Tibɔnyaan ti Mak ŋmee ti na 16 - UWONBƆR A GBƆNPƆŊ LIKƆƆNL

Yisa a kum a fiim a bɔr

¹ Likpakɔɔl daal kaah nan jon nin, le Meri wan nyan Magidalin, nin Salomi, nin Meri wan nan ye Jemisi a na nan, nan jon ki tan daa tulaali ke bin tan gbir ŋa Yisa a gbanann.

² Nnyantoon a chinchinn a weem daal a jakpanyiɛn, ke nween kaa la pɔɔ, le bi chinn ki fii ki jon kukaag nmɔn yaan.

³ Baah la nan be nsan bu ki chaan, le bi baan tab ke, “Ŋma tan yin bin litangbagil lan leg kukaag nan a mɔb ki sei taa?” (Litangbagil nmɔn nan yab pam.)

⁴ Le bi tan mal niin, ki miin likalool nmɔn pii bin ki dɔ li binba le.

⁵ Le bi kɔɔ kukaag nmɔn yaan, ki kan unaachipɔɔn ka nnɔɔjiin paam ki yee daala peŋ fufɔbig. Le ni gar bi takpem.

⁶ Le unaachipɔɔn nmɔn bei bi ke, “Ni laa che nin gar ni man ni. Ni ban Yisa wan ye Nazarif a tiŋ a ninfou wan wee bi nan kpaa u lidapunpunl bu n le. U fii nkumin na. Waa be do.

⁷ Ni li jir ki tan bei u bɔɔnɔɔb nin Piita ke u liin bi nintogil ki jon Galilii u; nin yaan le bi ta li kan u ke waah pii nan bei bi man ni.”

⁸ Le bipiibin a sufu nan ŋmarin, le bi gbanann jegil, le bi nan nyan kukaag nmɔn yaan, ki guun, le kaa bei uba, nan bu-n bijawaam le nan choo bi.

Yisa kaah nan ta u ba ki wɔɔn bininfob man

⁹ Tɔ, Yisa kaah nan fii nkumin, Juu yaab a kpakɔɔl daal kaah jon ki won a jakpanyiɛn nmɔn, u nan chinn ta u ba wɔɔn Meri wan nan nyan Magidalin ni le, wan wee u nan nyan nnaanbiim milile u ni nan.

¹⁰ Le Meri nan jon bininfob ban nan nɔɔ Yisa nan ban. Ban nan jɔɔ npoobiin ki ka ki mɔɔr nan. Le ki bei bi ke u kan Yisa u, u fii nkumin na.

¹¹ Baah gbir man nin, baa nan ŋa yada.

¹² Ni bɔɔn bu, le Yisa a bɔɔnɔɔb bilee nan choon chaa ntingbaan. Le Yisa nan degir ki ta u ba wɔɔn bi.

¹³ Le bi jir kitiŋin yaan ki tan bei bi tabin, baah kan Yisa man, le baa ŋa yada.

Yisa kaah nan ta u baa ki wɔɔn u bɔɔnɔɔb piig nin u ba man

¹⁴ Ni bɔɔn bu jigin le Yisa a bɔɔnɔɔb piig nin uba-n nan ka ki ji tijiir, le u nan degir bi bu, ki fuun bi bu nin bi yada kaah waar man, nin bi tuli kaah pɔɔ. Mambu, nin baah kaa ŋa ban kan waah fii nkumin ni yada-n bu.

¹⁵ Le u ji bei bi ke, “Ni li chaa ki tan mɔɔn tibɔŋann nmɔn ki wɔɔn uninfo biɛn, kutingbɔŋ nan yaan biɛn na.

¹⁶ Wan biɛn ŋa yada wee bi fun u Uwonbɔr a nyunfulin ke u li kan nŋmarim; amaa wan kaa ŋa yada ke Uwonbɔr na li bii u.

¹⁷ Amaa ban ŋaam yada nan li tun ligaril a toon; bi na li yin n yinl ki nyan nnaanbiim bininfobin, ki ji pag ileen pɔɔn,

¹⁸ ni ye bi nan choo iwaa bee bi nan jin bi tijibir ke, naa li ŋa bi niba, bi ji nan ta bi nɔɔi ki paan bibaarib bu ke, bi li kan kutebug.”

Yisa kaah don Uwonbɔr a niin man

¹⁹ Tɔ, Yisa kaah nan pag tibɔr nmɔn ki diɛ n-yonn man nin, le Uwonbɔr ta u don U niin ki tan kaan u ma Uwonbɔr a nɔɔjiim paam.

²⁰ Man le u bɔɔnɔɔbin nan jon ki tan be ki mɔɔn u bɔŋann nmɔn ilog biɛn, le ti yudaau nmɔn be nin bi, ki che bi tun ligaril a toon, le bi toon nmɔn wɔɔn siɛra ke bi mɔɔn ni nmɔn ye ibamɔn le.