Tibɔnyaan ti Mak ŋmee ti na 15 - UWONBƆR A GBƆNPƆŊ LIKƆƆNL

Baah ta Yisa ki jon Palati ban man

¹ Kumanug a ninkpeeb, nin kitiŋ nmɔn a ninkpeeb, nin ban wɔɔnn Uwonbɔr a siim, nin Juu yaab a ninkpeeb biɛn nan lagin njakpanyiɛn, ki lol ilol, le ki baan Yisa tikulor ki ta u jon kitiŋ nmɔn a bɔr ninkpelu wan wee bi yi u ke Palati n ban.

² Le Palati baan u ke, “Fin le sin ye Juu yaab a bɔru win naa?” Le Yisa jiin ki ke, “Ke ŋaah len man ni.”

³ Le kumanug a ninkpeeb nmɔn pag ki bii u takpem.

⁴ Le Palati ji baan u, “Ŋaa yin jiin tiba, pelim baah pag ki biiŋ man.”

⁵ Le Yisa le yii kaa jiin ni, le ni gar Palati.

Palati kaah nan jaa ke bin ku Yisa man

⁶ Yuglagir a chiig a jim a yonn biɛn, Palati ti nyan uninfo uba le kuloondiigin, wan wee bininfobin ban, ki jaa.

⁷ Iyaayoo nmɔn uja uba nan be kuloondiigin, le u yinl ye Barabasi. U ma nin bininfob biba le nan be kuloondiigin, bi mɔyiil lan wee bi nan jɔɔ kitiŋin yaan wee ki ku bininfobin bu.

⁸ Mambu le kuninfogbaluŋ nmɔn nan lagin ki miɛ Palati ke un tun ke waah pii ti tun man ni.

⁹ Le u baan bi ke, “Ni ban n nyan Juu yaab a bɔru win lee?”

¹⁰ Nan bu-n u nyi ibamɔn ke kininaŋ bu le kumanug a ninkpeeb ta Yisa ki ŋa u nɔɔn.

¹¹ Le kumanug a ninkpeeb nmɔn nan mann pag ki bei kuninfogbaluŋin ke, bin bei u wee un nyan Barabasi sei bi.

¹² Le Palati mann baan bi ke, “Ke wan wee ni yi u ke Juu yaab a bɔru nan n ŋa u nii?”

¹³ Le bi tiɛn nin nmɔpɔɔn ki ke, “Kpaa mu lidapunpunl bu.”

¹⁴ Le Palati baan bi ke, “Babu? U bir jann ye ti laa?” Le bi mann tiɛn papaab ki ke, “Kpaa mu lidapunpunl bu!”

¹⁵ Le Palati ban un penn kuninfogbaluŋin a sufu, mambu le u nyan Barabasi ki sei bi, le ki che bi boo Yisa, le ki ta u sei bi ke bin tan kpaa u lidapunpunl bu.

Bitɔtogib kaah nan sugir Yisa man

¹⁶ Le bitɔtogib nmɔn ta Yisa ki kɔɔ kitiŋ nmɔn a bɔru Palati a naakoon, ki yin bi kpiɛtiib biɛn.

¹⁷ Le bi choo u wanyeewann pir, ki ta daala maŋ ki yeen u, le ki ta ikunkon ki loo kiyuchigirig ki ta chigin u,

¹⁸ le ki nin poor u ke baah ti poor u bɔr man nin, ki ke, “Juu yaab a bɔru, a pɔɔ woo.”

¹⁹ Le ki ta likikagil ki fiɛb u yul, ki siin timɔsann jaar u bu, ki gbaa bi dun bu u titogil.

²⁰ Baah daa u nyɔɔrug ki diɛ nan, le bi choo daala maŋin ki pir le ki jiin u yaa wan yɔɔrin ki yeen u, le ki ta u ki nyan ke bin tan kpaa u lidapunpunl bu.

Baah nan kpa Yisa lidapunpunl bu man

²¹ Baah nan be nsan bu ki chaa n-yonn man nin, le bi kenn u jaa uba le u yinl ye Simɔnn. Le bitɔtogib nmɔn mug u le u gaa Yisa a kum a dapunpunl nmɔn. (Uja nmɔn nan ye Sarene a jau le, u nan nyan kitinbig kiba ni le ki chaan Jerusalam. U nan ye Alɛgzanda nin Rufusi a baa le.)

²² Le bi ta Yisa ki jon nan yaan wee bi yi ke Goligota, (ni taai le ye, Kuyukpabug a bol.)

²³ Ni yaan le bininfob biba nan sei u ndaam man ŋmar nin nnyɔg man wee bi yi mi ke miɛr nan, le u yii kaa nyun ni.

²⁴ Le bi nin kpaa u lidapunpunl bu, le ki tɔn inaa ki por u wan yɔɔr.

²⁵ Bi nan kpaa u njakpanyiɛn le, tikur tiwiɛ a yonn.

