Tibɔnyaan ti Mak ŋmee ti na 6 - UWONBƆR A GBƆNPƆŊ LIKƆƆNL

Nazarif yaab kaah nan yii Yisa man

¹ Ni bu le Yisa nin u bɔɔnɔɔb nan nyan nin yaan ki jir chaa kun u tɔɔl a tiŋin.

² Le likpakɔɔl daal nan foo, le u kɔɔ kuwonjiɛndiigin ke un wɔɔn bininfob Uwonbɔr a bɔr. Bininfobin kaah nan gbir u wɔɔnimin, le ni gar bi biɛn, le bi baan tab ke, “Uja nan kan nlam nan la ban naa? U ŋa niin ki fir tun ligaril a toon nan naa? U kan ni niɛ nan biɛn laa?

³ Kanpinta-n le kaa yen naa? Naa ye Meri a bija-n le yen naa? U ma kaa ye Jemisi nin Josef nin Judasi nin Simɔnn a kpel n naa? U ninsiɛb le kaa be nan do nan naa?” Ni ma bu le bi yii u bɔr.

⁴ Le Yisa bei bi ke, “Ulinlenn a tiŋin, nin u tɔɔl a ninfobin, nin u tɔɔl a niin yaabin a binba, le baa tenn u jilima.”

⁵ Waa nan fir tun ligaril a toon niin ni, bibaarib bi ŋa nan bu, le u nan ta u nɔɔ ki paan bi bu, le bi kan kutebug,

⁶ amaa bininfobin kaah kaa nan ŋa u yada-n bu le ni nan gar u. Man le Yisa nan chonn ntinbumin ki wɔɔn Uwonbɔr a bɔr,

Yisa kaah nan tun u tooi piig nin bilee man

⁷ le ki nan nan lagin u tooi piig nin bilee ki sei bi npɔɔn ke bin nyan nnaanbiim bininfobin, u nan tun bi bilee lee bilee lee le.

⁸ Le ki bei bi ke, n-yonn man wee ni chaa nan, ni laa ŋmag niba ki chaa, see ni jaangbiɛm a binba. Ni laa ŋmag tijiiri, ki laa ŋmag ipɔgi, ni mu laa ŋuun iligi.

⁹ Ni li tag inaataga, amaa ni laa ŋmag daala kiba ki kpiɛ.

¹⁰ Ni ye ni foo iniin yan yaan wee bi gaa ni kuchɔŋ ke, ni li be niin ki tan kpaa ni nya daal.

¹¹ Ni ye ni foo kitiŋ kiba ni, wee bininfobin kaa gaa ni ke, ki mu kaa ji pel ni wɔɔnim n ke, ni nya kitiŋ nmɔn yaan na, wee ki pir ni taai a tan ki jaa kitiŋ nmɔn yaan na, wee ni li ye siɛra biig ki sei bi.”

¹² Le bi nan fii ki jon ki tan mɔɔn ke, bininfob n jiɛn bi toonbira,

¹³ le bi nan nyan nnaanbiim bininfobin takpem le ki war nkpam ŋa bibaarib takpem le bi kan kutebug.

Jɔnn Wan nan Fu Bininfob Uwonbɔr a Nyunfulin a kum a bɔr

¹⁴ Ubɔr Herɔd nan gbir Yisa a bɔra, u yinl kaah nan don takpemin bu. Le bininfob biba ke, “Jɔnn Wan nan Fu Bininfob Uwonbɔr a Nyunfulin le fii nkumin. Ni ma che u jɔɔ npɔɔn ki tun ligaril a toon man.”

¹⁵ Le biba mu ke, “U ye Uwonbɔr a linlenu Elaja le.” Le biba mu ke, “U ye Uwonbɔr a linlem ban nan be yaayoo n-yaa ni u ba le.”

¹⁶ Ubɔr Herɔd ma kaah gbir man n-yonn man nin, le u ke, “U ye Jɔnn, wan wee n nan che bi jii u yul ki tugirin le, le u fii nkumin ki be u miɛlin.”

¹⁷ Herɔd baantɔɔl le nan che bi choo Jɔnn ki baan u kubaandaag ki ta u ŋa kuloondiigin, u ma Herɔd a waal Filib a poo bu. Bi nan yi upii nmɔn a yinl ke Herɔdiya, Herɔd le nan fee u ki kɔɔn.

