yisa a binba.

⁹ Baah nan nyan lijɔɔl nmɔn a paab ki nan chaa jiirin, le Yisa nan kpaan ke bi laa bei uba nan biɛn wee bi kan nin ki tan kpaa lidaal man wee u ma Uninfosaal a Big na li fii nkumin nan.

¹⁰ Le bi chee u kpaani nmɔn, ki ŋmag tibɔr nmɔn bi sisiigin. Le bi baan tab ke, “Nkum a fiim a taai ye nii?”

¹¹ Le bi nan baan u ke, “Ba ŋa wee ban wɔɔnn Uwonbɔr a siim bei ke see ke Uwonbɔr a linlenu Elaja le yin chinn ki dan naa?”

¹² Le Yisa bei bi ke, “Ibamɔn see ke Elaja chinn, ke un nan mann tiwann yɔɔr biɛn nbamɔm. Ba ŋa wee ni sɔb Uwonbɔr a gbɔŋin ke, Uninfosaal a Big na li ji fala, wee bin yii waa?

¹³ N bei ni le nan, Elaja pii foon na, le bininfob ŋaa u yɔli yɔli baah ban man, ke naah sɔb Uwonbɔr a gbɔŋin man nin.

Yisa kaah nyan kinaanbiig kibigin man

¹⁴ Yisa nin Piita nin Jemisi nin Jɔnn kaah nan tan foo u bɔɔnɔɔbin ban n-yonn man nin, ki miin bininfob lagin; le ban wɔɔnn Uwonbɔr a siimin far bi limɔkpel.

¹⁵ Kuninfogbaluŋ nmɔn kaah nan kan Yisa n-yonn man nin, le ni ŋa bi ligaril, le bi guun dan ki nan poor u.

¹⁶ Le u baan u bɔɔnɔɔbin ke, “Ni niɛ bi babuu?”

¹⁷ Le uja uba nyan kuninfogbaluŋin yaan ki jiin ke, “Wan wɔɔn, min le ta n bija dan a ban, kinaanbiig le be u ban ki che waa fin pagi.

¹⁸ Nan yaan biɛn wee kinaanbiigin nan fii ke, ki nyiɛr u tum le, le kumɔsangbugbalug nya u mɔnn le u ŋma u nyii. Le u gbanann n pɔɔg kenken; le n balin a bɔɔnɔɔb nan ke, bin nyan kinaanbiig nmɔn le bi walin gur.”

¹⁹ Iyaayoo le Yisa ni nan fu bi bu ki ke, “Nim daandaan nan a ninfob ni yada waar pam, ni ban n yuur ni ban ki tan kpaan nii, wee ki li jɔɔ limɔril ni buu? Ta kibig nmɔn ki dan do.”

²⁰ Le bi ta ki dan Yisa ban. Kinaanbiigin kaah kan Yisa n-yonn man nin, le ki fii kibigin bu, ki nyiɛ u tum, le u dɔ ki bilin, le kumɔsangbugbalug nya u mɔnn.

²¹ Le Yisa baan u baa ke, “Ibayoo wee ni piin ki ŋaa u man naa?” Le u jiin ke “Ni piin u buwaan nin le.

²² N-yonn takpem le kinaanbiig nmɔn nyiɛr u nŋmi-n, nin nnyumin, ki yin ku u. Ni ye a li fir terim ke, a sam kunyunyunbaag ni.”

²³ Le Yisa jiin u ke, “Nn, ni ye a mu li fir ŋam yada ke, niba kaa pɔɔ ki sei wan ŋam yada ban ni.”

²⁴ Libol nmɔn le uja-n paa yigin papaab ki ke, “N ŋaŋ yadau, terim ni wee n ŋaŋ yada ki kpiɛ.”

²⁵ Yisa kaah nan kan ke bininfobin nan mann tir ki chaan bi ban ni, le u tiɛn kinaanbiig nbu ke, “Fin kinaanbiig tukpaabig nan, min le seiŋ bimɔb ke a nya u ni ki laa ji nyi ki jirin u ni jigin ni.”

²⁶ Le kinaanbiig nmɔn nan yigin ki yuur kibigin ki nyiɛ tum gbab, le ki nyan u ni, le kibig nmɔn ni nan nann ke ki kpo le-n, le bininfobin ni nan fabin ki ke, “Tɔ, u kpou.”

²⁷ Le Yisa ta u nɔɔ ki choo kibig nmɔn ki ter u le u fii sir.

²⁸ Yisa kaah nan kɔɔ iniin nmɔn n-yonn man nin, le u bɔɔnɔɔb nin baan u bi binba ke, “Ba ŋa wee tim kaa bi fir nyan kinaanbiig nmɔn naa?”

²⁹ Le u bei bi ke, “Naa li fir nyan kinaanbiig nan a bosu; see ke ni miɛ Uwonbɔr.”

