Tibɔnyaan ti Mak ŋmee ti na 3 - UWONBƆR A GBƆNPƆŊ LIKƆƆNL

Yisa kaah nan teb kinɔɔnkpankpiiŋdaan man

¹ Le Yisa nan jir kɔɔ kuwonjiɛndiigin, ki miin uja uba be niin le u nɔɔnkpaŋ kpo.

² Le bininfob biba nan be niin ki lig Yisa, n jee u li che kinɔɔnkpankpiiŋdaan nan n pɔɔg likpakɔɔl daalaa, wee bin galin u.

³ Le Yisa nan yin kinɔɔnkpankpiiŋdaan nin ke “Dan do.”

⁴ Le ki baan bininfobin ke, “Ti siim jaa ti ke ti li ter bininfob bee ti ku baa?” Le bi ŋmin.

⁵ Le u lig bi nin liŋuul u sufu kaah nan bii takpem bi nunkoo-n nbu; le u nan gbiɛ lig uja-n ki ke, “Tann a nɔɔ nmɔn na.” Le u tann mi le mi pɔɔg.

⁶ Libol nmɔn le Farasii yaab n nan labir ki nyan, le bi ma nin ubɔr Herɔd a ninfob tan lol choo baah li ŋa man ki ku Yisa.

Bininfob takpem kaah nɔɔ Yisa a bɔɔn man

⁷ Le Yisa nin u bɔɔnɔɔb nan fii ki jiir Galilii a mɔgil n-yaa gbaam, le kuninfogbaluŋ nan nɔɔ u bɔɔn. Bi nan nyan Galilii nin Judiya

⁸ nin Jerusalam nin Idumiya nin Jɔdann a mɔgil a dool, nin Taya nin Sidonn a tingbaan yin, bi nan yab pam, le bi nan lagin u ban; baah nan gbir ke u tun ligaril a toon n bu, le bi nan dan u ban limɔgil n-yaa gbaam.

⁹ Le u nan bei u bɔɔnɔɔbin ke bin ban kuŋaluŋ ki sei u ni,

¹⁰ waah nan che bibaarib takpem pɔɔg nbu le ban biɛn nan bu-n nan fɔɔr ki mal u ki ban bin maa u.

¹¹ Nnaanbiim kaah be bininfob ban bu-n n nan kan u ke, bi lur le ki gbaan u nintogil ki yigin ke, “Fin le ye Uwonbɔr a Bija.”

¹² Le Yisa bei bi nin linunmanl ke, “Ni laa taam ki mɔɔn ni.”

Yisa kaah nan gann u tooi piig nin bilee man

¹³ Ni bɔɔn bu le Yisa nan don ligungonl a paab le ki yin ban wee u ban nin, le bi dan u ban.

¹⁴ Le u gann bininfob piig nin bilee, ki yin bi ke u tooi, ke bi li be u ban na wee u li tun bi wee bi li mɔɔn Uwonbɔr a bɔr,

¹⁵ ki sin li jɔɔ npɔɔn ki li nyan nnaanbiim bininfobin.

¹⁶ Waah nan gann bininfob piig nin bilee ban nin a yin sɔ: Simɔnn (wan wee Yisa nan yin u ke Piita nan);

¹⁷ nin Jemisi nin u waal Jɔnn, ban nan ye Zebedi a naachim nan, (le Yisa nan sei bi liyinl ke Bɔɔnejesi, le ni taai le ye ntatiɛn bum);

¹⁸ nin Anduru, nin Filib, nin Batolomiu, nin Matiu, nin Tomasi nin Jemisi wan ye Alifiu a bija nan, nin Tadiɛsi, nin Simɔnn wan wee bi yi u ke Zealo wee u nan kɔn u bol a kaal bu-n,

¹⁹ ki kpiɛ Judasi Isikariya (wan nan kɔɔr Yisa nan).

Yisa nin nnaanbiim a bɔru Beelizebul a bɔr

²⁰ Ni bɔɔn bu le Yisa kun, le kuninfogbaluŋ lagin u ma nin u bɔɔnɔɔbin ban, hali ke bi nan lann isaŋ yan wee bi li ta ji tijiir.

²¹ U niin yaab kaah nan gbir man nin, le bi dan ke bin nan choo u, bi nan ke, “U waar le.”

²² Ban wɔɔn Uwonbɔr a siim ki nyan Jerusalam mu nan ke, “Beelizebul le be u yulin, nnaanbiim a bɔru li che u nyan nnaanbiim nmɔn.”

²³ Le Yisa yin ban wɔɔnn Uwonbɔr a siim nmɔn ke bin dan, le ki ga bi libɔŋal ke, “Sintani li fir ŋɔɔr Sintani jigin naa?

²⁴ Ni ye nnaam a ninfob kɔn ki tog tab ke, bi naam nmɔn kaa li fir siri.

²⁵ Ke ni ye iniin iba a ninfob kɔn nin tab ke, bi niin nmɔn mu kaa li fir siri.

²⁶ Ni ye Sintani mu kɔn nin tab wee ki bɔgir ke, waa li fir siri, u diɛm le yen.

²⁷ Uba kaa li fir ki kɔɔ upɔɔndaan a niin ki tan su u wan yɔɔri, see ke u chinn ki lol u le ki nin fir ki fee u wan yɔɔr nmɔn.

²⁸ “Ibamɔn le n bei ni nan, Uwonbɔr li jiɛn bininfob a bir ki per bi nin ban sugir win biɛn.

²⁹ Amaa wan pag ki bii Kasi a Naaŋ n ke, Uwonbɔr kaa li nyi ki jiɛn per u daan ni. Le u galin kaa li nyi ki diɛ.”

³⁰ Nan bu nan che Yisa pag man nmɔn ye nan le, baah nan ke, “Nnaanbiim le be u yulin nin bu.”

Yisa a na nin u watiib a bɔr

³¹ Iyaayoo nmɔn le Yisa a na nin u watiib dan nkaafiin, le ki tun uba ke u yin u ni.

³² Ki miin kuninfogbaluŋ ka le ki gɔɔn u, le u be bi sisiigin; le bi bei u ke, “A na nin a watiib be nkaafiin ki baŋ.”

³³ Le u baan bi ke, “Ŋma ji ye n naa, ke ŋmam mu ji ye n watiibaa?”

³⁴ Le ki lig ban ka u ban nin ki ke, “Lig, n na nin n watiib be n ban do.

³⁵ Wan biɛn tun Uwonbɔr a bamin, u ma ye n kpel nin n waal nin n ninsa nin n na.”