Tibɔnyaan ti Mak ŋmee ti na 12 - UWONBƆR A GBƆNPƆŊ LIKƆƆNL

Bitoontum a bɔŋal

¹ Iyaayoo nmɔn le Yisa gaa libɔŋal ke, “Uja uba le nan kon u dikpaab, le ki ŋuun ikunkon ki gɔɔn bi, le ki mann lidiboopal, le ki maa libinbinl lan kper ke wan guu-n li ka li paab ki guu bukpaab nmɔn. Le ki yin bikpaab biba ki ta bukpaabin ki ŋa bi nɔɔn ke bi li guu. I nan foo nchiɛm ke bin chiɛ sei u ni wee ki mu chiɛ bi yaan. Ni bɔɔn bu le u yaar ki jon kitiŋ kiba.

² Idi a chiɛm kaah nan foo-n, le u tun u yomu ke un tan gaa idi u toontum n ban ni, le u jon.

³ Le bitoontumin tan choo u ki boo u nbamɔm, ki ŋɔɔr u gab le u kun yɔli.

⁴ Le ukpadaan nmɔn ji tun uyom uba, le bitoontumin ji tan fa u yul ki chib, ki jin u ifa.

⁵ Le ukpadaan nin ji mann tun uyom uba bi ban. Le bi tan ku u ma. Ni bɔɔn bu le u ji saar tun biyom takpem bi ban, le bi ji tan saar tun bi mu man, ki boo bibam, ki sin ku bibam.

⁶ Ukpadaan nmɔn a bijiɛkaag le ni nan gur u ban, le u tun u bitoontum nmɔn ban, ki ke, “Bi li jiin bi ba ki sei n tɔɔl a bija nmɔn.

⁷ Le bitoontum nmɔn bei tab ke, ‘U faajiru sɔ, che ti ku u, wee lifaal nmɔn n kpann ti yaal.’

⁸ Le bi choo u ki ku ki ta u nyan nkpagbaan ki tan gab.”

⁹ Yisa kaah pag man ki diɛ n-yonn man le u baan bi ke, “Ni tiɛr ukpadaan nan ni yin ŋa niin? U yin dan le ki nan ku bitoontumin, le ki ta bukpaabin ki ŋa bitoontum biba a nɔɔn.

¹⁰ Naa la nyi ki karin naah sɔb Uwonbɔr a gbɔŋin man n naa? Ni sɔb ke, “Kudaag kan wee bitanmaab yii ki n ni, ki ma nan ye kijaantelig ŋaŋ,

¹¹ Uwonbɔr le ŋa man Le ni ŋa ti ligaril.”

¹² Yisa kaah pag man ki diɛ n-yonn man nin, le Juu yaab a yudam biɛ ke u ga libɔŋalin ki jiin bi paam le, le bi ban bin choo u, le ki sin san bininfobin bijawaam; ni bu le bi ta u ki jiɛn ki sin yaar.

Baah nan pen Yisa a lam man

¹³ Le bi nan tun Farasii yaab biba nin Ubɔr Herɔd a nib biba Yisa ban ke bin nan pen u lam.

¹⁴ Le bi nan foon ki baan u ke, “Wan wɔɔn, ti nyi ŋaah pag ibamɔn, kaa san bijawaam nin bininfob kaah li tiɛr man ni. A biɛ wɔɔn bininfob Uwonbɔr a sam nin ibamɔn, le a baga kaa be nin uninfo kaah ye wan ni. Mambu, bei ti ni, ni ŋan nin ti yɔ lampo ki sei Rom a tiŋ a bɔru Siiza, bee ti laa yɔɔ?”

¹⁵ Le Yisa biɛ ke bi ban bin pen u lam le, le ki jiin bi ke, “Ba ŋa wee ni ban ni kɔɔnim libiginlin naa? Li jɔɔn biligib nmɔn wee n lig.”

¹⁶ Le bi ta sei u. Le u baan bi ke, “Ŋma a nunaŋ nin u yinl be biligib nmɔn buu?” Le bi bei u ke, “Siiza.”

¹⁷ Le Yisa bei bi ke, “Tɔ, ni ta nan ye Siiza yaan ki sei Siiza u, ki ta nan ye Uwonbɔr yaan ki sei Uwonbɔr a.” Le ni gar bi takpem u jiim nmɔn bu.

Bitakpiib a fiim a bɔr

¹⁸ Le Sadusi yaab biba nan dan u ban. Ban len ke binib kaa yin fii nkumin ni, le ki bei ke,

¹⁹ “Wan wɔɔn, Moziz nan sɔb nsiim ki ke, “Uja kpo wee ki jɔɔ upii wee kaa ma kibig ke, ni ŋan u na a big n ta lipukɔɔlin ki maa nbuwaab sei utakpiirin.

²⁰ Tɔ, bijab bilile le nan be ki ye tinabir, le uninkpelin kɔɔn u pii ki kpo kaa ma nbuwaabi.

²¹ Le wan pa u bu ta lipukɔɔl nmɔn, le ki mu kpo kaa ma bigi; le wan kpiɛ bita n mu ta upii nmɔn, le ki mu nan kpo, kaa ma kibigi.

²² Man le ban biɛn pa nmɔn kɔɔn upii nmɔn, le ki nan kpo, bi ni u ba kaa ma kibig nin upii nni. Ni bɔɔn bu, le upii nmɔn mu nan kpo.

²³ Tɔ, bitakpiib a fii daal, bi ŋmiɛ na yin ye upii nmɔn naa? Nan bu-n bi bilile nmɔn biɛn kɔɔn wa.”