¹⁸ Jɔnn nan bei Herɔd le ke Uwonbɔr a siim kaa chee nin un fee u waal a poo ki kɔɔn ni.

¹⁹ Ni ma bu le nan che Herɔdiya nan nan Jɔnn, ki ban un ku u, amaa le kaa sin nyi waah li ŋa man ni.

²⁰ Nan bu-n, Herɔd nan san Jɔnn le, u nan nyi Jɔnn kaah ye upoopendaan wan san Uwonbɔr. Mambu le u nan fee Jɔnn ki jaa. Jɔnn kaah nan mɔɔn Uwonbɔr a bɔr nmɔn Herɔd nan pelig le, ni nan bii u sufu pam, amaa le u le pɔɔn uba ki pelig u bɔr nmɔn.

²¹ Ni bɔɔn bu le Herɔdiya a bonni nan nan choo Jɔnn. Herɔd a maalim a chiig daal kaah nan nan foo-n, le u yin u bɔrbum nin bitɔtob a ninkpeeb nin Galilii a tingbɔŋ a ninkpeeb biɛn.

²² Le Herɔdiya a bisa nyan ki nan waa kiwaag, le ubɔr Herɔd nin u cham a pool pen, le u baan kibisiɛgin ke, “Ba wee a ban n ŋa seiŋaa? N li seiŋ nan biɛn wee a ban.”

²³ Le ki poo tipoor sei kibisiɛgin ke, “N li seiŋ nan wee a ban, hali ni sir nin n bɔgir n naam nan a bɔgil ki seiŋ ke, n li seiŋ.”

²⁴ Le kibisiɛg nan nan nyan ki tan baan u na ke, “N le pii ni yin bei ubɔr ke n ban baa?” Le u na bei u ke, “Tan bei ke, a ban Jɔnn wan fu bininfob Uwonbɔr a nyunfulin a yul le.”

²⁵ Iyaayoo nmɔn le kibisiɛg nmɔn nan nyan ki jir ubɔr Herɔd ban ki tan bei u ke, “N ban Jɔnn wan fu bininfob Uwonbɔr a nyunfulin a yul le, a ta kpeen kitasaŋin ki seim daandaan nan.”

²⁶ Ni nan bii ubɔr a sufu pam, amaa, u mu kaa ji na li fir yii kibigin kaah ban nan nin ni, waah bi chinn ki poo tipoor bichamin ban ni bu.

²⁷ Le ki nan tun bitɔb a jau libol nmɔn, ke un tan tugir Jɔnn a yul ki nan sei u. Le bitɔb a jau nan sin nan jon kuloondiigin ki tan tugir Jɔnn a yul,

²⁸ ki ta kpeen kitasaŋin, le ki nan ta sei kibisiɛg nmɔn. Le u mu ta ki tan sei u na,

²⁹ Jɔnn a bɔɔnɔɔb kaah nan gbir man n-yonn man nin, le bi dan ki nan yuur u gbanann ki tan pii.

Yisa kaah nan jin bininfob turiŋmu man

³⁰ Ni bɔɔn bu le Yisa a tooi nan jirin u ban ki nan bei u baah tan tun nan biɛn, ki sin ji wɔɔn bininfob man.

³¹ Bininfob takpem le nan dan, biba nan chaan le biba mu jir hali ke Yisa nin u tooi kaa nan jɔɔ isaŋ nin bin ji. Ni ma bu le u nan bei bi ke, “Ni che ti jo kulɔŋ, ti binba, ki foor wama.”

³² Le bi kɔɔ kuŋaluŋin bi binba, ki lɔŋ ki jon kulɔŋin.

³³ Baah nan chaa n-yonn man nin, le bininfob takpem nan kan ki biɛ bi, le ki nan nyan bi timin, ki guun ki kpagin limɔgil a gbaam ki chinn kenn bi.

³⁴ Yisa kaah nan nyan kuŋaluŋin yaan nin, ki miin bininfob pii lagin le ki mug, le kunyunyunbaag choo u takpem, bi binbem nan nann ipee yan kaa jɔɔ upeekpaar le. Le u nan piin iyaayoo nmɔn ki wɔɔn bi tibɔr takpem.

³⁵ Iyoo nmɔn kaah nan nan jon nin, le u bɔɔnɔɔb nan dan u ban ki nan bei u ke, “Isaŋ jon na, le taah be nan yaan nan mu ye kulɔŋ le.