²⁶ Bi nan sɔb baah ke bi kan u bir tan nmɔn le ki tabin u dapunpunlin bu le ki ke, “Juu yaab a bɔru n sɔ.”

²⁷ Bi nan kpaa binaayigib bilee idapunpun bu ki kpiɛ u bu, le uba be u nɔɔjiim paam, le u kpiɛg mu be u nɔɔgam paam.

²⁸ Le ni gbeen nan sɔb Uwonbɔr a gbɔŋin ke, “Bi ŋa u le ke baah ŋaan titoonbirdam man nin.”

²⁹ Le ban nyan niin nin chonn ki gugin bi yuli ki sugir u, ki ke, “Tɔ, fin le ke a li fir ber iwonjiɛn niin nan ki ji ta iweehn itaa ki maa ki nna.

³⁰ Man ke, nyan lidapunpunl nan a paab ki jiirin ki nan fee a ba ki jaau.”

³¹ Man le kumanug a ninkpeeb nin ban wɔɔnn Uwonbɔr a siimin mu sugir u, le ki bei tab ke, “U ti feen u tab le ki jaar, kaa ji na li fir fee u ba ki jaa.

³² Juu yaab a bɔru wan ye Masiya nan, nya lidapunpunl nan a paab ki jirin daandaan nan, wee ti kan ki ŋa u yada.” Le ban wee bi nan ta kpiɛ u bu ki kpaa n mu sugir u.

Yisa a kum a bɔr

³³ Nwosisiigin, le kutingbɔŋ biɛn nan bɔŋ ki tan kpaa kujɔɔg a kur titaa.

³⁴ Ti kur titaa nmɔn a yonn, le Yisa kunn papaab ke, “Eloi, Eloi, lema sabagtani?” Ni taai le ye ke, “N Wonbɔru, n Wonbɔru ba ŋa wee a fɔr ki jiɛn maa?”

³⁵ Le ban si niin nin gbir waah yi, le biba ke, “Ni pela man u yi Elaja le.”

³⁶ Le bi ni uba guun ki tan yuur chiisɔgsu ki ta ŋa ndaam man mɔɔn nin ki ta sagin kudaag bu, le ki don tan sei u ke un nyu, ki ji len ke, “Che ti lig njee Elaja li dan ki nan jiin u lidapunpunl nan a paab bee waa li dan naa?”

³⁷ Le Yisa mann kunn papaab, le ki nin kpo iyaayoo nmɔn.

³⁸ N-yonn nmɔn le likinkenl lan jɔn ki por iwonjiɛn niin nin choo bɔgir papaab ki tan jaa tum.

³⁹ Le bitɔb a sanliiru nan si lidapunpunl nmɔn ban ki kan Yisa kaah kpo man nmɔn, le ki ke, “Ibamɔn bu, uja nmɔn sin ye Uwonbɔr a Bija le.”

⁴⁰ Le Meri wan nyan Magidalin nin Meri wan ye Jemisi big nin Josesi a na nan, nin Salomi, mu nan kpiɛ bipiib biba bu le bi si nan fɔg ki lig.

⁴¹ Bi pii nan nɔɔ Yisa, n-yonn man wee u la nan be Galilii n le, ki ter u. Bipiib tab takpem ban nan nɔɔ Yisa ki foo Jerusalam nan mu nan be niin.

Yisa a gbanann a piim a bɔr

⁴² Ni nan ye sili daal le, ni nan yin wonn njakpanyiɛn likpakɔɔl daal le. Lidaal nmɔn a jɔɔg

⁴³ le Arimatiya a tiŋ a jau wan a yinl ye Josef nan dan. U nan ye Juu yaab a bɔjiru a ninkpelu uba le, ki ye u buchinn nin ibamɔn, ki nan guu Uwonbɔr a naam n-yaa foonim. Mambu, le u nan jon Palati ban kaa san bijawaami ke un ta Yisa a gbanann ki sei u ni.

⁴⁴ Palati kaah pii gbir ke Yisa kpo nan, le ni gar u, le u yin bitɔb a sanliiru ki tan baan u ke, “Yisa kaah kpe-n ni yuur waa?”

⁴⁵ Waah nan gbir bitɔb a sanliiru nmɔn a mɔnn diɛ, le u yin Josef nmɔn ki nan jaa u ke un tan yuur Yisa a gbanann nna.

⁴⁶ Josef pii nan daa kikinpeŋa le ki tan jɔnn Yisa a gbanann lidapunpunl n bu ki ta pɔbin niin, ki ta u piin kukaag kan wee bi nan jiɛ kutanpiig bu, ki ta litangbagtakpenl ki biin ki mɔbin.

⁴⁷ Le Meri wan nan nyan Magidalin nin Meri wan nan ye Josesi a na nan, bi nan kan baah pii Yisa a gbanann nan yaan na.