²⁴ Le Yisa bei bi ke, “Naa nyi niba. Nan che naa nyi nmɔn ye nan le. Naa nyi Uwonbɔr a gbɔŋi, kaa ji nyi waah jɔɔ npɔɔn man ni.

²⁵ Bitakpiib nan fii nkumin ke, bi na yin be le ke malakam kaah be Uwonbɔr a niin man nin; lipiikɔɔnl nin lijakunl kaa na yin be.

²⁶ Ki jiin nkum a fiim paam, naa nyi ki karin Uwonbɔr a linlenu Moziz a sɔbim n naa, naa nan pag ki jiin kujagorug a bɔr n naa? Ni sɔb ke Uwonbɔr nan bei Moziz ke u ma Uwonbɔr le ye Abiraham a weem, nin Azig a weem, nin Jekɔb a weem.

²⁷ Waa ye ban kpo a weemi, u ye ban fo a weem le. Ni jɔɔ kuŋmaruŋ.”

Nsiim man yab a bɔr

²⁸ Tɔ, ban wɔɔnn nsiim nmɔn a ni uba nan be niin ki gbir Yisa nin Sadusi yaab nan a bɔr pagilin, ki kan Yisa kaah jiin ibinbaan ni nbamɔm man. Ni bu le u dan Yisa ban, ki mu nan baan u ke, “Ke nsiim mi la ba le ye nsiim man pɔɔ?”

²⁹ Le u jiin u ke, “Nsiim man pɔɔ ye nan le: ‘Iziral yaab, ni pelim man, ti Yudaau Uwonbɔr ye Uwonbɔr uba le.

³⁰ Li jiɛ u nin a sufu biɛn, nin a naaŋ biɛn, nin a potiɛl biɛn, nin a pɔɔm biɛn na.’

³¹ Nsiim man pɔɔ ki kpiɛ milee ye nan le: ‘Li jiɛ a tau ke ŋaah jiɛ a ba man ni.’ Nsiim nba kaa ji be ki jon nsiim milee nan ni.”

³² Le wan wɔɔnn nsiim nmɔn bei Yisa ke, “Wan wɔɔn, n pooriŋ. A pag ibamɔn le, ke ti Yudaau Uwonbɔr ye Uwonbɔr uba le, le Nween nba kaa ji be ki kpiɛ u bu,

³³ ke uninfosaal li jiɛ Uwonbɔr nin u sufu biɛn, nin u potiɛl ke, ki ji li jiɛ u tau ke waah jiɛ u ba man nin ke. Ni ŋan ki jon nin uninfo n ta tiwankor ki mann kumanug ki nyɔɔ nŋmi sei Uwonbɔr a.”

³⁴ Yisa kaah nan kan ke u jiimin jɔɔ nlamin, le u bei u ke, “Ŋaa fɔg nin Uwonbɔr a niin a naami.” Ni niɛ nan a bɔɔn uba kaa ji nan jɔɔ sufu nin un baan Yisa nbinbaan ni.

Masiya kaah ye wan

³⁵ Yisa kaah nan be wɔɔn bininfob iwonjiɛn niin n ni, le u nan baan bi nbinbaan ke, “Ba ŋa wee ban wɔɔnn Uwonbɔr a siimin ke Masiya n ye Defid a yaabil lee?

³⁶ Kasi a Naaŋ le nan gbeen Defid, le u ke, ‘Uwonbɔr nan bei n Yudaau ke, kalim n nɔɔjiim paam hali nin maah na li che a dataam nkpann a taai a tɔɔn bol.’

³⁷ Defid baantɔɔl kaah nan yi Masiya ke u yudaau nan, ke ni ŋa niin wee Masiya ye Defid a yaabil laa?” Bininfob takpem le nan pelig Yisa a wɔɔmin nin npopeen.

Ban nan wɔɔn Uwonbɔr a siim nan a bɔr

³⁸ Waah nan wɔɔn bi nan, le ki bei bi ke, “Ni li nyi ban wɔɔnn ni Uwonbɔr a siim nan a binbem bu man; bi ma ban bi li yee daala fufɔgir ki choon, ki ban ke bininfob li poor bi kinyaŋin,

³⁹ le bi kɔɔ kuwonjiɛndiigin ke, bi ban bin kal bininkpeeb a kikaabol le; bi ji jon kuchiigin mu ke, bi ban bin kal biyudam a kikaabol le;

⁴⁰ bi ma ji ipukɔɔ dulim, le ki ji jirin ki nan miɛ Uwonbɔr ki yuur, ki ban bininfob n kan bi ki ke bi ye bininfoŋam le. Bi tudaril na li bir pam.”

Lipukɔɔl a piini a bɔr

⁴¹ Yisa nan ka iwonjiɛn niin le ki mal Uwonbɔr a piini a yiigin, ki lig bininfob kaah kpeen ilig man. Le bijɔɔndam takpem nan kpeen ilig takpem,

⁴² le kipukɔɔlanjiimig mu nan kpeen koobu ilee.

⁴³ Le Yisa yin u bɔɔnɔɔbin ki bei bi ke, “Ibamɔn le n bei ni nan, kipukɔɔlanjiimig nan kaah ta u piini yan kpeen kiyiig nan yaan nan, jon ipiin yan biɛn be niin nin na.

⁴⁴ Nan bu-n, bi biɛn nan nyan bi piini nmɔn bi jɔɔmin le, amaa kipukɔɔlanjiimig nan ma ta u faal biɛn le sei.”