Yisa kaah nan mann ki pag u kum bu man

³⁰ Le Yisa nin u bɔɔnɔɔb nmɔn nyan niin ki nɔɔ Galilii a tingbɔŋin. Amaa waa nan ban uba n biɛ waah be nan yaan ni,

³¹ ki wɔɔn u bɔɔnɔɔbin ni, le ki bei u bɔɔnɔɔbin ke, “Bi na li ta Uninfosaal a Big ki ŋubin bininfob a nɔɔn le bin ku u, amaa ni ween itaa daal, u li fii nkumin.”

³² Le u bɔɔnɔɔbin kaa biɛ u bɔr nmɔn a taai, le ki mu sin san bijawaam nin bin baan.

Ŋma ye wan jon bi biɛn naa?

³³ Yisa nin u bɔɔnɔɔbin kaah nan foo Kapeniɛm ki tan kɔɔ iniin nin n-yonn man nin, le u baan bi ke, “Ni bi pag baa a bɔr nsan nin naa?”

³⁴ Le bi ŋmin, nan bu-n nsan bi bi far tab limɔkpel le, tininkper bu.

³⁵ Le u nan jir ki kal, ki che u bɔɔnɔɔb piig nin bilee ka ki mal u, le u bei bi ke, “Wan biɛn ban u li ye uyudaan ke, see ke u ta uba ki kpann ulanjiin ni biɛn ban, le ki ye ni biɛn nan a yomu.”

³⁶ Le u ta kibig kiba siin bi sisiigin, ki ta u nɔɔ yuur kibig nmɔn. Le ki bei bi ke,

³⁷ “Wan biɛn gaa kibig nan a bosu n yinl bu ke, min le u gaa nmɔn; wan mu gaa min ke, waa gaa nbinba, amaa u gaa wan tunimin mu jigin na.”

Wan kaa kɔn nin ti ke u si ti bɔɔn le

³⁸ Tɔ, le Jɔnn bei Yisa ke, “Wan wɔɔn, ti kan uja uba mu kaah jɔɔ a yinl ki nyan nnaanbiim bininfobin, le ti fuun u bu ke un ta jiɛn na, waah kaa ye ti ni uba-n bu.”

³⁹ Le Yisa bei bi ke, “Ni laa ŋɔɔ wi, wan yin n yinl ki tun ligaril a toon ke, ni bɔɔn bu waa ji li fir ki pag niba ki bii mi.

⁴⁰ Wan biɛn kaa kɔn nin ti ke, u si ti bɔɔn le.

⁴¹ N bei ni ibamɔn le, wan biɛn sei ni nnyum n yinlin, naah ye Masiya a ninfob n bu ke, u daan kaa na li nyi ki lann u yɔɔri.”

Libiginl lan kɔɔn ti tibirin a bɔr

⁴² Le Yisa ji nan mann len ke, “Wan che nbuwaab ban ŋa min yada nan a ni uba ta n bɔr gab ke, bi bi ta linaal takpenl ki lol jɔn u niɛn wee ki tir u jaa limɔgilin ke ni bi sɔ.

^43-44 Mambu, ni ye a nɔɔ li che a yiim ke, a gaa mi ki gen na. Ni ŋan nin uninfo li jɔɔ nnɔɔ nba ki tan kan limiɛfol lan kaa jɔɔ ndiɛm ki jon uninfo li jɔɔ inɔɔ ilee wee ki tan kɔɔ nŋmi-n man kaa jɔɔ njunim nan yaan na.

^45-46 Ni ye a taal li yin che a yiim ke, a ga mi ki gen ki ta gaba, ni ŋan nin uninfo li jɔɔ litaal liba wee ki kan limiɛfol lan kaa jɔɔ ndiɛm ki jon nin u li jɔɔ itaa ilee wee ki tan kɔɔ nŋmi man kaa jɔɔ njunim nan yaan na.

⁴⁷ A numbil mu li ti ji yin che a yiim ke, a logir mi ki nyan na, ni ŋan nin uninfo li jɔɔ nnumbim nba ki tan kɔɔ Uwonbɔr a niin a naamin ki jon nin u li jɔɔ inunbil ilee wee ki tan kɔɔ nŋmi man kaa jɔɔ njunim n-yaan na.

⁴⁸ Nin yaan ‘le inaasanbil yan ŋma bi nan kaa yin kpo, le nŋmi nmɔn mu kaa yin junn ni.’

⁴⁹ Nŋmi le Uwonbɔr na yin ta ki mann uninfo biɛn kasi ke ucha kaah jɔɔ nŋmi ki mann tikur man nin.

⁵⁰ “N-yaam mɔ; amaa n-yaam a mɔm nan sagir ke, a yin ŋa nii wee min ji mɔŋaa? Ni che ni binbem le be ke n-yaamin, wee nmɔn li be nim nin ni tab a sisiigin.”