³⁶ Jaa bininfobin wee bin jo kitiŋin, nin ntinbum man mal, wee ki tan daa tijiir ki ji.”

³⁷ Le u mu bei bi ke, “Ni tɔɔlin sei bi tijiir wee bin ji.” Le bi jiin ki baan u ke, “A ban ti taa iŋmal iniin a yɔɔr le ki tan daa tijiir ki nan sei bi wee bin jii?”

³⁸ Le u baan bi ke, “Ni jɔɔ boroboro kon iŋaa? Ni tan liga man.” Baah jon ki tan lig ki biɛ n-yonn man nin, le bi jirin ki nan bei u ke, “I ye boroboro kon iŋmu le nin njanbum milee.”

³⁹ Le Yisa bei u bɔɔnɔɔbin ke bin che bininfobin bɔgir ki kal ikur ikur timɔsɔɔn bu.

⁴⁰ Le bi bɔgir ki kal ikur kobig bininfob piŋmu piŋmu.

⁴¹ Le u yuur boroboro-n nin ijan ilee-n, le ki waan lig paab, le ki poor Uwonbɔr, le ki war war boroboro-n ki ta sei u bɔɔnɔɔbin ke bin ta tol bininfob nmɔn na, le ki por por ijan ilee nmu, le bi tol bininfobin biɛn.

⁴² Le bininfob n biɛn jin ki nan gbee ki sin gur.

⁴³ Le u bɔɔnɔɔb lagin tijiir tan gurin, ki gbeen tikachar piig nin tilee.

⁴⁴ Bijab ban nan jin tijiir nmɔn nan ye bininfob turiŋmu le.

Yisa kaah nan chonn nnyum bu man

⁴⁵ Libol nmɔn le Yisa nan che u bɔɔnɔɔb kɔɔ kuŋaluŋ ki lii u sam ki tan lɔŋ limɔgil a dool, ki chaa Befisada; amaa le u ma paar ke un jaa bininfobin.

⁴⁶ Waah jaa bininfob nmɔn ki diɛ n-yonn man nin, le u don lijɔɔl a papaab ki tan be ki miɛ Uwonbɔr.

⁴⁷ Le kunyiɛg nan ŋmiɛ, ke kuŋaluŋin la be nnyum a sisiigin, le u ma la be lijɔɔl n-yaa paab u binba,

⁴⁸ le u nan kan ki miin u bɔɔnɔɔbin be gbaar le ki kur ke kuŋaluŋ n jo, bi nan too nfaam le. Le u fii ki choon nnyum bu ki chaa bi ban kutaayɔg. Waah tan mal n-yonn man nin, le ki ŋa ke u yin jo jo bi ban le-n.

⁴⁹ Le bi kan u ki miin u choon nnyum bu le, le bi nyi ke u ye utakpiir le, le ki nin yigin papaab,

⁵⁰ bi biɛn nan kan wa, le bijawaam choo bi takpem. Libol nmɔn le u bei bi ke, “Ni che ni sufu li pɔɔu ke ni ye min le; ni laa san bijawaami.”

⁵¹ Le ki kɔɔ kpiɛ bi bu kuŋaluŋ nmɔn yaan; le ntafaamin jir ki ŋmin soon. Le ni ŋa bi ligaril takpem,

⁵² nan bu-n, baa laa nan biɛ boroboro-n a taai. Bi tuli le nan pɔɔ.

Yisa kaah nan che bibaarib kan kutebug Genesareti man

⁵³ Baah tan nyan limɔgilin yaan wee ki don ligungonl a paab, Genesareti a tiŋin ni, le bi lol bi ŋaluŋ ki siin.

⁵⁴ Niin a ninfob kaah nan kan Yisa nan, bi nan biɛ u le weem,

⁵⁵ le ki nan gu ki kɔɔ kitiŋ nmɔn a logi biɛn ki tug bibaarib ki jɔɔ chaan Yisa ban. Bi gbir ke u be nan yaan biɛn ke, bi tug bibaarib bi wan dɔɔn waŋ bu le ki chaan u ban.

⁵⁶ Ni ye u nyan kitiŋ kan yaan bee ntinbum biɛn nin ke, bininfob jɔɔ bibaarib le ki too u nsan bu hali nin nnyamin na, ki balin u ke un le che bibaarib n maa u daala a gbaam, le ban biɛn nan pii u ki maa nmɔn biɛn nan kan kutebuga.